* ಸುನಿಲ್ ಗವಾಸ್ಕರ್ ಮಾಜಿ ಕ್ರಿಕೆಟಿಗ
ಹಿಂದಿನಂತೆ ಹೆಚ್ಚಿನ ಟೆಸ್ಟ್ ಪಂದ್ಯಗಳು ಡ್ರಾದಲ್ಲಿ ಅಂತ್ಯಗೊಳ್ಳುವ ಸಂದರ್ಭ ಈಗಿಲ್ಲ. ಇದಕ್ಕಾಗಿ ಸೀಮಿತ ಓವರ್ಗಳ ಕ್ರಿಕೆಟ್ಗೆ ಕೃತಜ್ಞತೆಗಳನ್ನು ಹೇಳಲೇಬೇಕು. ಈಗಲೂ ಕೆಲ ಪಂದ್ಯಗಳು ಡ್ರಾಗೊಳ್ಳುತ್ತವೆ. ಆದರೆ ಹೆಚ್ಚಿನ ಸಂದರ್ಭಗಳಲ್ಲಿ ಹವಾಮಾನದ ತೊಂದರೆಯಿಂದ ದಿನದಾಟಗಳು ರದ್ದಾಗುವುದು ಇದಕ್ಕೆ ಕಾರಣ.
ಇತ್ತೀಚಿನ ದಿನಗಳಲ್ಲಿ ಟೆಸ್ಟ್ ಕ್ರಿಕೆಟ್ನಲ್ಲಿ ಹೆಚ್ಚಿನ ರನ್, ಹೆಚ್ಚು ಹೆಚ್ಚು ಬೌಂಡರಿ-ಸಿಕ್ಸರ್ಗಳು ದಾಖಲಾಗುತ್ತಿವೆ. ಡಾಟ್ ಬಾಲ್ಗಳ ಸಂಖ್ಯೆಯಲ್ಲೂ ಇಳಿಮುಖವಾಗುತ್ತಿದೆ. ಇದು ಟೆಸ್ಟ್ ಪಂದ್ಯವನ್ನು ಹೆಚ್ಚು ಆಕರ್ಷಣೀಯವಾಗಿಸುತ್ತಿದೆ. 50 ಓವರ್ ಅಥವಾ 20 ಓವರ್ಗಳ ಪಂದ್ಯಗಳನ್ನೂ ಮೀರಿಸುವಂತಹ ರೋಚಕತೆಯನ್ನು ಟೆಸ್ಟ್ ಪಂದ್ಯಗಳು ತೆರೆದಿಡುತ್ತಿವೆ.
ಕಳೆದ ವಾರ ಜಗತ್ತಿನ ನಾನಾ ಭಾಗಗಳಲ್ಲಿ ಮೂರು ಟೆಸ್ಟ್ ಪಂದ್ಯಗಳು ನಡೆದವು ಮತ್ತು ಮೂರರಲ್ಲೂ ತವರು ತಂಡಗಳು ಗೆಲುವು ದಾಖಲಿಸಿದವು. ದಕ್ಷಿಣ ಆಫ್ರಿಕಾ ವಿರುದ್ಧ ಆಸ್ಪ್ರೇಲಿಯಾ 3ನೇ ಟೆಸ್ಟ್ನಲ್ಲಿ ಗೆಲುವು ಸಾಧಿಸಿ ಕಳೆದು ಹೋಗಿದ್ದ ಆತ್ಮವಿಶ್ವಾಸವನ್ನು ಮರಳಿ ಪಡೆಯುವ ಪ್ರಯತ್ನ ಮಾಡಿತು. ಪಾಕಿಸ್ತಾನ ತಂಡ ನ್ಯೂಜಿಲೆಂಡ್ ವಿರುದ್ಧ ಪಂದ್ಯದ ಕೊನೆಯ ದಿನ ಚಹಾ ವಿರಾಮದ ನಂತರ 9 ವಿಕೆಟ್ ಕಳೆದುಕೊಂಡು ಪಂದ್ಯ ಸೋತಿತು.