ತ್ರಿಕೋನ ಟಿ20 ಸರಣಿ; ಭಾರತೀಯ ವನಿತೆಯರಿಗೆ ಸತತ 2ನೇ ಸೋಲಿನ ಕಹಿ

ಮೆಲ್ಬೋರ್ನ್: ಬಹುನಿರೀಕ್ಷಿತ ಐಸಿಸಿ 2020 ಮಹಿಳಾ ಟ್ವೆಂಟಿ-20 ವಿಶ್ವಕಪ್‌ಗೂ ಪೂರ್ವಭಾವಿಯಾಗಿ ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ತ್ರಿಕೋನ ಟಿ20 ಸರಣಿಯಲ್ಲಿ ಭಾರತೀಯ ವನಿತೆಯರ ಬಳಗ ಸತತ ಎರಡನೇ ಸೋಲಿಗೆ ಶರಣಾಗಿದೆ.

ಇಂಗ್ಲೆಂಡ್ ಮಹಿಳೆಯರ ವಿರುದ್ಧ ಗೆಲುವಿನೊಂದಿಗೆ ಶುಭಾರಂಭ ಮಾಡಿರುವ ಭಾರತೀಯ ಮಹಿಳಾ ತಂಡವು ಬಳಿಕ ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ಸೋಲಿಗೆ ತುತ್ತಾಗಿತ್ತು. ಇದೀಗ ಇಂಗ್ಲೆಂಡ್ ವಿರುದ್ಧ ಪರಾಭವಗೊಳ್ಳುವುದರೊಂದಿಗೆ ಸತತ ಎರಡನೇ ಸೋಲನ್ನು ಎದುರಿಸಿದೆ.

ಟಾಸ್ ಸೋತು ಬ್ಯಾಟಿಂಗ್‌ಗಿಳಿಸಲ್ಪಟ್ಟ ಭಾರತೀಯ ಮಹಿಳಾ ತಂಡವು ಮಗದೊಮ್ಮೆ ಬ್ಯಾಟಿಂಗ್ ವೈಫಲ್ಯವನ್ನು ಅನುಭವಿಸಿತು. ಸ್ಮೃತಿ ಮಂಧಾನಾ (45) ಹಾಗೂ ಜೆಮಿಮಾ ರೊಡ್ರಿಗಸ್ (23) ಹೊರತುಪಡಿಸಿದರೆ ಇತರೆ ಯಾವ ಬ್ಯಾಟ್ಸ್‌ವುಮೆನ್‌ಗಳು ಹೋರಾಟ ಮನೋಭಾವವನ್ನು ತೋರಲೇ ಇಲ್ಲ. ಪರಿಣಾಮ ಆರು ವಿಕೆಟ್ ನಷ್ಟಕ್ಕೆ 123 ರನ್ ಗಳಿಸಲಷ್ಟೇ ಶಕ್ತವಾದರು.

ಅನಿಲ್ ಕುಂಬ್ಳೆ ಜೀವಮಾನ ಸಾಧನೆ; ಪಾಕ್ ವಿರುದ್ಧ 10 ವಿಕೆಟ್ ದಾಖಲೆ

ಆರಂಭಿಕ ಆಟಗಾರ್ತಿ ಸ್ಮೃತಿ ಮಂಧಾನಾ 40 ಎಸೆತಗಳಲ್ಲಿ ಏಳು ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 45 ರನ್ ಗಳಿಸಿದರು. ಇನ್ನುಳಿದಂತೆ ನಾಯಕಿ ಹರ್ಮನ್‌ಪ್ರೀತ್ ಕೌರ್ 14 ರನ್ ಗಳಿಸಿದರು. ಆಂಗ್ಲರ ಪರ ಅನ್ಯ ಶ್ರುಬ್‌ಸೋಲ್ ಮೂರು ಮತ್ತು ಕ್ಯಾಥರಿನ್ ಬ್ರಂಟ್ ಎರಡು ವಿಕೆಟ್ ಕಬಳಿಸಿದರು.

ಬಳಿಕ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್ ಒಂದು ಹಂತದಲ್ಲಿ 28ಕ್ಕೆ ಮೂರು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಆದರೆ ನತಾಲಿ ಸೀವೆರ್ ಆಕರ್ಷಕ ಅರ್ಧಶತಕದ (50) ನೆರವಿನಿಂದ ಇನ್ನು ಏಳು ಎಸೆತಗಳು ಬಾಕಿ ಉಳಿದಿರುವಂತೆಯೇ 18.5 ಓವರ್‌ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ ಗುರಿ ತಲುಪಿತು. 38 ಎಸೆತಗಳನ್ನು ಎದುರಿಸಿದ ನತಾಲಿ ಆರು ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ 50 ರನ್ ಗಳಿಸಿದರು. ಇವರಿಗೆ ನಾಯಕಿ ಹೀಥರ್ ನೈಟ್ (18) ಹಾಗೂ ಫ್ರಾನ್ ವಿಲ್ಸನ್ (20*) ಉತ್ತಮ ಸಾಥ್ ನೀಡಿದರು. ಭಾರತದ ಪರ ಮೂರು ವಿಕೆಟ್ ಪಡೆದ ರಾಜೇಶ್ವರಿ ಗಾಯಕ್ವಾಡ್ ಹೋರಾಟ ವ್ಯರ್ಥವೆನಿಸಿತು.

ಧೋನಿ ಬಗ್ಗೆ ಭಾವನಾತ್ಮಕ ಹೇಳಿಕೆ ನೀಡಿದ ಎಂಎಸ್‌ಕೆ ಪ್ರಸಾದ್

ಈ ಸೋಲಿನೊಂದಿಗೆ ಅಂಕಪಟ್ಟಿಯಲ್ಲಿ ಭಾರತ ಕೊನೆಯ ಸ್ಥಾನಕ್ಕಿಳಿದಿದೆ. ಅಲ್ಲದೆ ರನ್‌ರೇಟ್ ಕೂಡಾ ನೆಗೆಟಿವ್‌ನಲ್ಲಿದೆ. ಹಾಗಾಗಿ ಫೈನಲ್‌ಗೆ ತಲುಪಲು ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ನಡೆಯಲಿರುವ ಅಂತಿಮ ಪಂದ್ಯದಲ್ಲಿ ಬೃಹತ್ ಅಂತರದ ಗೆಲುವು ದಾಖಲಿಸಬೇಕಿದೆ.

ಅಂಕಪಟ್ಟಿ ಇಂತಿದೆ:
ಇಂಗ್ಲೆಂಡ್ ಮಹಿಳಾ ತಂಡ: ಪಂದ್ಯ: 3, ಗೆಲುವು: 2, ಸೋಲು: 1, ಅಂಕ: 4, ರನ್‌ರೇಟ್: +0.048
ಆಸ್ಟ್ರೇಲಿಯಾ ಮಹಿಳಾ ತಂಡ: ಪಂದ್ಯ: 2, ಗೆಲುವು: 1, ಸೋಲು: 1, ಅಂಕ: 2, ರನ್‌ರೇಟ್: +0.220
ಭಾರತ ಮಹಿಳಾ ತಂಡ: ಪಂದ್ಯ: 3, ಗೆಲುವು: 1, ಸೋಲು: 2, ಅಂಕ: 2, ರನ್‌ರೇಟ್: -0.184

ಪತಿಯನ್ನು ಕೆಣಕಿದ ಅಭಿಮಾನಿಗೆ ಖಡಕ್ ಜವಾಬ್ ನೀಡಿದ ಮಯಾಂತಿ