ವಿಂಡೀಸ್ ವಿರುದ್ಧ ಬಾಂಗ್ಲಾ ಗೆಲುವು; ಸರಣಿ ಸಮಬಲ

ಲೌಡರ್‌ಹಿಲ್: ನಾಯಕ ಶಕಿಬ್ ಅಲ್ ಹಸನ್ (60 ರನ್ ಮತ್ತು 19ಕ್ಕೆ 2 ವಿಕೆಟ್) ಆಲ್‌ರೌಂಡರ್ ಆಟ ಹಾಗೂ ತಮೀಮ್ ಇಕ್ಬಾಲ್ ಆಕರ್ಷಕ ಅರ್ಧಶತಕದ (74) ನೆರವಿನಿಂದ ಫ್ಲೋರಿಡಾದಲ್ಲಿ ವೆಸ್ಟ್‌ಇಂಡೀಸ್ ವಿರುದ್ಧ ನಡೆದ ಎರಡನೇ ಟ್ವೆಂಟಿ-20 ಪಂದ್ಯದಲ್ಲಿ ಬಾಂಗ್ಲಾದೇಶ 1-1ರ ಅಂತರದಲ್ಲಿ ಸಮಬಲಗೊಳಿಸಿದೆ.

ಈ ಮೂಲಕ ಮೂರು ಪಂದ್ಯಗಳ ಟ್ವೆಂಟಿ-20 ಸರಣಿಯಲ್ಲಿ 1-1ರ ಅಂತರದ ಸಮಬಲ ಸಾಧಿಸಿದೆ.

ಮೊದಲು ಬ್ಯಾಟಿಂಗ್ ನಡೆಸಿದ ಬಾಂಗ್ಲಾ ಐದು ವಿಕೆಟ್ ನಷ್ಟಕ್ಕೆ 171 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು. ಏಕದಿನ ಸರಣಿಯ ಅದ್ಭುತ ಫಾರ್ಮ್ ಟ್ವೆಂಟಿ-20ನಲ್ಲೂ ಮುಂದುವರಿಸಿರುವ ತಮೀಮ್ 44 ಎಸೆತಗಳಲ್ಲಿ 74 ರನ್ ಗಳಿಸಿದ್ದರು. ಇದರಲ್ಲಿ ಆರು ಬೌಂಡರಿ ಹಾಗೂ ನಾಲ್ಕು ಸಿಕ್ಸರ್‌ಗಳು ಸೇರಿದ್ದವು.

ಕೊನೆಯ ಹಂತದಲ್ಲಿ ಕೇವಲ 38 ಎಸೆತಗಳಲ್ಲಿ ಒಂಬತ್ತು ಬೌಂಡರಿ ಹಾಗೂ ಸಿಕ್ಸರ್ ನೆರವಿನಿಂದ ತಮೀತ್ 60 ರನ್ ಸಿಡಿಸಿದ್ದರು. ಬಳಿಕ ರನ್ ಬೆನ್ನತ್ತಿದ ವಿಂಡೀಸ್ ಆಂಡ್ರೆ ಫ್ಲೆಚರ್ (43) ಹಾಗೂ ರೊವ್‌ಮ್ಯಾನ್ ಪೊವೆಲ್ (43) ಹೋರಾಟದ ಹೊರತಾಗಿಯೂ ಒಂಬತ್ತು ವಿಕೆಟ್ ನಷ್ಟಕ್ಕೆ 159 ರನ್ ಗಳಿಸಲಷ್ಟೇ ಶಕ್ತವಾಯಿತು.

ಬಾಂಗ್ಲಾ ಪರ ಮುಸ್ತಾಫಿಜುರ್ ರೆಹ್ಮಾನ್ ಹಾಗೂ ನಜ್‌ಮುಲ್ ಇಸ್ಲಾಂ ತಲಾ ಮೂರು ಮತ್ತು ನಾಯಕ ಹಸನ್ ಎರಡು ವಿಕೆಟ್ ಕಿತ್ತು ಮಿಂಚಿದರು.

ಸರಣಿಯ ಕೊನೆಯ ಪಂದ್ಯ ಸೋಮವಾರದಂದು ಫ್ಲೋರಿಡಾದಲ್ಲೇ ನಡೆಯಲಿದೆ.