ಏಕದಿನ ಸ್ಪೆಷಲಿಸ್ಟ್‌ಗಳಿಗೆ ವಿಶ್ರಾಂತಿ ಪಡೆಯಲು ಸೂಚನೆ

ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ಏಕದಿನ ಸ್ಪೆಷಲಿಸ್ಟ್ ಆಟಗಾರರಲ್ಲಿ ವಿಶ್ರಾಂತಿ ತೆಗೆದುಕೊಳ್ಳುವಂತೆ ಟೀಮ್ ಇಂಡಿಯಾ ವ್ಯವಸ್ಥಾಪಕ ಮಂಡಳಿ ಸೂಚಿಸಿದೆ.

ಪ್ರಸ್ತುತ ರಣಜಿ ಟ್ರೋಫಿ ಸಾಗುತ್ತಿದ್ದು, ಇದರಲ್ಲಿ ಪಾಲ್ಗೊಳ್ಳದಂತೆ ಸೀಮಿತ ಓವರ್‌ಗಳ ಆಟಗಾರರಿಗೆ ಸೂಚನೆ ನೀಡಲಾಗಿದೆ. ಈ ಮೂಲಕ ಆಟಗಾರರ ಇಕ್ಕಟ್ಟಿನ ವೇಳಾಪಟ್ಟಿ ಬಗ್ಗೆ ಗಂಭೀರವಾದ ಅವಲೋಕನ ನಡೆಸಿದೆ.

ಸದ್ಯ ಟೆಸ್ಟ್ ತಂಡದಿಂದ ದೂರವಿರುವ ಯಜುವೇಂದ್ರ ಚಹಲ್, ಜಸ್ಪ್ರೀತ್ ಬುಮ್ರಾ, ಅಕ್ಷರ್ ಪಟೇಲ್, ಹಾರ್ದಿಕ್ ಪಾಂಡ್ಯ, ಕೇದರ್ ಜಾಧವ್, ದಿನೇಶ್ ಕಾರ್ತಿಕ್ ಸೇರಿದ ಆಟಗಾರರು ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ (ಎನ್‌ಸಿಎ) ದೈಹಿಕ ತರಬೇತಿಯಲ್ಲಿ ತೊಡಗಿಸಿಕೊಂಡಿದ್ದಾರೆ.

ಈ ಪೈಕಿ ಪಾಂಡ್ಯ ವಿಶ್ರಾಂತಿಯನ್ನು ಕೇಳಿ ಪಡೆದಿದ್ದಲ್ಲಿ ಇತರ ಆಟಗಾರರಿಗೆ ರಣಜಿಯಲ್ಲಿ ಭಾಗವಹಿಸದಂತೆ ಹೇಳಲಾಗಿದೆ. ಹರಿಯಾಣ ಪರ ರಣಜಿ ಆಡಲು ಚಹಲ್ ಉತ್ಸುಕತೆ ತೋರಿದ್ದರೂ ಇದಕ್ಕೆ ಟೀಮ್ ಮ್ಯಾನೇಜ್‌ಮೆಂಟ್ ಕಡಿವಾಣ ಹಾಕಿದೆ.

ಯಾವುದೇ ಗಾಯದ ಸಮಸ್ಯೆಯನ್ನು ತಪ್ಪಿಸುವುದು ಅಥವಾ ಹೆಚ್ಚುವರಿ ಕೆಲಸದೊತ್ತಡವನ್ನು ಕಡಿಮೆ ಮಾಡುವ ಇರಾದೆಯನ್ನು ಟೀಮ್ ಮ್ಯಾನೇಜ್‌ಮೆಂಟ್ ಹೊಂದಿದೆ.

ಅಂದ ಹಾಗೆ ಟೆಸ್ಟ್ ಸರಣಿ ಬೆನ್ನಲ್ಲೇ ಲಂಕಾ ವಿರುದ್ಧ ತಲಾ ಮೂರು ಏಕದಿನ ಹಾಗೂ ಟ್ವೆಂಟಿ-20 ಸರಣಿಯಲ್ಲಿ ಟೀಮ್ ಇಂಡಿಯಾ ಭಾಗವಹಿಸಲಿದೆ. ಈ ವೇಳೆ ಏಕದಿನ ಸ್ಪೆಷಲಿಸ್ಟ್‌ಗಳು ತಂಡವನ್ನು ಸೇರಿಕೊಳ್ಳಲಿದ್ದಾರೆ.