ಅತಿ ದೊಡ್ಡ ಕರ್ತವ್ಯ ನಿಭಾಯಿಸಿದ ವಿರಾಟ್ ಕೊಹ್ಲಿ

ಹೊಸದಿಲ್ಲಿ: ವಿಶ್ವದ ಅತಿ ದೊಡ್ಡ ಪ್ರಜಾಪ್ರಭುತ್ವ ರಾಷ್ಟ್ರ ಭಾರತದಲ್ಲಿ 18 ವರ್ಷ ದಾಟಿದ ಪ್ರತಿಯೊಬ್ಬರು ಮತದಾನ ಹಕ್ಕು ಚಲಾಯಿಸುವುದು ಬಹುದೊಡ್ಡ ಕರ್ತವ್ಯವಾಗಿದೆ.

ಇದೀಗ ಜೀವನದ ಅತಿ ದೊಡ್ಡ ಕರ್ತವ್ಯವಾದ ಮತದಾನ ಹಕ್ಕು ನಿರ್ವಹಿಸುವ ಮೂಲಕ ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಎಲ್ಲರಿಗೂ ಮಾದರಿಯಾಗಿದ್ದಾರೆ.

ಲೋಕಸಭಾ ಚುನಾವಣೆ 2019ರ ಅಂಗವಾಗಿ ನಡೆದ ಆರನೇ ಹಂತದ ಚುನಾವಣೆಯಲ್ಲಿ ಹೊಸದಿಲ್ಲಿಯಿಂದ ವಿರಾಟ್ ಕೊಹ್ಲಿ ಮತದಾನ ಮಾಡಿದ್ದಾರೆ.

ಬೆಳಗ್ಗೆಯೇ ಗುರ್ಗಾಂತ್ ಮತಗಟ್ಟೆಗೆ ತೆರಳಿ ಸರದಿ ಸಾಲಿನಲ್ಲಿ ನಿಂತು ವಿರಾಟ್ ಕೊಹ್ಲಿ ಮತದಾನ ಮಾಡಿದ್ದಾರೆ. ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಷಯವನ್ನು ಹಂಚಿಕೊಳ್ಳುವ ಮೂಲಕ ಎಲ್ಲರಿಗೂ ಪ್ರೇರಣೆಯಾಗಿದ್ದಾರೆ.

ವಿರಾಟ್ ತಮ್ಮ ಸಂದೇಶದಲ್ಲಿ ಉತ್ತಮ ರಾಷ್ಟ್ರದ ನಿರ್ಮಾಣಕ್ಕಾಗಿ ಮತದಾನ ಮಾಡುವುದು ಪ್ರತಿಯೊಬ್ಬನ ಹಕ್ಕು ಹಾಗೂ ಜವಾಬ್ದಾರಿಯಾಗಿದೆ ಎಂದಿದ್ದಾರೆ.

ಮತದಾನ ಮಾಡಿದಾಗಲೂ ಅಭಿಮಾನಿಗಳ ಕಾಟ ವಿರಾಟ್‌ಗೆ ತಪ್ಪಿದ್ದಲ್ಲ. ಅಂತಿಮವಾಗಿ ಆಟೋಗ್ರಾಫ್ ನೀಡುವ ಮೂಲಕ ಗಮನ ಸೆಳೆದರು.