ವಿಶ್ವಕಪ್ ಗುರಿ; ವಿರಾಟ್‌ಗೆ ಮತ್ತಷ್ಟು ವಿಶ್ರಾಂತಿ ಸಾಧ್ಯತೆ!

ಹೊಸದಿಲ್ಲಿ: ಮುಂಬರುವ ವಿಶ್ವಕಪ್ ದೃಷ್ಟಿಕೋನದಲ್ಲಿಟ್ಟುಕೊಂಡು ಗರಿಷ್ಠ ಫಿಟ್ನೆಸ್ ಮಟ್ಟವನ್ನು ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಟೀಮ್ ಇಂಡಿಯಾ ಅಗ್ರ ಆಟಗಾರರಿಗೆ ಮತ್ತಷ್ಟು ವಿಶ್ರಾಂತಿ ಸೂಚಿಸುವ ಸಾಧ್ಯತೆಗಳಿವೆ.

ಇದರಂತೆ ನಾಯಕ ವಿರಾಟ್ ಕೊಹ್ಲಿ ಅವರಿಗೆ ಮುಂಬರುವ ಸರಣಿಗಳಲ್ಲಿ ಮತ್ತಷ್ಟು ವಿಶ್ರಾಂತಿ ದೊರಕುವ ಸಾಧ್ಯತೆಯಿದೆ.

ಮುಂದಿನ ವರ್ಷ ಇಂಗ್ಲೆಂಡ್‌ನಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್‌ಗೆ ಇನ್ನು ಬೆರಳಣಿಕೆಯಷ್ಟು ತಿಂಗಳುಗಳು ಮಾತ್ರ ಬಾಕಿ ಉಳಿದಿದೆ. ಈ ಹಿನ್ನಲೆಯಲ್ಲಿ ನಾಯಕ ವಿರಾಟ್ ಕೊಹ್ಲಿ ಯಾವುದೇ ರೀತಿಯ ದಣಿವು ಅಥವಾ ಫಿಟ್ನೆಸ್ ಸಮಸ್ಯೆಗೆ ಒಳಗಾಗುವುದನ್ನು ಬಿಸಿಸಿಐ ಬಯಸುತ್ತಿಲ್ಲ.

ವಿಶ್ವಕಪ್ ಗಮನದಲ್ಲಿಟ್ಟುಕೊಂಡು ಅಗ್ರ ಆಟಗಾರರನ್ನು ರೋಟೆಷನ್ ಪದ್ಧತಿಗೆ ಒಳಪಡಿಸಲು ಬಿಸಿಸಿಐ ಯೋಜನೆ ರೂಪಿಸುತ್ತಿದೆ. ಇದರಂಗವಾಗಿ ವಿರಾಟ್ ಜೊತೆಗೆ ಅಗ್ರ ಬೌಲರ್‌ಗಳಾದ ಭುವನೇಶ್ವರ್ ಕುಮಾರ್ ಹಾಗೂ ಜಸ್ಪ್ರೀತ್ ಬುಮ್ರಾ ಅವರಿಗೂ ವಿಶ್ರಾಂತಿ ದೊರಕಲಿದೆ.

ಈಗಾಗಲೇ ಏಷ್ಯಾ ಕಪ್‌ನಿಂದ ನಾಯಕ ಕೊಹ್ಲಿ ಹೊರಗುಳಿದಿದ್ದರು. ಹಾಗೆಯೇ ಭುವಿ ಹಾಗೂ ಬುಮ್ರಾ ಅವರನ್ನು ವಿಂಡೀಸ್ ಸರಣಿಗೆ ಪರಿಗಣಿಸಲಾಗಿಲ್ಲ.

ಪ್ರತಿಷ್ಠಿತ ವಿಶ್ವಕಪ್ ಮುಂದಿನ ವರ್ಷ ಮೇ 30ರಿಂದ ಜುಲೈ 14ರ ವರೆಗೆ ಇಂಗ್ಲೆಂಡ್‌ನಲ್ಲಿ ಆಯೋಜನೆಯಾಗಲಿದೆ. ವಿಶ್ವಕಪ್‌ಗೂ ಮೊದಲು ಭಾರತ ತಂಡವು ಮಹತ್ವದ ಆಸ್ಟ್ರೇಲಿಯಾ ಹಾಗೂ ನ್ಯೂಜಿಲೆಂಡ್ ಪ್ರವಾಸವನ್ನು ಕೈಗೊಳ್ಳಲಿದೆ.

ಬಳಿಕ ತವರಿನಲ್ಲಿ ಆಸ್ಟ್ರೇಲಿಯಾ ಹಾಗೂ ಜಿಂಬಾಬ್ವೆ ವಿರುದ್ಧ ಸರಣಿಗಳಲ್ಲಿ ಭಾಗವಹಿಸಲಿದೆ. ವಿಶ್ವಕಪ್‌ಗೂ ಮೊದಲು ಟೀಮ್ ಇಂಡಿಯಾ ಆಟಗಾರರು ವಿಶ್ವದ ಶ್ರೀಮಂತ ಕ್ರಿಕೆಟ್ ಲೀಗ್ ಐಪಿಎಲ್‌ನಲ್ಲೂ ಕಾಣಿಸಿಕೊಳ್ಳಲಿದ್ದಾರೆ. ಈ ಹಿನ್ನೆಲೆಯಲ್ಲಿ ಆಯ್ಕೆ ಸಮಿತಿ ಎಚ್ಚರಿಕೆಯ ನಡೆ ವಹಿಸುತ್ತಿದೆ.