India vs Australia: ಭಾರತದ ಟೆಸ್ಟ್ ನಂ.1 ಪಟ್ಟಕ್ಕೆ ಆಸೀಸ್‌ನಿಂದ ಅಪಾಯ!

ದುಬೈ: ಮುಂಬರುವ ಆಸ್ಟ್ರೇಲಿಯಾ ವಿರುದ್ಧ ನಡೆಯಲಿರುವ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾದ ನಂ.1 ಸ್ಥಾನಕ್ಕೆ ಕಂಟಕ ಎದುರಾಗಲಿದೆ.

ಒಂದು ವೇಳೆ ಎಲ್ಲ ನಾಲ್ಕು ಪಂದ್ಯಗಳ ಸರಣಿಯಲ್ಲಿ 0-4 ಅಂತರದ ವೈಟ್‌ವಾಶ್ ಸೋಲು ಎದುರಿಸಿದರೆ ಟೆಸ್ಟ್ ರ‍್ಯಾಂಕಿಂಗ್‌ನಲ್ಲಿ ಅಗ್ರಸ್ಥಾನ ನಷ್ಟವಾಗಲಿದೆ. ಅಂದರೆ ಪ್ರಸ್ತುತ ನಾಲ್ಕನೇ ಸ್ಥಾನದಲ್ಲಿರುವ ಆಸೀಸ್ ಅಗ್ರಸ್ಥಾನವನ್ನು ಭಾರತದಿಂದ ಕಸಿದುಕೊಳ್ಳಲಿದೆ.

ಇನ್ನೊಂದು ವೇಳೆ ಕನಿಷ್ಠ ಒಂದು ಪಂದ್ಯವನ್ನು ಡ್ರಾ ಮಾಡುವಲ್ಲಿ ಯಶಸ್ವಿಯಾದ್ದಲ್ಲಿ ನಂ.1 ಪಟ್ಟ ಭಾರತದ ಬಳಿಯೇ ಉಳಿದುಕೊಳ್ಳಲಿದೆ ಎಂದು ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಬಿಡುಗಡೆ ಮಾಡಿರುವ ಪ್ರಕಟಣೆಯಲ್ಲಿ ತಿಳಿಸಿದೆ.

ಸದ್ಯದ ರ‍್ಯಾಂಕಿಂಗ್ ಪಟ್ಟಿಯಂತೆ ಅಗ್ರಸ್ಥಾನದಲ್ಲಿರುವ ಭಾರತ 116 ಹಾಗೂ ಆಸ್ಟ್ರೇಲಿಯಾ 102 ಅಂಕಗಳನ್ನು ಹೊಂದಿದೆ.

ಆಸೀಸ್ 3-0 ಅಂತರದಲ್ಲಿ ಸರಣಿ ಗೆದ್ದರೂ ಭಾರತಕ್ಕಿಂತ ಒಂದು ಅಂಕಗಳಷ್ಟು ಹಿನ್ನಡೆಯಾಗಲಿದೆ. ಅಂತಹ ಪರಿಸ್ಥಿತಿಯಲ್ಲಿ 109 ಅಂಕಗಳೊಂದಿಗೆ ಭಾರತವೇ ಅಗ್ರಸ್ಥಾನ ಉಳಿಸಿಕೊಳ್ಳಲಿದೆ.

ಇನ್ನು ಬ್ಯಾಟಿಂಗ್ ಶ್ರೇಯಾಂಕ ಪಟ್ಟಿಯಲ್ಲಿ ನಾಯಕ ವಿರಾಟ್ ಕೊಹ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿದ್ದಾರೆ.