ಟೀಮ್‌ ಇಂಡಿಯಾದ ಸೂಪರ್‌ಫ್ಯಾನ್‌ ಚಾರುಲತಾ ಅಜ್ಜಿ ಇನ್ನಿಲ್ಲ!

ಹೊಸದಿಲ್ಲಿ: ಕಳೆದ ವರ್ಷ ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಆತಿಥ್ಯದಲ್ಲಿ ನಡೆದ ಏಕದಿನ ಕ್ರಿಕೆಟ್‌ ವಿಶ್ವಕಪ್‌ ಟೂರ್ನಿ ವೇಳೆ ಇಳಿ ವಯಸ್ಸಿನಲ್ಲೂ ತುತ್ತೂರಿ ಊದುತ್ತಾ ಭಾರತ ತಂಡದ ಆಟಗಾರರನ್ನು ಹುರಿದುಂಬಿಸಿ ಕ್ರಿಕೆಟ್‌ ಅಭಿಮಾನಿಗಳ ಮನ ಗೆದ್ದಿದ್ದ, ಟೀಮ್‌ ಇಂಡಿಯಾದ ಸೂಪರ್‌ ಫ್ಯಾನ್‌ ಚಾರುಲತಾ ಪಟೇಲ್‌ (87) ಅಜ್ಜಿ ಇಹಲೋಕ ತ್ಯಜಿಸಿದ್ದಾರೆ.

ಅವರ ಅಧಿಕೃತ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ನೀಡಲಾಗಿರುವ ಮಾಹಿತಿ ಅನುಗುಣವಾಗಿ ಇಳಿ ವಯಸ್ಸಿನ ಟೀಮ್‌ ಇಂಡಿಯಾ ಅಭಿಮಾನಿ ಜ.13ರಂದು ಕೊನೆಯುಸಿರೆಳೆದಿದ್ದಾರೆ. ಈ ಬಗ್ಗೆ ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ತನ್ನ ಅಧಿಕೃತ ಟ್ವಿಟರ್‌ ಖಾತೆ ಮೂಲಕ ಸಂತಾಪ ಸೂಚಿಸಿದೆ.

"ಟೀಮ್‌ ಇಂಡಿಯಾದ ಸೂಪರ್‌ ಫ್ಯಾನ್‌ ಚಾರುಲತಾ ಪಟೇಲ್‌ ಜೀ ಅವರು ಸದಾ ನಮ್ಮ ಮನದಲ್ಲಿ ನೆಲೆಸಿರಲಿದ್ದಾರೆ. ಕ್ರಿಕೆಟ್‌ ಕಡೆಗಿನ ಅವರ ಅಪಾರ ಒಲವು ಹೀಗೇ ಮುಂದುವರಿಯಲಿದೆ. ಅವರ ಆತ್ಮಕ್ಕೆ ಶಾಂತಿ ಸಿಗಲಿ," ಎಂದು ಬಿಸಿಸಿಐ ತನ್ನ ಟ್ವೀಟ್‌ ಮೂಲಕ ಅಭಿಮಾನಿಗಳೊಟ್ಟಿಗೆ ಈ ವಿಚಾರವನ್ನು ಹಂಚಿಕೊಂಡಿದೆ.


ಕಳೆದ ವರ್ಷ ನಡೆದ ವಿಶ್ವಕಪ್‌ ಟೂರ್ನಿಯಲ್ಲಿ ಭಾರತ ಮತ್ತು ಬಾಂಗ್ಲಾದೇಶ ನಡುವಣ ಗ್ರೂಪ್‌ ಹಂತದ ರೌಂಡ್‌ ರಾಬಿನ್‌ ಪಂದ್ಯವನ್ನು ವೀಕ್ಷಿಸಲುವ ಸಲುವಾಗಿ ಬರ್ಮಿಂಗ್‌ಹ್ಯಾಮ್‌ನ ಎಡ್‌ಬಾಸ್ಟನ್‌ ಕ್ರೀಡಾಂಗಣಕ್ಕೆ ತೆರಳಿದ್ದ ಚಾರುಲತಾ ಪಟೇಲ್‌ ದಿನವಿಡೀ ಭಾರತ ತಂಡವನ್ನು ಹುರಿದುಂಬಿಸುವ ಮೂಲಕ ಎಲ್ಲರ ಗಮನ ಸೆಳೆದಿದ್ದರು.

ಟೀಮ್‌ ಇಂಡಿಯಾ ವಿರುದ್ಧದ 5 ಪಂದ್ಯಗಳ ಟಿ20 ಕ್ರಿಕೆಟ್‌ ಸರಣಿಗೆ ನ್ಯೂಜಿಲೆಂಡ್‌ ತಂಡ ಪ್ರಕಟ

ಭಾರತ ತಂಡದ ಪ್ರತಿ ಫೋರ್‌, ಸಿಕ್ಸರ್‌ ಮತ್ತು ವಿಕೆಟ್‌ಗಳಿಗೆ ಚಿಕ್ಕ ಮಕ್ಕಳ ಹಾಗೆ ತುತ್ತೂರಿ ಊದಿ ಸಂಭ್ರಮಿಸುತ್ತಿದ್ದ ಚಾರುಲತಾ, ಎಡ್‌ಬಾಸ್ಟನ್‌ ಅಂಗಣದಲ್ಲಿ ತಿರಂಗ ಹಾರಿಸಿ ಕಂಗೊಳಿಸಿದ್ದರು. ಪಂದ್ಯದಲ್ಲಿ ಭಾರತ ತಂಡ 28 ರನ್‌ಗಳ ಜಯ ದಾಖಲಿಸಿ ನಾಕ್‌ಔಟ್‌ ಹಂತಕ್ಕೆ ತೇರ್ಗಡೆಯಾಗಿತ್ತು. ಟೀಮ್‌ ಇಂಡಿಯಾದ ನಾಯಕ ವಿರಾಟ್‌ ಕೊಹ್ಲಿ ಮತ್ತು ಉಪನಾಯಕ ರೋಹಿತ್‌ ಶರ್ಮಾ ಪಂದ್ಯದ ಬಳಿಕ ಚಾರುಲತಾ ಅವರನ್ನು ಭೇಟಿ ಮಾಡಿ ಆಶೀರ್ವಾದ ಪಡೆದಿದ್ದರು.

ಐಸಿಸಿ 2019 ವರ್ಷದ ಟೆಸ್ಟ್ ಹಾಗೂ ಏಕದಿನ ತಂಡಕ್ಕೆ ಕಿಂಗ್ ಕೊಹ್ಲಿ ಕ್ಯಾಪ್ಟನ್

ಜುಲೈ 14ರಂದು ವಿಶ್ವಕಪ್‌ ಫೈನಲ್‌ ಪಂದ್ಯದಲ್ಲಿ ಭಾರತ ತಂಡ ಪ್ರಶಸ್ತಿ ಗೆಲ್ಲುವುದನ್ನು ನೋಡಬೇಕು ಎಂದು ಚಾರುಲತಾ ಬಯಸ್ಸಿದ್ದರಾದರೂ, ಸೆಮಿಫೈನಲ್‌ ಹಂತದಲ್ಲಿ ಟೀಮ್‌ ಇಂಡಿಯಾ ಅಚ್ಚರಿಯ ರೀತಿಯಲ್ಲಿ ನ್ಯೂಜಿಲೆಂಡ್‌ ವಿರುದ್ಧ ಸೋಲೊಪ್ಪಿಕೊಂಡಿತ್ತು.