20 ವರ್ಷ ಕಳೆದರೂ ಕೊಹ್ಲಿ-ರೋಹಿತ್ ಭಿನ್ನಭಿಪ್ರಾಯ ಕಥೆಗಳು ನಿಲ್ಲಲ್ಲ: ಗವಾಸ್ಕರ್

ಹೊಸದಿಲ್ಲಿ: ಏಕದಿನ ವಿಶ್ವಕಪ್ ಸೋಲಿನ ಬೆನ್ನಲ್ಲೇ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಹಾಗೂ ಉಪನಾಯಕ ರೋಹಿತ್ ಶರ್ಮಾ ನಡುವೆ ಎಲ್ಲವೂ ಸರಿಯಲ್ಲ ಎಂಬ ವದಂತಿ ಹಬ್ಬಿತ್ತು. ವೆಸ್ಟ್‌ಇಂಡೀಸ್ ಸರಣಿಗೂ ಮುನ್ನ ತಮ್ಮಿಬ್ಬರ ಮಧ್ಯೆ ಯಾವುದೇ ತರಹದ ವೈಮನಸ್ಸಿಲ್ಲ ಎಂಬುದನ್ನು ಹೇಳುವ ಮೂಲಕ ನಾಯಕ ಕೊಹ್ಲಿ ವಿವಾದಕ್ಕೆ ತೆರೆ ಎಳೆದಿದ್ದರು.

ಇದೀಗ ವಿಶ್ವಕಪ್ ಬಳಿಕ ಯಾವುದೇ ಪುನರ್ ವಿಮರ್ಶೆಯಿಲ್ಲದೆ ನಾಯಕರಾಗಿ ಕೊಹ್ಲಿ ಅವರನ್ನೇ ಮುಂದುವರಿಸಿರುವ ಕ್ರಮವನ್ನು ಖಂಡಿಸಿರುವ ಮಾಜಿ ಬ್ಯಾಟಿಂಗ್ ದಿಗ್ಗಜ ಸುನಿಲ್ ಗವಾಸ್ಕರ್, 20 ವರ್ಷ ಕಳೆದರೂ ರೋಹಿತ್ ಹಾಗೂ ವಿರಾಟ್ ನಡುವಣ ಭಿನ್ನಭಿಪ್ರಾಯ ಕಥೆಗಳು ನಿಲ್ಲಲ್ಲ ಎಂದು ಹೇಳಿದ್ದಾರೆ.

ವಿರಾಟ್ ಹಾಗೂ ರೋಹಿತ್ ಎಷ್ಟೇ ಕಿರುಚಾಡಿದರೂ ಕಥೆಗಳು ಇಲ್ಲಿಗೆ ಮುಗಿಯುವುದಿಲ್ಲ. ಪ್ರತಿ ಬಾರಿಯೂ ರೋಹಿತ್ ಪೇಲ್ ಆದಾಗ ಉದ್ದೇಶಪೂರ್ವಕವಾಗಿಯೇ ಔಟ್ ಆಗಿದ್ದಾರೆ ಎಂಬ ಆರೋಪ ಕೇಳಿಬರಲಿದೆ ಎಂದಿದ್ದಾರೆ.

ಇಂತಹ ಕಟ್ಟುಕಥೆಗಳನ್ನು ಆರಂಭಿಸಿದವರು ಖಂಡಿತವಾಗಿಯೂ ಭಾರತೀಯ ಕ್ರಿಕೆಟ್‌ನ ಹಿತೈಷಿಗಳಲ್ಲ. ಮೀಡಿಯಾಗಳು ಇದಕ್ಕೆ ತುಪ್ಪ ಸುರಿಯುತ್ತಿದೆ ಎಂದು ಗವಾಸ್ಕರ್ ಕಿಡಿ ಕಾರಿದ್ದಾರೆ.