ಅಂದಿನ ಈ ದಿನ; ಕೊಹ್ಲಿ ಮುಂದಾಳತ್ವದಲ್ಲಿ ಭಾರತಕ್ಕೆ ಅಂಡರ್-19 ವಿಶ್ವಕಪ್

ಹೊಸದಿಲ್ಲಿ: ಇತಿಹಾಸದತ್ತ ತಿರುಗಿ ನೋಡಿದಾಗ ಅಂದಿನ ಇದೇ ದಿನದಲ್ಲಿ (2008 ಮಾರ್ಚ್ 2) ವಿರಾಟ್ ಕೊಹ್ಲಿ ಮುಂದಾಳತ್ವದಲ್ಲಿ ಭಾರತ ಅಂಡರ್ 19 ಕ್ರಿಕೆಟ್ ತಂಡವು ಕಿರಿಯರ ವಿಶ್ವಕಪ್ ಜಯಿಸಿತ್ತು.

ತದಾ ಬಳಿಕ ನಡೆದಿದ್ದೆಲ್ಲ ಇತಿಹಾಸವಾಗಿದ್ದು, ಕಿಂಗ್ ಕೊಹ್ಲಿ ದಾಖಲೆಗಳ ಮೇಲೆ ದಾಖಲೆಗಳನ್ನು ಬರೆಯುತ್ತಲೇ ಸಾಗುತ್ತಿದ್ದಾರೆ.

ಅಂದು ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಮಳೆ ಬಾಧಿತ ಫೈನಲ್ ಪಂದ್ಯದಲ್ಲಿ ಭಾರತ ತಂಡವು ಡಕ್ವರ್ತ್ ಲೂವಿಸ್ ನಿಯಮದಡಿಯಲ್ಲಿ 12 ರನ್‌ಗಳ ಅಂತರದ ರೋಚಕ ಗೆಲುವು ದಾಖಲಿಸಿತ್ತು.

ಪ್ರಸ್ತುತ ಕ್ಷಣವನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿಯು ತನ್ನ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದೆ. ಈ ಮೂಲಕ 19ರ ವಯೋಮಾನದ ಆಟಗಾರರಿಗೂ ವಿಶ್ವಕಪ್ ಆಯೋಜನೆಯು ಎಷ್ಟೊಂದು ಮಹತ್ವ ವಹಿಸಿಕೊಳ್ಳುತ್ತದೆ ಎಂಬುದು ತಿಳಿದು ಬರುತ್ತದೆ.

ವಿರಾಟ್ ಕೊಹ್ಲಿ ಹೊರತಾಗಿ ರವೀಂದ್ರ ಜಡೇಜಾ, ಮನೀಶ್ ಪಾಂಡೆ, ಅಭಿನವ್ ಮುಕಂದ್, ಸೌರಭ್ ತಿವಾರಿ, ಸಿದ್ದಾರ್ಥ್ ಕೌಲ್ ಹಾಗೂ ಇಕ್ಬಾಲ್ ಅಬ್ದುಲ್ಲಾ 2008ರ ವಿಶ್ವಕಪ್ ವಿಜೇತ ತಂಡದ ಸದಸ್ಯರಾಗಿದ್ದರು. ಈ ಪೈಕಿ ಇಕ್ಬಾಲ್ ಹೊರತಾಗಿ ಇತರೆಲ್ಲರು ಭಾರತೀಯ ಕ್ಯಾಪ್ ಧರಿಸಿದ್ದಾರೆ.

ಇನ್ನು ಕೊಹ್ಲಿ ಜತೆಗೆ ಮೊಹಮ್ಮದ್ ಕೈಫ್ (2000), ಉನ್ಮುಕ್ತ್ ಚಾಂದ್ (2012) ಹಾಗೂ ಪೃಥ್ವಿ ಶಾ (2018) ಭಾರತದ ಅಂಡರ್-19 ವಿಶ್ವಕಪ್ ವಿಜೇತ ನಾಯಕರಾಗಿದ್ದಾರೆ.