ಟೆಸ್ಟ್‌ ಪಂದ್ಯಕ್ಕೆ 'ಕ್ರಿಕೆಟ್‌ ದೇವರು' ಸಚಿನ್ ಮುನ್ನುಡಿ ಬರೆದ ದಿನ ಇದು

ಹೊಸದಿಲ್ಲಿ: 29 ವರ್ಷಗಳ ಹಿಂದೆ ಇದೇ ದಿನದಂದು 16ರ ಹರೆಯದ ಬಾಲಕನೊಬ್ಬ ಪಾಕಿಸ್ತಾನದ ವಿರುದ್ಧ ತೊಡೆತಟ್ಟಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಮುನ್ನುಡಿ ಬರೆದ ದಿನ.

ಹೌದು! ಅಂದು 1989 ನವೆಂಬರ್‌ 15 ಕ್ರಿಕೆಟ್‌ ದೇವರು ಎಂದು ಖ್ಯಾತರಾಗಿರುವ ಸಚಿನ್‌ ತೆಂಡುಲ್ಕರ್‌ ಕರಾಚಿಯಲ್ಲಿ ನಡೆದ ಇಂಡೋ-ಪಾಕ್‌ ಟೆಸ್ಟ್‌ ಪಂದ್ಯದಲ್ಲಿ ಆರನೇ ಕ್ರಮಾಂಕದಲ್ಲಿ ಕ್ರೀಸಿಗಿಳಿದ ದಿನ. ಪಾಕಿಸ್ತಾನದ ಮೊದಲ ಇನ್ನಿಂಗ್ಸ್‌ನ 409 ರನ್‌ಗಳಿಗೆ ಪ್ರತ್ಯುತ್ತರ ನೀಡಲು ಮುಂದಾದ ಭಾರತ 44 ರನ್‌ಗೆ ಆರು ವಿಕೆಟ್‌ ಕಳೆದುಕೊಂಡಿತ್ತು. ಈ ವೇಳೆ ಕ್ರೀಸ್‌ಗಿಳಿದ ಸಚಿನ್‌ ಎರಡು ಬೌಂಡರಿಗಳನ್ನು ಬಾರಿಸಿ ಪಾಕ್‌ ವಿರುದ್ಧ 15 ರನ್‌ ಕಲೆ ಹಾಕಿದ್ದರು.

ನಂತರ ನಡೆದಿದ್ದೆಲ್ಲಾ ಇತಿಹಾಸ. 24 ವರ್ಷಗಳ ಸುದೀರ್ಘ ವೃತ್ತಿಜೀವನ ನಡೆಸಿಕೊಂಡು ಬಂದಿದ್ದ ಸಚಿನ್‌ ಮುಂದೊಂದು ದಿನ ಅವರು ಕ್ರಿಕೆಟ್ ಜಗತ್ತಿನ ದೇವರಾದರು.

ಆ ದಿನದ ಪಂದ್ಯದಲ್ಲಿ ಸಚಿನ್‌ನಂತೆಯೇ ಪಾಕಿಸ್ತಾದ ಮತ್ತೋರ್ವ ಲೆಜೆಂಡರಿ ಆಟಗಾರ ವಕಾರ್‌ ಯೂನಿಸ್‌ಗೂ ಕೂಡಾ ಇದೇ ಚೊಚ್ಚಲ ಪಂದ್ಯವಾಗಿತ್ತು. ಹೀಗಾಗಿ ಅವರೂ ಕೂಡಾ ಮಾರಕವಾಗಿಯೇ ಚೆಂಡೆಸೆಯುತ್ತಿದ್ದರು. ಕೊನೆಗೂ 15 ರನ್ ಗಳಿಸಿದ್ದ ಸಚಿನ್‌ ವಿಕೆಟ್‌ನ್ನು ವಕಾರ್‌ ಕಬಳಿಸಿದ್ದರು.

ಸಚಿನ್‌ ಜತೆ ಮತ್ತೋರ್ವ ಆಟಗಾರ ಬೌಲರ್‌ ಸಲೀಲ್‌ ಆಂಕೋಲಗೂ ಇದೇ ಮೊದಲ ಪಂದ್ಯವಾಗಿತ್ತು. ಆದರೆ ಇವರಿಗೆ ಅವಕಾಶಗಳು ಕಡಿಮೆಯಾದ ಕಾರಣ, ಕಲಾ ಕ್ಷೇತ್ರಕ್ಕೆ ಕಾಲಿಟ್ಟ ಸಲಿಲ್‌ ಅಲ್ಲಿ ಫೇಮಸ್‌ ಆಗಿದ್ದಾರೆ.

ಇನ್ನು ಪಾಕಿಸ್ತಾನದಲ್ಲೂ ಇದೇ ದಿನ ವಕಾರ್ ಜತೆಗೆ ಮತ್ತೋರ್ವ ವ್ಯಕ್ತಿ ಶಹೀದ್‌ ಸಯೀದ್‌ ಕೂಡಾ ತಮ್ಮ ಕ್ರಿಕೆಟ್‌ ವೃತ್ತಿಯ ಮೊದಲ ಪಂದ್ಯವನ್ನು ಆಡುತ್ತಿದ್ದರು. ಟೆಸ್ಟ್‌ನಲ್ಲಿ ಇವರಿಗೆ ಸ್ಥಾನ ಕಡಿಮೆಯಾಗುತ್ತಾ ಬಂದಿತ್ತು. ಆದರೆ ಶಹೀದ್‌ ಪಾಕಿಸ್ತಾನ ಪರ 10 ಏಕದಿನ ಪಂದ್ಯ ಆಡಿದ್ದಾರೆ.

ಇದೇ ದಿನ ಕಪಿಲ್‌ ದೇವ್‌ ತಮ್ಮ 100ನೇ ಟೆಸ್ಟ್‌ ಪಂದ್ಯವನ್ನು ಆಡಿದ್ದರು. ಜತೆಯಲ್ಲಿಯೇ ಇವರಿಗೆ ಪಂದ್ಯಪುರುಷ ಪ್ರಶಸ್ತಿ ಕೂಡಾ ಲಭಿಸಿತ್ತು. ಅಲ್ಲದೇ 350 ವಿಕೆಟ್‌ ಕಬಳಿಸಿದ ವೇಗದ ಬೌಲರ್‌ ಎಂಬ ಕೀರ್ತಿಗೂ ಪಾತ್ರರಾಗಿದ್ದರು.