ವೇಗಿ ಸ್ನೇಹಿ ಪಿಚ್; ಪ್ರತಿತಂತ್ರ ಹೆಣೆದ ಅಶ್ವಿನ್

ಹೊಸದಿಲ್ಲಿ: ದಕ್ಷಿಣ ಆಫ್ರಿಕಾದಲ್ಲಿ ವೇಗಿ ಸ್ನೇಹಿ ಪಿಚ್ ನಿರ್ಮಾಣವಾಗಿದೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಚಾರ. ಇದರಿಂದ ಭಾರತೀಯ ಸ್ಪಿನ್ನರ್‌ಗಳು ನಿರೀಕ್ಷಿದಷ್ಟು ಪ್ರಮಾಣದಲ್ಲಿ ಯಶ ಸಾಧಿಸುತ್ತಿಲ್ಲ.

ಅನಿಲ್ ಕುಂಬ್ಳೆ ಅವರಂತಹ ಬೆರಳಣಿಕೆಯ ಸ್ಪಿನ್ನರ್‌ಗಳನ್ನು ಹೊರತುಪಡಿಸಿದರೆ ಬಹುತೇಕ ಎಲ್ಲ ಭಾರತೀಯ ಸ್ಪಿನ್ನರ್‌ಗಳು ವಿದೇಶ ನೆಲದಲ್ಲಿ ವೈಫಲ್ಯವನ್ನು ಅನುಭವಿಸಿದ್ದರು.

ಪ್ರಸ್ತುತ ದಕ್ಷಿಣ ಆಫ್ರಿಕಾ ವಿರುದ್ಧ ಸಾಗುತ್ತಿರುವ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲೂ ಪರಿಸ್ಥಿತಿ ಭಿನ್ನವಾಗಿಲ್ಲ. ಇದರಿಂದ ಎಚ್ಚೆತ್ತುಕೊಂಡಿರುವ ಆಫ್ ಸ್ಪಿನ್ನರ್ ವಿಶೇಷವಾದ ತಂತ್ರಗಾರಿಕೆಯೊಂದನ್ನು ಅನುಸರಿಸಿದ್ದಾರೆ.

Just for fun - when @ashwinravi99 decided to bowl seam instead of spin #SAvIND pic.twitter.com/7bsCpndNkk — BCCI (@BCCI) January 11, 2018 ತಮ್ಮ ಬೌಲಿಂಗ್‌ನಲ್ಲಿ ಹಲವಾರು ವೈವಿಧ್ಯತೆಗಳನ್ನು ತಂದಿರುವ ಅಶ್ವಿನ್ ಈ ಹಿಂದೆ ಲೆಗ್ ಸ್ಪಿನ್ ದಾಳಿಯನ್ನು ಮಾಡುವ ಮೂಲಕ ಗಮನ ಸೆಳೆದಿದ್ದರು. ಇದೀಗ ದಕ್ಷಿಣ ಆಫ್ರಿಕಾ ವಿರುದ್ಧದ ದ್ವಿತೀಯ ಟೆಸ್ಟ್ ಪಂದ್ಯಕ್ಕೂ ಮುಂಚಿತವಾಗಿ ವೇಗದ ದಾಳಿಯನ್ನು ಅಭ್ಯಾಸ ಮಾಡುವ ಮೂಲಕ ಗಮನ ಸೆಳೆದಿದ್ದಾರೆ.

ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಅಶ್ವಿನ್ ಈ ಅಸ್ತ್ರವನ್ನು ಪರೀಕ್ಷಿಸಿದಲ್ಲಿ ಅಚ್ಚರಿಪಡಬೇಕಿಲ್ಲ. ಯಾಕೆಂದರೆ ಓರ್ವ ಸ್ಪಿನ್ ಬೌಲರ್ ಎಂಬುದಕ್ಕಿಂತಲೂ ಮಿಗಿಲಾಗಿ ವಿವೇಚನಾ ಶಕ್ತಿಗೆ ಹೆಚ್ಚಿನ ಆದ್ಯತೆ ಕೊಡುತ್ತಾರೆ.

ಅಂದ ಹಾಗೆ ಕೇಪ್‌ ಟೌನ್‌ನಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದ ಎರಡೂ ಇನ್ನಿಂಗ್ಸ್‌ಗಳಲ್ಲಾಗಿ 8.1 ಓವರ್ ಸಂಘಟಿಸಿದ್ದ ಅಶ್ವಿನ್ ಎರಡು ವಿಕೆಟುಗಳನ್ನು ಕಬಳಿಸಿದ್ದರು.