ವಿಜಯ್‌ ಹಜಾರೆ ಟ್ರೋಫಿ ಫೈನಲ್‌ ಪಂದ್ಯ ಇಂದು
ಏಜೆನ್ಸೀಸ್ ಹೊಸದಿಲ್ಲಿ
ಮೂರು ಬಾರಿಯ ಚಾಂಪಿಯನ್‌ ತಮಿಳುನಾಡು ತಂಡ ಸೋಮವಾರ ನಡೆಯುವ ಪ್ರಸಕ್ತ ಸಾಲಿನ ವಿಜಯ್‌ ಹಜಾರೆ ಟ್ರೋಫಿ ಫೈನಲ್‌ ಪಂದ್ಯದಲ್ಲಿ ಬಂಗಾಳ ತಂಡವನ್ನು ಎದುರಿಸಲಿದೆ.
ಫಿರೋಜ್‌ ಶಾ ಕೋಟ್ಲಾ ಮೈದಾನದಲ್ಲಿ ನಡೆಯುವ ಪಂದ್ಯದಲ್ಲಿ ಉಭಯ ತಂಡಗಳಿಂದ ಸಮಬಲದ ಹೋರಾಟವನ್ನು ನಿರೀಕ್ಷಿಸಲಾಗಿದೆ. ತಮಿಳುನಾಡು ತಂಡ ಬರೋಡಾ ತಂಡವನ್ನು ಸೋಲಿಸಿ ಫೈನಲ್‌ ಪ್ರವೇಶಿಸಿದ್ದರೆ, ಬಂಗಾಳ ಎಂ.ಎಸ್‌ ಧೋನಿ ಸಾರಥ್ಯದ ಜಾರ್ಖಂಡ್‌ ತಂಡವನ್ನು ಬಗ್ಗು ಬಡಿದು ಪ್ರಶಸ್ತಿ ಸುತ್ತಿನಲ್ಲಿ ಕಾಣಿಸಿಕೊಂಡಿದೆ.
ನಾಯಕ ವಿಜಯ್‌ ಶಂಕರ್‌, ದಿನೇಶ್‌ ಕಾರ್ತಿಕ್‌, ಬಾಬಾ ಅಪರಾಜಿತ್‌, ವಾಷಿಂಗ್ಟನ್‌ ಸುಂದರ್‌ ತಮಿಳುನಾಡಿನ ಪ್ರಮುಖ ಆಟಗಾರರಾದರೆ, ಬಂಗಾಳ ಪರ ನಾಯಕ ಮನೋಜ್‌ ತಿವಾರಿ, ಶ್ರೀವತ್ಸ್‌ ಗೋಸ್ವಾಮಿ, ಸುದೀಪ್‌ ಚಟರ್ಜಿ, ಅಶೋಕ್‌ ದಿಂಡಾ, ಪ್ರಗ್ಯಾನ್‌ ಓಜಾ ಸ್ಟಾರ್‌ ಆಟಗಾರರಾಗಿದ್ದಾರೆ.
2002ಧಿ-03ನೇ ಸಾಲಿನಲ್ಲಿ ನಡೆದ ಚೊಚ್ಚಲ ಆವೃತ್ತಿಯ ವಿಜಯ್‌ ಹಜಾರೆ ಟ್ರೋಫಿ ಟೂರ್ನಿಯಲ್ಲಿ ತಮಿಳುನಾಡು ತಂಡ ಚಾಂಪಿಯನ್‌ ಆಗಿತ್ತು. ನಂತರ 2008-09 ಹಾಗೂ 2009-10ನೇ ಸಾಲಿನಲ್ಲಿ ಸತತ ಎರಡು ಬಾರಿ ಪ್ರಶಸ್ತಿ ಗೆದ್ದಿತ್ತು. ಬಂಗಾಳ ತಂಡ 2011-12ನೇ ಸಾಲಿನಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿತ್ತು.
ಪಂದ್ಯ ಆರಂಭ: ಬೆಳಗ್ಗೆ 9ಕ್ಕೆ
ಸ್ಥಳ: ಫಿರೋಜ್‌ ಶಾ ಕೋಟ್ಲಾ, ದಿಲ್ಲಿ