ಕೊಹ್ಲಿ-ಅನುಷ್ಕಾ ದಂಪತಿಗೆ ಕರ್ವಾ ಚೌತ್ ಹಬ್ಬದ ಸಂಭ್ರಮ

ಹೊಸದಿಲ್ಲಿ: ಹೆಂಗಳೆಯರ ಹಬ್ಬ ಎಂದೇ ಪ್ರಸಿದ್ಧಿ ಪಡೆದಿರುವ 'ಕರ್ವಾ ಚೌತ್' ಹಬ್ಬವನ್ನು ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಅವರು ತಮ್ಮ ಧರ್ಮಪತ್ನಿ ಹಾಗೂ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ ಜೊತೆ ಆಚರಿಸಿಕೊಂಡಿದ್ದಾರೆ.

ಬಳಿಕ ಪತ್ನಿ ಜೊತೆಗಿನ ಚಿತ್ರವನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ಅಭಿಮಾನಿಗಳ ಜೊತೆಗೆ ಹಂಚಿಕೊಂಡಿದ್ದಾರೆ.

ಹಿಂದೂ ಸಂಪ್ರಾದಾಯದಂತೆ ಕಾರ್ತಿಕ ಮಾಸದ ಹುಣ್ಣಿಮೆಯ ಬಳಿಕ ನಾಲ್ಕನೇ ದಿನದಂದು ಕರ್ವಾ ಚೌತ್ ಹಬ್ಬವನ್ನು ಆಚರಿಸಲಾಗುತ್ತದೆ. ಈ ನಿರ್ದಿಷ್ಟ ದಿನದಂದು ಪತಿಯರ ದೀರ್ಘಾಯುಷ್ಯ ಹಾಗೂ ಯೋಗಕ್ಷೇಮಕ್ಕಾಗಿ ಪತ್ನಿಯರು ದಿನವಿಡೀ ಉಪವಾಸ ವ್ರತವನ್ನು ಆಚರಿಸುತ್ತಾರೆ.

ಪ್ರಮುಖವಾಗಿಯೂ ಕರ್ವಾ ಚೌತ್ ಹಬ್ಬವನ್ನು ಉತ್ತರ ಭಾರತದಲ್ಲಿ ಆಚರಿಸಲಾಗುತ್ತದೆ. ಹಿಂದಿ ಭಾಷೆಯಲ್ಲಿ ಕರ್ವಾ ಎಂದರೆ 'ಮಣ್ಣಿನ ಮಡಕೆ' ಹಾಗೂ ಚೌತ್ ಎಂದರೆ 'ನಾಲ್ಕು' ಎಂದರ್ಥ.

ನವ ವಧು-ವರರಂತೆ ಸಿಂಗಾರಗೊಂಡಿರುವ ಕೊಹ್ಲಿ ಹಾಗೂ ಅನುಷ್ಕಾ ಹಿಂದೂ ಸಂಪ್ರಾದಾಯದಂತೆ ಕೌರಾ ಚೌತ್ ಹಬ್ಬವನ್ನು ಆಚರಿಸಿದ್ದಾರೆ. ಅಲ್ಲದೆ ಕೊಹ್ಲಿ ಪತ್ನಿಗೆ ನೀಡಿರುವ ತಮ್ಮ ಸಂದೇಶದಲ್ಲಿ "ನನ್ನ ಜೀವ, ನನ್ನ ಜಗತ್ತು" ಎಂದು ಕ್ಯಾಪ್ಷನ್ ನೀಡಿದ್ದಾರೆ.

ಬಳಿಕ ಪತಿ ಕೊಹ್ಲಿಗೆ ನೀಡಿರುವ ಸಂದೇಶದಲ್ಲಿ ಅನುಷ್ಕಾ ಅವರು "ನನ್ನ ಚಂದಿರ, ನನ್ನ ಸೂರ್ಯ, ನನ್ನ ನಕ್ಷತ್ರ, ನನ್ನ ಎಲ್ಲವೂ ನೀನೆ" ಎಂದು ಗುಣಗಾನ ಮಾಡಿದ್ದಾರೆ.