ನಾನು ಕೋಹ್ಲಿ ಈಗಲೂ ಉತ್ತಮ ಫ್ರೆಂಡ್ಸ್: ವಾರ್ನರ್

ಹೈದರಾಬಾದ್: ಕಳೆದ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಣ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಉಭಯ ತಂಡಗಳ ಆಟಗಾರರ ನಡುವೆ ವಾಕ್ಸಮರ ಏರ್ಪಟ್ಟಿತ್ತು. ಆಸೀಸ್ ನಾಯಕ ಸ್ಟೀವ್ ಸ್ಮಿತ್ ಡಿಆರ್‌ಎಸ್ ವಿವಾದದಿಂದ ಉದ್ಭವಿಸಿದ ಮಾತಿನ ಚಕಮತಿಯು ಸರಣಿಯುದ್ಧಕ್ಕೂ ಕಾವೇರಿದ ವಾತಾವರಣ ಮೂಡಿಸಿತ್ತು.

ಟೆಸ್ಟ್ ಸರಣಿಯ ಬಳಿಕ ತಾಳ್ಮೆ ಕಳೆದುಕೊಂಡ ಭಾರತೀಯ ನಾಯಕ ವಿರಾಟ್ ಕೋಹ್ಲಿ, ಇನ್ನು ಮುಂದೆ ಆಸೀಸ್ ಆಟಗಾರರನ್ನು ಸ್ನೇಹಿತರಾಗಿ ಪರಿಗಣಿಸಲ್ಲ ಎಂಬ ಹೇಳಿಕೆಯನ್ನು ಕೊಟ್ಟಿದ್ದರು. ಈ ಬಗ್ಗೆ ಆಸೀಸ್ ಮಾಧ್ಯಮಗಳಲ್ಲಿ ವ್ಯಾಪಕ ಟೀಕೆಗಳು ಎದುರಾಗಿದ್ದವು.

ಪ್ರಸ್ತುತ ಸಾಗುತ್ತಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟೂರ್ನಿಯಲ್ಲಿ ಆಸೀಸ್ ಹಾಗೂ ಭಾರತದ ಹಲವಾರು ಆಟಗಾರರು ಡ್ರೆಸ್ಸಿಂಗ್ ಕೊಠಡಿಯನ್ನು ಹಂಚಿಕೊಳ್ಳುತ್ತಿದ್ದಾರೆ.

ಈ ನಡುವೆ ಐಪಿಎಲ್ ಉದ್ಘಾಟನಾ ಸಮಾರಂಭದ ವೇಳೆ ಕೋಹ್ಲಿ ಅವರನ್ನು ಭೇಟಿ ಮಾಡುವ ಅವಕಾಶವನ್ನು ಆಸೀಸ್ ಸ್ಫೋಟಕ ಆರಂಭಿಕ ಡೇವಿಡ್ ವಾರ್ನರ್ ಪಡೆದಿದ್ದರು. ಅಲ್ಲದೆ ಭಾರತೀಯ ನಾಯಕನೊಂದಿಗೆ ಉತ್ತಮ ಮಿತ್ರತ್ವವನ್ನು ಕಾಪಾಡಿಕೊಂಡಿರುವುದಾಗಿ ತಿಳಿಸಿದ್ದಾರೆ.

ಹೌದು, ನಾನು ವಿರಾಟ್ ಜೊತೆಗೆ ಮಾತನಾಡಿದ್ದೇನೆ. ನಾವೀಗಲೂ ಉತ್ತಮ ಸ್ನೇಹಿತರು ಎಂದು ವಾರ್ನರ್ ಸೇರಿಸಿದರು. ನಮಗೆಲ್ಲರಿಗೂ ತಿಳಿದಿರುವಂತೆಯೇ ನಮಗೆಲ್ಲರಿಗೂ ಮಾಡಿ ಮುಗಿಸಬೇಕಾದ ನಮ್ಮದೇ ಆದ ಕೆಲಸವಿದೆ. ನೀವು ಪತ್ರಕರ್ತರು ಬರೆಯುತ್ತೀರಿ. ಅದು ಸರಿ ಅಥವಾ ತಪ್ಪಾಗಿರಬಹುದು. ಆದರೆ ಆಟಗಾರರು...ಆಟ ಎಂಬುದೇ ಹೀಗೆ. ಆದರೆ ಇವೆಲ್ಲದರಿಂದ ಹೊರತಾಗಿ ನಾವಿಬ್ಬರೂ ಅತ್ಯುತ್ತಮ ಸ್ನೇಹಿತರು ಎಂದು ಸನ್ ರೈಸರ್ಸ್ ಹೈದರಾಬಾದ್ ನಾಯಕನಾಗಿರುವ ವಾರ್ನರ್ ವಿವರಿಸಿದರು.

ಕಳೆದ ಆಸೀಸ್ ಸರಣಿಯಲ್ಲಿನ ವಿವಾದಗಳ ಬಗ್ಗೆ ಪ್ರಶ್ನಿಸಿದಾಗ, ಕೆಲವೊಮ್ಮೆ ನಾವೆಲ್ಲರೂ ಭಾವನೆಗಳನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸುತ್ತೇವೆ. ಆದರೆ ಅಂತಿಮವಾಗಿ ನಾವೆಲ್ಲರೂ ಅತ್ಯುತ್ತಮ ಫ್ರೆಂಡ್ಸ್ ಎಂದರು.

ಐಪಿಎಲ್ ಸ್ನೇಹ ಭಾವದ ವಾತಾವರಣವನ್ನುಂಟು ಮಾಡಿದ್ದು, ನಾವೆಲ್ಲರೂ ಪಂದ್ಯವನ್ನು ಆನಂದಿಸುತ್ತಿದ್ದೇವೆ. ಹಾಗೆಯೇ ಎಲ್ಲರೂ ನಗುತ್ತಿರುವುದನ್ನು ಖಾತ್ರಿಪಡಿಸುತ್ತೇವೆ ಎಂದರು.