ಐಸಿಸಿ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ ವಿಶೇಷ ದಾಖಲೆ ಬರೆದ ವಿರಾಟ್‌ ಕೊಹ್ಲಿ, ರೋಹಿತ್‌ ಶರ್ಮಾ!

ಬೆಂಗಳೂರು: ಎಲ್ಲಾ ಮಾದರಿಯ ಕ್ರಿಕೆಟ್‌ನಲ್ಲಿ ಒಬ್ಬರ ಮೇಲೆ ಒಬ್ಬರು ಜಿದ್ದಿಗೆ ಬಿದ್ದವರಂತೆ ರನ್‌ ಹೊಳೆ ಹರಿಸುತ್ತಿರುವ ಟೀಮ್‌ ಇಂಡಿಯಾ ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿ ಮತ್ತು ಸೀಮಿತ ಓವರ್‌ಗಳ ಕ್ರಿಕೆಟ್‌ನ ಭಾರತದ ಉಪನಾಯಕ ರೋಹಿತ್‌ ಶರ್ಮಾ, ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಮಿತಿ (ಐಸಿಸಿ) ಬುಧವಾರ ಪ್ರಕಟಿಸಿರುವ ನೂತನ ರ‍್ಯಾಂಕಿಂಗ್ಸ್‌ನಲ್ಲಿ ವಿಶೇಷ ದಾಖಲೆಯೊಂದನ್ನು ಬರೆದಿದ್ದಾರೆ.

ಮಂಗಳವಾರವಷ್ಟೇ ಅಂತ್ಯಗೊಂಡ ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್‌ ಸರಣಿಯಲ್ಲಿ ಭಾರತ ತಂಡ 3-0 ಅಂತರದ ವೈಟ್‌ವಾಷ್‌ ಗೆಲುವು ದಾಖಲಿಸಿತು. ಈ ಸರಣಿ ಮೂಲಕ ಟೀಮ್‌ ಇಂಡಿಯಾ ಪರ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಆರಂಭಿಕ ಬ್ಯಾಟ್ಸ್‌ಮನ್‌ ಆಗಿ ಹೊಸ ಅಭಿಯಾನ ಆರಂಭಿಸಿದ ರೋಹಿತ್‌ ಶರ್ಮಾ ಆಡಿದ ನಾಲ್ಕು ಇನಿಂಗ್ಸ್‌ಗಳಲ್ಲಿ ಮೂರು ಶತಕಗಳನ್ನು ಒಳಗೊಂಡ 529 ರನ್‌ಗಳನ್ನು ಬಾರಿಸಿದರು. ಮೂರನೇ ಟೆಸ್ಟ್‌ನಲ್ಲಿ ತಮ್ಮ ಟೆಸ್ಟ್‌ ವೃತ್ತಿ ಬದುಕಿನ ವೈಯಕ್ತಿಕ ಗರಿಷ್ಠ ಮೊತ್ತವಾಗಿ 212 ರನ್‌ಗಳನ್ನು ಪೇರಿಸಿದ್ದರು.

ವಿಕೆಟ್‌ ಮೇಲೆ ವಿಕೆಟ್‌ ಬಿದ್ದರೆ ರವಿ ಶಾಸ್ತ್ರಿಗೇನು?

ಅವರ ಈ ಬ್ಯಾಟಿಂಗ್‌ ಸಾಧನೆಯ ಫಲವಾಗಿ ಐಸಿಸಿ ಪ್ರಟಕ ಮಾಡಿರುವ ನೂತನ ಟೆಸ್ಟ್‌ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ 12 ಸ್ಥಾನ ಮೇಲೇರಿ 10ನೇ ಶ್ರೇಯಾಂಕ ಪಡೆದುಕೊಂಡಿದ್ದಾರೆ. ಈ ಮೂಲಕ ವೃತ್ತಿ ಬದುಕಿನಲ್ಲಿ ಮೊತ್ತ ಮೊದಲ ಬಾರಿ ಟೆಸ್ಟ್‌ ಶ್ರೇಯಾಂಕದ ಟಾಪ್‌ 10 ಒಳಗೆ ಸ್ಥಾನ ಗಿಟ್ಟಿಸಿದ್ದಾರೆ. ಸರಣಿ ಆರಂಭಕ್ಕೂ ಮುನ್ನ ರೋಹಿತ್‌ 44ನೇ ಸ್ಥಾನದಲ್ಲಿದ್ದರು.

ಸಂದಹಾಗೆ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ರೋಹಿತ್‌ ಟಾಪ್‌ 10 ಒಳಗೆ ಸ್ಥಾನ ಪಡೆಯುತ್ತಿದ್ದಂತೆಯೇ ವಿಶೇಷ ದಾಖಲೆಯೊಂದು ನಿರ್ಮಾಣವಾಗಿದೆ. ಟೆಸ್ಟ್‌, ಏಕದಿನ ಮತ್ತು ಅಂತಾರಾಷ್ಟ್ರೀಯ ರ‍್ಯಾಂಕಿಂಗ್‌ ಪಟ್ಟಿಗಳಲ್ಲಿ ಭಾರತ ಇಬ್ಬರು ಬ್ಯಾಟ್ಸ್‌ಮನ್‌ಗಳು ಏಕ ಕಾಲದಲ್ಲಿ ಅಗ್ರ 10ರೊಳಗೆ ಸ್ಥಾನ ಪಡೆದಿದ್ದಾರೆ. ಇದೊಂದು ಅಪರೂಪದ ಸಾಧನೆಯಾಗಿದ್ದು ಈ ಸಾಧನೆ ಮಾಡಿದ ಭಾರತದ ಮೊದಲ ಕ್ರಿಕೆಟಿಗರಾಗಿದ್ದಾರೆ. ಇದಕ್ಕೂ ಮುನ್ನ ಮಾಜಿ ಕ್ರಿಕೆಟಿಗ ಗೌತಮ್‌ ಗಂಭೀರ್‌ ಟೆಸ್ಟ್‌ ಮತ್ತು ಟಿ20-ಐನಲ್ಲಿ ನಂ.1 ಮತ್ತು ಒಡಿಐನಲ್ಲಿ 8ನೇ ಸ್ಥಾನ ಹೊಂದಿದ್ದರು. ಆದರೆ, ಭಾರತ ತಂಡದ ಇಬ್ಬರು ಬ್ಯಾಟ್ಸ್‌ಮನ್‌ಗಳು ಎಲ್ಲಾ ಮಾದರಿಯಲ್ಲೂ ಅಗ್ರ 10ರೊಳಗೆ ಸ್ಥಾನ ಪಡೆದಿರುವುದು ಇದೇ ಮದಲ ಬಾರಿ ಆಗಿದೆ.

ಎಲ್ಲಾ ಮಾದರಿಯ ಕ್ರಿಕೆಟ್‌ನಲ್ಲಿ ಕೊಹ್ಲಿ ಮತ್ತು ರೋಹಿತ್‌ ರ‍್ಯಾಂಕಿಂಗ್‌ ಇಂತಿದೆ

ವಿರಾಟ್‌ ಕೊಹ್ಲಿ: (ಟೆಸ್ಟ್‌ 02, ಒಡಿಐ 01, ಟಿ20-ಐ 10)
ರೋಹಿತ್‌ ಶರ್ಮಾ: (ಟೆಸ್ಟ್‌ 10, ಒಡಿಐ 02, ಟಿ20-ಐ 07)

ಟೀಮ್‌ ಇಂಡಿಯಾ ವಿರುದ್ಧ ವೈಟ್‌ವಾಷ್‌ ಸೋಲಿಗೆ ಕಾರಣ ಕೊಟ್ಟ ಫಾಫ್‌ ಡು'ಪ್ಲೆಸಿಸ್‌!

ಟೀಮ್‌ ಇಂಡಿಯಾ ಬೌಲರ್‌ಗಳು ಕೂಡ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ ಉತ್ತಮ ಸಾಧನೆ ಮೆರೆದಿದ್ದು, 751 ಅಂಕಗಳೊಂದಿಗೆ ಮೊಹಮ್ಮದ್‌ ಶಮಿ 15ನೇ ರ‍್ಯಾಂಕ್ ಪಡೆದಿದ್ದಾರೆ. ಉಮೇಶ್‌ ಯಾದವ್ ಇದೇ ಮೊದಲ ಬಾರಿ 624 ಅಂಗಳನ್ನು ಸಂಪಾದಿಸಿದ್ದು ವೃತ್ತಿ ಬದುಕಿನ ಶ್ರೇಷ್ಠ ಶ್ರೇಯಾಂಕವಾಗಿ 24ನೇ ರ‍್ಯಾಂಕ್‌ ಪಡೆದಿದ್ದಾರೆ.