ಮೌಲ್ಯಯುತ ಸೆಲೆಬ್ರಿಟಿ; ಶಾರೂಕ್ ಹಿಂದಿಕ್ಕಿದ ಕೊಹ್ಲಿ

ಚೆನ್ನೈ: ಭಾರತೀಯ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ, ಕೇವಲ ವಿಶ್ವ ಕ್ರಿಕೆಟ್‌ನಲ್ಲಿ ಮಾತ್ರ ಸದ್ದು ಮಾಡಿರುವುದು. ಭಾರತದ ಅತ್ಯಂತ ಮೌಲ್ಯಯುತ ಸೆಲೆಬ್ರಿಟಿಗಳ ಪೈಕಿ ಬಾಲಿವುಡ್ ಬಾದ್‌ಷಾ ಶಾರೂಕ್ ಖಾನ್ ಅವರನ್ನೇ ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಿದ್ದಾರೆ.

ಕಾರ್ಪೋರೇಟ್ ಸಲಹೆಗಾರ ಡಫ್ ಆ್ಯಂಡ್ ಫೇಲ್ಪ್ಸ್ ಬಿಡುಗಡೆ ಮಾಡಿರುವ ವರದಿ ಪ್ರಕಾರ 2014ನೇ ಸಾಲಿನಿಂದ ದೇಶದ ಅತ್ಯಂತ ಮೌಲ್ಯಯುತ ಸೆಲೆಬ್ರಿಟಿ ಶಾರೂಕ್ ಹಿಂದಿಕ್ಕಿರುವ ವಿರಾಟ್ ಬ್ರಾಂಡ್ ಮೌಲ್ಯ 143 ಮಿಲಿಯನ್ ಅಮೆರಿಕನ್ ಡಾಲರ್‌ಗೆ (ಸರಿ ಸುಮಾರು 916 ಕೋಟಿ) ಏರಿಕೆಯಾಗಿದೆ.

ಈ ನಡುವೆ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಕಳೆದ ವರ್ಷವಿದ್ದ 9ನೇ ಸ್ಥಾನದಿಂದ 13ನೇ ಸ್ಥಾನಕ್ಕೆ ಕುಸಿತ ಕಂಡಿದ್ದಾರೆ. ಅತ್ತ ಭಾರತದ ಅಗ್ರಮಾನ್ಯ ಬ್ಯಾಡ್ಮಿಂಟನ್ ತಾರೆ ಪಿವಿ ಸಿಂಧೂ ಅಗ್ರ 15ರ ಪಟ್ಟಿಯಲ್ಲಿ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಮೈದಾನದ ಒಳಗೂ, ಹೊರಗೂ ಅದ್ಭುತ ಬ್ರಾಂಡ್ ಮೌಲ್ಯ ಕಾಪಾಡಿಕೊಂಡಿರು ಕೊಹ್ಲಿ ಈಗ ಗ್ರಾಹಕರನ್ನು ಆಕರ್ಷಿಸುವಲ್ಲಿ ಮೊದಲ ಆಯ್ಕೆಯಾಗಿದ್ದಾರೆ. ಇಲ್ಲಿ ಶಾರೂಕ್ ಸೇರಿದಂತೆ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಹಾಗೂ ನಟ ರಣವೀರ್ ಸಿಂಗ್ ಮುಂತಾದವರನ್ನು ಹಿಂದಿಕ್ಕಿದ್ದಾರೆ.

ಕೊಹ್ಲಿ ಯೂತ್ ಐಕಾನ್ ಆಗಿ ಮಾರ್ಪಾಡುಗೊಂಡಿದ್ದು, ದೇಶದ ಯುವಕರಿಗೆ ಫಿಟ್ನೆಸ್ ಮಂತ್ರವನ್ನು ಪಠಿಸುತ್ತಿದ್ದಾರೆ. ಅಷ್ಟೇ ಯಾಕೆ ಕ್ರೀಡಾತ್ಮಕ ಉತ್ಪನ್ನಗಳ ನಿರ್ಮಾಣ ಸಂಸ್ಥೆ ಪುಮಾ ಜತೆ 100 ಕೋಟಿ ರೂ.ಗಳ ಒಪ್ಪಂದಕ್ಕೆ ಸಹಿ ಹಾಕಿದ ಮೊದಲ ಭಾರತೀಯ ಕ್ರೀಡಾಪಟು ಎಂಬ ಗೌರವಕ್ಕೆ ಪಾತ್ರವಾಗಿದ್ದರು.