ಕುತೂಹಲ ಕೆರಳಿಸಿದ ಕೊಹ್ಲಿ ಸೆಂಚುರಿ ಸೆಲೆಬ್ರೇಷನ್

ವಿಶಾಖಪಟ್ಟಣ: ತಮ್ಮ ಭಾವನೆಗಳನ್ನು ಹಂಚಿಕೊಳ್ಳಲು ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಎಂದಿಗೂ ಹಿಂಜರಿಯುದಿಲ್ಲ. ನಾಯಕ ಕೊಹ್ಲಿ ಅವರ ಈ ನಿಲುವು ಅಪಾರ ಸಂಖ್ಯೆಯ ಅಭಿಮಾನಿಗಳ ಬಳಗಳನ್ನು ಕಟ್ಟಿಕೊಳ್ಳಲು ನೆರವಾದರೆ ಒಂದಷ್ಟು ಅಭಿಮಾನಿಗಳಲ್ಲಿ ವೈರತ್ವವನ್ನು ಬೆಳೆಸಿತ್ತು.

ಆದರೆ ಇವೆಲ್ಲದರ ಬಗ್ಗೆ ತಲೆಕೆಡಿಸಿಕೊಳ್ಳದ ಕಿಂಗ್ ಕೊಹ್ಲಿ, ನಾನು ಇರುವುದು ಹೀಗೆ, ನನ್ನ ಸ್ಟೈಲೇ ಹೀಗೆ ಎಂಬ ರೀತಿಯಲ್ಲಿ ಬ್ಯಾಟ್ ಬೀಸುತ್ತಿದ್ದರು. ಯಶಸ್ಸಿಗೆ ಅಡ್ಡ ದಾರಿಯಿಲ್ಲ ಎಂಬುದನ್ನು ಸರಿಯಾಗಿ ಮನದಟ್ಟು ಮಾಡಿಕೊಂಡಿರುವ 29ರ ಹರೆಯದ ಕೊಹ್ಲಿ ತಮ್ಮ ಆಕ್ರಮಣಕಾರಿ ಕ್ರಿಕೆಟ್ ಶೈಲಿಯ ಜೊತೆಗೆ ಕಠಿಣ ಪರಿಶ್ರಮದಲ್ಲಿ ತೊಡಗಿಸಿಕೊಂಡಿದ್ದಾರೆ.

ಪ್ರಸ್ತುತ ವೆಸ್ಟ್‌ಇಂಡೀಸ್ ವಿರುದ್ಧ ಸಾಗುತ್ತಿರುವ ಏಕದಿನ ಸರಣಿಯ ದ್ವಿತೀಯ ಪಂದ್ಯದಲ್ಲಿ ದಾಖಲೆಯ 37ನೇ ಶತಕ ಸಿಡಿಸಿರುವ ಕಿಂಗ್ ಕೊಹ್ಲಿ ಅನೇಕ ದಾಖಲೆಯನ್ನು ಪುಟಿಗಟ್ಟಿದ್ದಾರೆ. ಇವುಗಳಲ್ಲಿ ಪ್ರಮುಖವಾದುದು ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರ 10000 ರನ್. ಕೊಹ್ಲಿ ಇದೀಗ ಅತಿ ವೇಗದಲ್ಲಿ 10 ಸಾವಿರ ರನ್ ಮೈಲುಗಲ್ಲು ತಲುಪಿದ ಬ್ಯಾಟ್ಸ್‌ಮನ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದಾರೆ.

129 ಎಸೆತಗಳನ್ನು ಎದುರಿಸಿರುವ ಕೊಹ್ಲಿ 157 ರನ್ ಗಳಸಿ ಅಜೇಯರಾಗುಳಿದಿದ್ದರು. ಈ ನಡುವೆ ಶತಕದ ಬಳಿಕ ವಿಶಿಷ್ಟ ರೀತಿಯಲ್ಲಿ ಸಂಭ್ರಮಿಸಿಕೊಂಡಿದ್ದರು. ಎಲ್ಲ ಟೀಕೆಗಳಿಗೂ "ತಮ್ಮ ಬ್ಯಾಟ್ ಉತ್ತರಿಸಲಿ ಅಥವಾ ಮಾತನಾಡಲಿ" ಎಂಬ ರೀತಿಯಲ್ಲಿ ಕೊಹ್ಲಿ ಗ್ಯಾಲರಿಗೆ ಸನ್ನೆ ಮಾಡಿದ್ದರು.

ಈ ಹಿಂದೆ ತಮ್ಮ ಪತ್ನಿ ವಿರುದ್ಧ ಹಲವು ಬಾರಿ ಟೀಕೆಗಳು ಎದುರಾದಾಗ ಶತಕಗಳನ್ನುಅನುಷ್ಕಾ ಶರ್ಮಾಗೆ ಅರ್ಪಿಸಿರುವುದನ್ನು ನೀವಿಲ್ಲಿ ನೆನಪಿಸಿಕೊಳ್ಳಬಹುದಾಗಿದೆ.