ಕಿಂಗ್ ಕೊಹ್ಲಿ ರನ್ ಬೇಟೆ 17,000

ಸೆಂಚುರಿಯನ್: ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಅಂತಿಮ ಏಕದಿನ ಪಂದ್ಯದಲ್ಲೂ ಅಮೋಘ ಶತಕ ಬಾರಿಸಿರುವ ನಾಯಕ ವಿರಾಟ್ ಕೊಹ್ಲಿ, ಹರಿಣಗಳ ನಾಡಲ್ಲಿ ಭಾರತಕ್ಕೆ ಐತಿಹಾಸಿಕ ಏಕದಿನ ಸರಣಿ ಗೆಲುವು ದಾಖಲಿಸಿಕೊಡುವಲ್ಲಿ ನೆರವಾಗಿದ್ದರು.

96 ಎಸೆತಗಳನ್ನು ಎದುರಿಸಿರುವ ವಿರಾಟ್ 19 ಬೌಂಡರಿ ಹಾಗೂ ಎರಡು ಸಿಕ್ಸರ್‌ಗಳಿಂದ 129 ರನ್ ಬಾರಿಸಿ ಅಜೇಯರಾಗುಳಿದಿದ್ದರು.

ಇದು ಏಕದಿನದಲ್ಲಿ ಕೊಹ್ಲಿ ಬ್ಯಾಟ್‌ನಿಂದ ಸಿಡಿದ 35ನೇ ಶತಕವಾಗಿದೆ. ಅಷ್ಟೇ ಯಾಕೆ ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ವೇಗದಲ್ಲಿ 17,000 ರನ್ ಮೈಲುಗಲ್ಲು ತಲುಪಿರುವ ದಾಖಲೆಗೂ ಪಾತ್ರವಾಗಿದ್ದಾರೆ.

ಕೊಹ್ಲಿ ತಮ್ಮ 363ನೇ ಇನ್ನಿಂಗ್ಸ್‌ನಲ್ಲಿ 17,000 ರನ್‌ಗಳ ಗಡಿಯನ್ನು ದಾಟಿದ್ದಾರೆ. ಈ ಮೂಲಕ ದಕ್ಷಿಣ ಆಫ್ರಿಕಾದ ಹಾಶೀಮ್ ಆಮ್ಲಾ ದಾಖಲೆಯನ್ನು ಹಿಂದಿಕ್ಕಿದ್ದಾರೆ. ಆಮ್ಲಾ ಈ ದಾಖಲೆಗಾಗಿ 381 ಇನ್ನಿಂಗ್ಸ್‌ಗಳನ್ನು ಆಡಿದ್ದರು.

ಇಲ್ಲಿ ಗಮನಾರ್ಹ ಅಂಶವೆಂದರೆ ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ವೇಗದಲ್ಲಿ 15,000 ಹಾಗೂ 16,000 ರನ್‌ಗಳ ಮೈಲುಗಲ್ಲು ತಲುಪಿರುವ ದಾಖಲೆಯೂ ವಿರಾಟ್ ಹೆಸರಲ್ಲಿದೆ. ಈ ಸಾಧನೆಯನ್ನು 2017ನೇ ಸಾಲಿನಲ್ಲಿ ಮಾಡಿರುವುದು ಗಮನಾರ್ಹ.

ಅಂತೆಯೇ ಸೆಂಚುರಿಯನ್ ಶತಕದ ಮೂಲಕ ಒಟ್ಟು ಶತಕಗಳ ಸಂಖ್ಯೆಯನ್ನು 56ಕ್ಕೆ ಏರಿಸಿದ್ದಾರೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ ಕೊಹ್ಲಿ 21 ಶತಕಗಳನ್ನು ಬಾರಿಸಿದ್ದಾರೆ.

ಇಲ್ಲಿಗೆ ಕೊಹ್ಲಿ ದಾಖಲೆಗಳು ಕೊನೆಗೊಳ್ಳುವುದಿಲ್ಲ. ದ್ವಿಪಕ್ಷೀಯ ಏಕದಿನ ಸರಣಿಯಲ್ಲಿ ಅತ್ಯಧಿಕ ರನ್ (558) ಹಾಗೂ ಗರಿಷ್ಠ ಶತಕಗಳನ್ನು (3 ಶತಕ) ಬಾರಿಸಿದ ದಾಖಲೆಗೂ ಕೊಹ್ಲಿ ಭಾಜನವಾಗಿದ್ದಾರೆ.

ವಿರಾಟ್ ಕೊಹ್ಲಿ ಪ್ರದರ್ಶನ:

ಟೆಸ್ಟ್: 66, ರನ್: 5554, ಶತಕ: 21, ಅರ್ಧಶತಕ: 16, ಸರಾಸರಿ: 53.40
ಏಕದಿನ: 208, ರನ್: 9588, ಶತಕ: 35, ಅರ್ಧಶತಕ: 46, ಸರಾಸರಿ: 58.10
ಟ್ವೆಂಟಿ-20: 55, ರನ್: 1956, ಅರ್ಧಶತಕ: 18, ಸರಾಸರಿ: 52.86