ರೋಹಿತ್, ಅಶ್ವಿನ್ ಅಲಭ್ಯತೆಯಿಂದ ಎದೆಗುಂದದ ವಿರಾಟ್

ಪರ್ತ್: ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ನಡೆಯಲಿರುವ ಎರಡನೇ ಟೆಸ್ಟ್ ಪಂದ್ಯಕ್ಕೆ ಗಾಯದ ಸಮಸ್ಯೆಯಿಂದ ಬಳಲುತ್ತಿರುವ ರೋಹಿತ್ ಶರ್ಮಾ ಹಾಗೂ ಆರ್ ಅಶ್ವಿನ್ ಅಲಭ್ಯತೆಯು ಟೀಮ್ ಇಂಡಿಯಾವನ್ನು ಕಾಡಲಿದೆ. ಇದರಿಂದಾಗಿ ಆಡಿಲೇಡ್‌ನಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲಿ 31 ರನ್ ಅಂತರದ ಗೆಲುವು ದಾಖಲಿಸಿರುವ ಟೀಮ್ ಇಂಡಿಯಾಕ್ಕೆ ಹಿನ್ನಡೆಯಾಗುವ ಭೀತಿ ಎದುರಾಗಿದೆ.

ಆದರೆ ಈ ಬಗ್ಗೆ ನಾಯಕ ವಿರಾಟ್ ಕೊಹ್ಲಿ ಹೆಚ್ಚು ಚಿಂತಿತರಾಗಿಲ್ಲ. ಪಂದ್ಯ ಮುನ್ನ ದಿನ ನಡೆದ ಪ್ರತಿಕಾಗೋಷ್ಠಿಯಲ್ಲಿ ವಿರಾಟ್ ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ.

"ಸರಣಿಯಲ್ಲಿ ಗೆಲುವು ದಾಖಲಿಸುವ ಶೇಕಡಾವಾರು ಅವಕಾಶಗಳ ಬಗ್ಗೆ ನಮಗೆ ಖಚಿತತೆಯಿದೆ. ನಾವದನ್ನು ಸದುಪಯೋಗಪಡಿಸಿಕೊಳ್ಳಬೇಕಿದೆ" ಎಂದರು.

"ನಿಸ್ಸಂಶಯವಾಗಿಯೂ ತವರಿನ ಪರಿಸ್ಥಿತಿಯಲ್ಲಿ ಆಸೀಸ್ ಬಲಿಷ್ಠವಾಗಿದೆ. ಅಂತೆಯೇ ಪರ್ತ್‌ನಂತಹ ಪಿಚ್‌ನಲ್ಲಿ ಆತಿಥೇಯರಿಗೆ ಹೆಚ್ಚಿನ ನೆರವಾಗಬಲ್ಲದು. ಆದರೆ ನಮಗೂ ಸಮಾನ ಅವಕಾಶವಿದೆ" ಎಂದರು.

ರೋಹಿತ್ ಸ್ಥಾನವನ್ನು ಹನುಮ ವಿಹಾರಿ ತುಂಬುವುದು ನಿಚ್ಚಳವೆನಿಸಿದೆ. ಇನ್ನು ಅಶ್ವಿನ್ ಸ್ಥಾನಕ್ಕಾಗಿ ಆಲ್‌ರೌಂಡರ್ ರವೀಂದ್ರ ಜಡೇಜಾ ಮತ್ತು ವೇಗಿಗಳಾದ ಭುವನೇಶ್ವರ್ ಕುಮಾರ್ ಹಾಗೂ ಉಮೇಶ್ ಯಾದವ್ ನಡುವೆ ಪೈಪೋಟಿ ಕಂಡುಬಂದಿದೆ.

ಅದೇ ಹೊತ್ತಿಗೆ ವೇಗಿ ಸ್ನೇಹಿ ಪಿಚ್ ಬಗ್ಗೆ ತಾವು ಚಿಂತಿತರಾಗಿಲ್ಲ ಎಂದು ವಿರಾಟ್ ಸೇರಿಸಿದರು. ಇಶಾಂತ್ ಶರ್ಮಾ, ಮೊಹಮ್ಮದ್ ಶಮಿ ಹಾಗೂ ಜಸ್ಪ್ರೀತ್ ಬುಮ್ರಾ ಸಹ ತಮ್ಮ ಸಾಮರ್ಥ್ಯದ ಉತ್ತುಂಗುದಲ್ಲಿದ್ದಾರೆ ಎಂದು ನುಡಿದರು.

"ಲೈವ್ ಪಿಚ್ ಬಗ್ಗೆ ನರ್ವಸ್ ಆಗುವುದರ ಬದಲು ನಾವು ಹೆಚ್ಚು ಉತ್ಸಾಹಿತರಾಗಿದ್ದೇವೆ. ಎದುರಾಳಿ ತಂಡಕ್ಕೆ ಮಾರಕವಾಗಬಲ್ಲ ಬೌಲಿಂಗ್ ಅಸ್ತ್ರವನ್ನು ನಾವು ಹೊಂದಿದ್ದೇವೆ. ನಮ್ಮ ವೇಗಿಗಳ ಬಗ್ಗೆ ಅತೀವ ನಂಬಿಕೆಯನ್ನು ಹೊಂದಿದ್ದೇನೆ. ಓರ್ವ ಬ್ಯಾಟ್ಸ್‌ಮನ್ ಆಗಿ ನಿಮಗಿದು ಹೆಚ್ಚಿನ ಆತ್ಮವಿಶ್ವಾಸವನ್ನು ನೀಡುತ್ತದೆ" ಎಂದು ಸೇರಿಸಿದರು.

"ನಾವು ಚೆನ್ನಾಗಿ ಬ್ಯಾಟಿಂಗ್ ಮಾಡಿದರೆ ನಮಗೆ ಬೇಕಾದ ಫಲಿತಾಂಶವನ್ನು ಪಡೆಯಬಹುದು ಎಂಬುದನ್ನು ಅರ್ಥಮಾಡಿಕೊಂಡಿದ್ದೇವೆ. ಸರಣಿ ಗೆಲ್ಲಲು ಉತ್ತಮ ಪ್ರದರ್ಶನವನ್ನು ಮುಂದುವರಿಸಬೇಕು" ಎಂಬುದನ್ನು ಉಲ್ಲೇಖಿಸಿದರು.