ಸಚಿನ್, ಲಾರಾ ದಾಖಲೆ ಮುರಿದ ಕಿಂಗ್ ಕೊಹ್ಲಿ

ಲಂಡನ್: ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ, ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 18000 ರನ್ ಮೈಲುಗಲ್ಲು ತಲುಪುವ ಮೂಲಕ ಮಗದೊಂದು ದಾಖಲೆ ಬರೆದಿದ್ದಾರೆ.

ಮಾಜಿ ಕ್ರಿಕೆಟ್ ಐಕಾನ್‌ಗಳಾದ ಸಚಿನ್ ತೆಂಡೂಲ್ಕರ್ ಹಾಗೂ ಬ್ರ್ಯಾನ್ ಲಾರಾ ದಾಖಲೆಗಳನ್ನು ಮೀರಿ ನಿಂತಿರುವ ಕಿಂಗ್ ಕೊಹ್ಲಿ, ಇದೀಗ ಸಾರ್ವಕಾಲಿಕ ಶ್ರೇಷ್ಠ ಬ್ಯಾಟ್ಸ್‌ಮನ್‌ಗಳ ಸಾಲಿಗೆ ಸೇರಿದ್ದಾರೆ.

ತಮ್ಮ 382ನೇ ಇನ್ನಿಂಗ್ಸ್‌ನಲ್ಲಿ ಕೊಹ್ಲಿ 18000 ರನ್ ಮೈಲುಗಲ್ಲನ್ನು ತಲುಪಿದ್ದಾರೆ. ಈ ಮೂಲಕ ಅತಿ ವೇಗದಲ್ಲಿ 18000 ರನ್ ಮೈಲುಗಲ್ಲು ದಾಟಿದ ಕೀರ್ತಿಗೆ ಪಾತ್ರವಾಗಿದ್ದಾರೆ.

ವೆಸ್ಟ್‌ಇಂಡೀಸ್‌ನ ಬ್ರ್ಯಾನ್‌ ಲಾರಾ 411, ಸಚಿನ್ ತೆಂಡೂಲ್ಕರ್ 412, ಆಸ್ಟ್ರೇಲಿಯಾದ ಮಾಜಿ ನಾಯಕ ರಿಕಿ ಪಾಂಟಿಂಗ್ 422 ಹಾಗೂ ದಕ್ಷಿಣ ಆಫ್ರಿಕಾದ ಎಬಿಡಿ ವಿಲಿಯರ್ಸ್ 434 ಇನ್ನಿಂಗ್ಸ್‌ಗಳಲ್ಲಿ ಈ ಸಾಧನೆ ಮಾಡಿದ್ದರು .

29ರ ಹರೆಯದ ಕೊಹ್ಲಿ ಈಗಾಗಲೇ 58 ಶತಕಗಳನ್ನು ಬಾರಿಸಿದ್ದಾರೆ. ಇದರಲ್ಲಿ ಟೆಸ್ಟ್‌ನಲ್ಲಿ 23 ಹಾಗೂ ಏಕದಿನದಲ್ಲಿ 35 ಶತಕಗಳು ಸೇರಿವೆ.

ಟೆಸ್ಟ್: ಪಂದ್ಯ 71, ರನ್: 6147
ಏಕದಿನ: ಪಂದ್ಯ 211, ರನ್: 9779
ಟ್ವೆಂಟಿ-20: ಪಂದ್ಯ 62, ರನ್: 2102