16ರ ಹರೆಯದ ಚಿತ್ರವನ್ನು ಹಂಚಿದ ವಿರಾಟ್ ಕೊಹ್ಲಿ; ಅಭಿಮಾನಿಗಳು ಫುಲ್ ಫಿದಾ!

ಬೆಂಗಳೂರು: ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಸದ್ಯ ದಕ್ಷಿಣ ಆಫ್ರಿಕಾ ವಿರುದ್ದ ತವರಿನಲ್ಲಿ ನಡೆಯುತ್ತಿರುವ ಸರಣಿಯಲ್ಲಿ ತಲ್ಲೀನವಾಗಿದ್ದಾರೆ. ಹಾಗಿದ್ದರೂ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳುವ ಮೂಲಕ ತಮ್ಮ ಭಾವನೆಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.

ಇತ್ತೀಚೆಗಿನ ಸಮಯಗಳಿಂದ ತಮ್ಮ ವಿವಿಧ ಹಾವ-ಭಾವಗಳ ಚಿತ್ರಗಳನ್ನು ಹಂಚಿಕೊಳ್ಳುವುದರಲ್ಲಿ ಮಗ್ನವಾಗಿರುವ ವಿರಾಟ್ ಕೊಹ್ಲಿ ಇದೀಗ 16ರ ಹರೆಯದ ಚಿತ್ರವನ್ನು ಹಂಚಿದ್ದಾರೆ. ವಿರಾಟ್ ಕೊಹ್ಲಿ ಫೋಟೋ ಹಂಚಿರುವುದೇ ತಡ ಅಭಿಮಾನಿಗಳು ಹುಚ್ಚೆದ್ದು ಪ್ರತಿಕ್ರಿಯೆ ನೀಡಲಾರಂಭಿಸಿದ್ದಾರೆ.

16ರ ಹರೆಯದ ಕೊಹ್ಲಿಗೂ ಈಗಿನ ಕೊಹ್ಲಿಗೂ ಸಾಕಷ್ಟು ವ್ಯತ್ಯಾಸ ಕಂಡುಬರುತ್ತಿದೆ. ಬಹುಶ: ಇದೇ ಕಾರಣಕ್ಕಾಗಿ ಸ್ವತ: ವಿರಾಟ್ ಕೊಹ್ಲಿ ಸಹ ತಮ್ಮ ಹಣೆಯ ಮೇಲೆ ಕೈಯನ್ನಿಟ್ಟುರುವ ಇಮೋಜಿಯನ್ನು ಹಂಚಿದ್ದಾರೆ.

ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ಯಶಸ್ಸನ್ನು ಸಾಧಿಸಿರುವ ವಿರಾಟ್ ಕೊಹ್ಲಿ ಇದೀಗ ಮುಂಚೂಚಿಯ ಬ್ಯಾಟ್ಸ್‌ಮನ್‌ಗಳ ಸಾಲಿನಲ್ಲಿ ಕಾಣಿಸಿಕೊಂಡಿದ್ದಾರೆ. ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟಿ20 ಪಂದ್ಯದಲ್ಲಿ ಅಜೇಯ ಅರ್ಧಶತಕ ಬಾರಿಸಿರುವ ವಿರಾಟ್ ಎಲ್ಲ ಪ್ರಕಾರದ ಕ್ರಿಕೆಟ್‌ನಲ್ಲೂ 50ಕ್ಕೂ ಹೆಚ್ಚು ಸರಾಸರಿ ಕಾಯ್ದುಕೊಂಡಿರುವ ಏಕಮಾತ್ರ ಬ್ಯಾಟ್ಸ್‌ಮನ್ ಎಂಬ ಬಿರುದಿಗೆ ಪಾತ್ರವಾಗಿದ್ದಾರೆ.

ವಿರಾಟ್ ಕೊಹ್ಲಿಗೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಆಸ್ಟ್ರೇಲಿಯಾದ ಸ್ಟೀವ್ ಸ್ಮಿತ್ ಅವರಿಂದ ನಿಕಟ ಪೈಪೋಟಿ ಎದುರಾಗುತ್ತಿದೆ. ಆ್ಯಶಸ್ ಟೆಸ್ಟ್ ಸರಣಿಯಲ್ಲಿ ಅಮೋಘ ನಿರ್ವಹಣೆ ನೀಡಿರುವ ಸ್ಮಿತ್ ಭಾರತೀಯ ನಾಯಕರನ್ನು ಹಿಂದಕ್ಕೆ ತಳ್ಳಿ ನಂ.1 ಪಟ್ಟ ಆಲಂಕರಿಸಿದ್ದರು. ಆದರೆ ಏಕದಿನ ಹಾಗೂ ಟ್ವೆಂಟಿ-20 ವಿಚಾರಕ್ಕೆ ಬಂದಾಗ ವಿರಾಟ್‌ಗೆ ಸರಿಸಾಟಿ ಯಾರೂ ಇಲ್ಲ. ಇದು ಕ್ರಿಕೆಟ್ ಮೇಲಿರುವ ವಿರಾಟ್ ಕೊಹ್ಲಿ ತೀವ್ರತೆಗೆ ಸಾಕ್ಷಿಯಾಗಿದೆ.

ಇದಕ್ಕೂ ಮೊದಲು ಅನುಷ್ಕಾ ಶರ್ಮಾ ಜತೆಗಿನ ಚಿತ್ರವು ಹೆಚ್ಚು ವೈರಲ್ ಆಗಿ ಹರಡಿತ್ತು. ಅಂದ ಹಾಗೆ ಕಳೆದೊಂದು ದಶಕದಲ್ಲಿ ಹಾವಭಾವದಿಂದ ಹಿಡಿದು ವ್ಯಕ್ತಿತ್ವದಲ್ಲಿ ಯಂಗ್ ವಿರಾಟ್ ಕೊಹ್ಲಿ ಪರಿವರ್ತನೆಗೊಂಡಿರುವ ರೀತಿಯ ಬಗ್ಗೆ ನಿಮ್ಮ ಅನಿಸಿಕೆಗಳನ್ನು ವ್ಯಕ್ತಪಡಿಸಲು ಮರೆಯದಿರಿ...