ಫಿಟ್ನೆಸ್ ಮಂತ್ರ ಪಠಿಸಿದ ಕೊಹ್ಲಿ

ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಫಿಟ್ನೆಸ್‌ಗೆ ಅತಿ ಹೆಚ್ಚು ಪ್ರಾಮುಖ್ಯತೆಯನ್ನು ನೀಡುತ್ತಾರೆ. ಕೇವಲ ತಾವೂ ಫಿಟ್ನೆಸ್ ಭಾಗವಹಿಸುವುದಲ್ಲದೆ ಇತರರಿಗೂ ದೈಹಿಕ ಸಾಮರ್ಥ್ಯ ಕಾಪಾಡಿಕೊಳ್ಳುವಂತೆ ಹುರಿದುಂಬಿಸುತ್ತಾರೆ.

ದೈಹಿಕವಾಗಿ ಸದೃಢವಾಗಿರುವುದರಿಂದಲೇ ಕ್ರಿಕೆಟ್‌ನಲ್ಲಿ ಇಷ್ಟೊಂದು ಯಶಸ್ಸು ಗಳಿಸಲು ಸಾಧ್ಯವಾಗಿದೆ ಎಂಬುದನ್ನು ಕೊಹ್ಲಿ ಬಹಿರಂಗಪಡಿಸಿದ್ದರು.

ವೆಸ್ಟ್ಇಂಡೀಸ್ ವಿರುದ್ಧದ ಅಂತ್ಯಗೊಂಡ ಏಕದಿನ ಸರಣಿಯಲ್ಲಿ ಹ್ಯಾಟ್ರಿಕ್ ಶತಕ ಬಾರಿಸಿರುವ ವಿರಾಟ್ ಕೊಹ್ಲಿ ಅರ್ಹವಾಗಿಯೇ ಸರಣಿಶ್ರೇಷ್ಠ ಪ್ರಶಸ್ತಿಗೆ ಭಾಜನವಾಗಿದ್ದರು.

ಅಲ್ಲದೆ ಮುಂಬರುವ ಮೂರು ಪಂದ್ಯಗಳ ಟ್ವೆಂಟಿ-20 ತಂಡದಿಂದ ವಿಶ್ರಾಂತಿ ಸೂಚಿಸಲಾಗಿದೆ. ಆದರೆ ಕೊಹ್ಲಿ ಸುಮ್ಮನೆ ಕುಳಿತುಕೊಳ್ಳಲು ನಿರ್ಧರಿಸಿಲ್ಲ. ಸಾಮಾನ್ಯವಾಗಿ ಕ್ರಿಕೆಟಿಗರು ಬಿಡುವಿನ ವೇಳೆಯಲ್ಲಿ ತಿರುಗಾಟ ಹಾಗೂ ಮೋಜು ಮಸ್ತಿಗಳಲ್ಲಿ ಭಾಗವಹಿಸುತ್ತಾರೆ.


ಆದರೆ ಇವೆಲ್ಲದಕ್ಕಿಂತಲೂ ವಿರುದ್ಧವಾಗಿ ವಿರಾಟ್ ಮತ್ತಷ್ಟು ಕಠಿಣ ಫಿಟ್ನೆಸ್‌ನಲ್ಲಿ ಭಾಗವಹಿಸಿದ್ದಾರೆ. ಈ ಸಂಬಂಧ ಭಾರ ಎತ್ತುವ ವೀಡಿಯೋವನ್ನು ಅಭಿಮಾನಿಗಳ ಜೊತೆಗೆ ಹಂಚಿಕೊಂಡಿದ್ದಾರೆ.

ನನ್ನ ಫೇವರಿಟ್ ಲಿಫ್ಟ್‌ಗೆ ಹಿಂತಿರುಗಿದ್ದು, ನಾನು ಬಯಸಿದ್ದಂತೆ ಹೆಚ್ಚು ಪ್ರಬಲ ಹಾಗೂ ಶಕ್ತಿಯುತವಾಗಿಲು ಇರಲು ಸಾಧ್ಯವಾಗಿದೆ ಎಂದಿದ್ದಾರೆ.