ವೀರು ಟ್ರಿಪಲ್ ಸೆಂಚುರಿ ಮತ್ತು ಹೆಲ್ಮೆಟ್‌ಗೆ ನಂಟು ಏನು?

ಹೊಸದಿಲ್ಲಿ: ಅಂತರಾಷ್ಟ್ರೀಯ ಕ್ರಿಕೆಟ್ ವೃತ್ತಿ ಜೀವನಕ್ಕೆ ನಿವೃತ್ತಿ ಘೋಷಿಸಿದ ಬಳಿಕ ಸಾಮಾಜಿಕ ಜಾಲತಾಣ ಟ್ವಿಟರ್‌ನಲ್ಲಿ ಸಕ್ರಿಯವಾಗಿರುವ ಭಾರತ ಕ್ರಿಕೆಟ್ ತಂಡದ ಮಾಜಿ ಸ್ಪೋಟಕ ಆರಂಭಿಕ ಬ್ಯಾಟ್ಸ್‌ಮನ್ ವೀರೇಂದ್ರ ಸೆಹ್ವಾಗ್, ಮಗದೊಮ್ಮೆ ತಮ್ಮ ಮರ್ಮಭರಿತ ಟ್ವಿಟ್‌ನಿಂದ ಗಮನ ಸೆಳೆದಿದ್ದಾರೆ.

ಸಮಕಾಲೀನ ವಿಷಯಗಳ ಬಗ್ಗೆ ತಮ್ಮದೇ ಆದ ರೀತಿಯಲ್ಲಿ ತಮಾಷೆಯ ರೀತಿಯಲ್ಲಿ ಸಮಾಜಕ್ಕೆ ಉತ್ತಮ ಸಂದೇಶ ಸಾರುವಲ್ಲಿ ಸೆಹ್ವಾಗ್ ಸದಾ ಬದ್ಧವಾಗಿದ್ದಾರೆ. ಇದೇ ಕಾರಣಕ್ಕಾಗಿ ಕಿರು ಅವಧಿಯಲ್ಲಿ ಟ್ವಿಟರ್‌ನಲ್ಲಿ ಭಾರಿ ಸಂಖ್ಯೆ ಅನುಯಾಯಿಗಳನ್ನು ಗಿಟ್ಟಿಸಿಕೊಳ್ಳುವ ಮೂಲಕ ಹೆಚ್ಚಿನ ಜನಪ್ರಿಯತೆ ಕಾಪಾಡಿಕೊಂಡಿದ್ದಾರೆ.

ವೀರು ಇದೀಗ ಟ್ರಾಫಿಕ್ ನಿಯಮಗಳ ಉಲ್ಲಂಘನೆಯ ಬಗ್ಗೆ ಧ್ವನಿ ಎತ್ತಿದ್ದಾರೆ. "ಟ್ರಿಪಲ್ ಸೆಂಚುರಿ ಓಕೆ, ಆದರೆ ಮೋಟಾರ್‌ಸೈಕಲ್‌ನಲ್ಲಿ ಮೂವರ ಸವಾರಿ ಓಕೆ ಅಲ್ಲ" ಎಂದಿದ್ದಾರೆ.

Triple century ok, but tripling not ok please. Beti Bachaao , Helmet Pehno aur Pehnaao. pic.twitter.com/v53FMoJPPe — Virender Sehwag (@virendersehwag) October 28, 2017 ಇದಕ್ಕಾಗಿ ಚಿತ್ರವೊಂದನ್ನು ಹಂಚಿಕೊಂಡಿದ್ದಾರೆ. ಇಲ್ಲಿ ಒಂದೇ ಕುಟುಂಬದ ಎಲ್ಲ ಮೂವರು ಪ್ರಯಾಣಿಕರು ಹೆಲ್ಮೆಟ್ ಸಹ ಧರಿಸಿಕೊಂಡಿಲ್ಲ ಎಂಬುದು ಗಮನಾರ್ಹ.

ಬೈಕ್‌ನಲ್ಲಿ ಸವಾರ ಮಾಡುವ ಅಪ್ಪನ ಹಿಂದೆ ಅಮ್ಮ ತದಾ ಬಳಿಕ ಮಗಳು ಕಷ್ಟಪಟ್ಟು ಕುಳಿತುಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಬೇಟಿ ಬಚಾವೊ ಎಂಬ ವಾಕ್ಯವನ್ನು ವೀರು ಉದ್ಗರಿಸಿದ್ದಾರೆ.

ಅಂತಿಮವಾಗಿ ಹೆಲ್ಮೆಟ್ ಧರಿಸಿ ಮತ್ತು ಇನ್ನೊಬ್ಬರಿಗೂ ಹಾಕಿಸಿ ಎಂಬ ಸಲಹೆಯನ್ನು ಮಾಡಿದ್ದಾರೆ.

ಅಂದ ಹಾಗೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಎರಡು ಬಾರಿ ತ್ರಿಶತಕ ಮಾಡಿದ ಮೊದಲ ಹಾಗೂ ಏಕ ಮಾತ್ರ ಭಾರತೀಯ ಬ್ಯಾಟ್ಸ್‌ಮನ್ ವೀರೇಂದ್ರ ಸೆಹ್ವಾಗ್ ಅವರಾಗಿದ್ದಾರೆ.