ಭಾರತ ತಂಡದ ಕೋಚ್ ಆಗಲು ಬಯಸಿದ್ದ ದಾದಾ

ಕೋಲ್ಕತ್ತಾ: ತಾನು ಭಾರತ ಕ್ರಿಕೆಟ್ ತಂಡದ ಕೋಚ್ ಆಗಲು ಅತಿಯಾಗಿ ಬಯಸಿದ್ದೆ. ಆದರೆ ಕೊನೆಗೆ ಆಡಳಿತಗಾರನಾದೆ ಎಂದು ಟೀಮ್ ಇಂಡಿಯಾದ ಮಾಜಿ ಯಶಸ್ವಿ ನಾಯಕ ಸೌರವ್ ಗಂಗೂಲಿ ಅಭಿಪ್ರಾಯಪಟ್ಟಿದ್ದಾರೆ.

ಫಲವನ್ನು ಅಪೇಕ್ಷಿಸದೆ ನೀವೇನು ಮಾಡಬೇಕೋ ಅದನ್ನು ಮಾಡಬೇಕು. ನಿಮ್ಮ ಜೀವನ ಎತ್ತ ಸಾಗುತ್ತದೆ ಎಂಬುದು ನಿಮ್ಮ ಅರಿವಿಗೆ ಬರಲ್ಲ. ಜೀವನವು ಎತ್ತ ಕೊಂಡೊಯ್ಯಲಿದೆ ಎಂಬುದು ಯಾರಿಗೂ ತಿಳಿದಿರಲ್ಲ. 1999ರಲ್ಲಿ ನಾನು ಆಸ್ಟ್ರೇಲಿಯಾಕ್ಕೆ ಹೋದಾಗ ಉಪನಾಯಕ ಕೂಡಾ ಆಗಿರಲಿಲ್ಲ. ಅಂದು ಸಚಿನ್ ನಾಯಕರಾಗಿದ್ದರು. ಆದರೆ ಮೂರು ತಿಂಗಳ ಬಳಿಕ ನಾನೇ ನಾಯಕನಾದೆ ಎಂದರು.

ನಾನು ಆಡಳಿತಗಾರನಾದಾಗ ರಾಷ್ಟ್ರೀಯ ತಂಡದ ಕೋಚ್ ಆಗಲು ಅತಿಯಾಗಿ ಬಯಸಿದ್ದೆ. ಈ ಸಮಯದಲ್ಲಿ ಜಗಮೋಹನ್ ದಾಲ್ಮಿಯಾ ತೀರಿ ಹೋದರು. ಆ ಸಮಯದಲ್ಲಿ ಯಾರೂ ಇಲ್ಲದಿದ್ದರಿಂದ ಬಂಗಾಳ ಕ್ರಿಕೆಟ್ ಸಂಸ್ಥೆಯ ಅಧ್ಯಕ್ಷ ಹುದ್ದೆಯನ್ನು ವಹಿಸಬೇಕಾಗಿ ಬಂತು ಎಂದು ಗಂಗೂಲಿ ವಿವರಿಸಿದರು.