ಶಂಕಾಸ್ಪದ ಬೌಲಿಂಗ್‌ ಸುಳಿಯಿಂದ ಹೊರಬಂದ ವೆಸ್ಟ್‌ ಇಂಡೀಸ್‌ನ ಆಫ್‌ ಸ್ಪಿನ್ನರ್‌

ದುಬೈ: ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಬೌಲಿಂಗ್‌ ಮುಂದುವರಿಸಲು ವೆಸ್ಟ್‌ ಇಂಡೀಸ್‌ನ ಆಲ್‌ರೌಂಡರ್‌ ಕ್ರೇಗ್‌ ಬ್ರಾತ್‌ವೇಟ್‌ಗೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಮಂಡಳಿ (ಐಸಿಸಿ) ಎರಡನೇ ಬಾರಿ ಗ್ರೀನ್‌ ಸಿಗ್ನಲ್‌ ನೀಡಿದೆ. ಬ್ರಾತ್‌ವೇಟ್‌ ಶೈಲಿಯನ್ನು ಪರೀಕ್ಷೆಗೆ ಒಳಪಡಿಸಿದ ಬಳಿಕ ಆಕ್ಷೇಪಾರ್ಹವಲ್ಲ ಎಂದು ಐಸಿಸಿ ನಿರ್ಧರಿಸಿದೆ.

ಕೆರಿಬಿಯನ್‌ ತಂಡದ ಪರ ಸಾಂದರ್ಭಿಕ ಆಫ್‌ ಸ್ಪಿನ್‌ ಬೌಲಿಂಗ್‌ ನಡೆಸುವ ಕ್ರೇಗ್‌ ಬ್ರಾತ್‌ವೇಟ್‌, ಸೆಪ್ಟೆಂಬರ್‌ 2ರಂದು ಕಿಂಗ್‌ಸ್ಟನ್‌ನಲ್ಲಿ ಅಂತ್ಯಗೊಂಡ ಟೀಮ್‌ ಇಂಡಿಯಾ ವಿರುದ್ಧದ ದ್ವಿತೀಯ ಟೆಸ್ಟ್‌ ಪಂದ್ಯದ ವೇಳೆ ಶಂಕಾಸ್ಪದ ಬೌಲಿಂಗ್‌ ಆರೋಪ ಎದುರಿಸಿದ್ದರು.

ಶಂಕಾಸ್ಪದ ಬೌಲಿಂಗ್‌ ಸುಳಿಯಲ್ಲಿ ವೆಸ್ಟ್‌ ಇಂಡೀಸ್‌ನ ಆಟಗಾರ!

ಬಳಿಕ ಅವರನ್ನು ಬೌಲಿಂಗ್‌ ಶೈಲಿ ಪರೀಕ್ಷೆಗೆ ಒಳಪಡುವಂತೆ ಐಸಿಸಿ ಸೂಚಿಸಿತ್ತು. ಅಂತೆಯೇ ಸೆ.14 ರಂದು ಬ್ರಿಟನ್‌ನ ಲೌಬೋರ್ಗ್‌ನಲ್ಲಿ ಬೌಲಿಂಗ್‌ ಶೈಲಿ ಪರೀಕ್ಷೆಗೆ ಒಳಪಟ್ಟಿದ್ದಾರೆ. ಬ್ರಾತ್‌ವೇಟ್‌ ಆಫ್‌ ಸ್ಪಿನ್‌ ಬೌಲ್‌ ಮಾಡುವಾಗ ಅವರ ಮೊಣಕೈ 15 ಡಿಗ್ರಿಗಳಷ್ಟೇ ಬಾಗುತ್ತಿದ್ದು ಇದು ನಿಯ ಉಲ್ಲಂಘನೆಯಲ್ಲ ಎಂದು ತೀರ್ಮಾನಿಸಲಾಗಿದೆ. ಈ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಬೌಲಿಂಗ್‌ ಮುಂದುವರಿಸಲು ಬ್ರಾತ್‌ವೇಟ್‌ಗೆ ಐಸಿಸಿ ಹಸಿರು ನಿಶಾನೆ ತೋರಿದೆ.

ಒಂದು ವೇಳೆ ಬ್ರಾತ್‌ವೇಟ್‌ ಬೌಲಿಂಗ್‌ ಶೈಲಿ ನ್ಯಾಯಸಮ್ಮತವಾದುದ್ದಲ್ಲ ಎಂದು ಪರೀಕ್ಷೆಯಲ್ಲಿ ತಿಳಿದುಬಂದಿದ್ದರೆ, ಬೌಲಿಂಗ್‌ ಶೈಲಿ ಸರಿಪಡಿಸಿಕೊಳ್ಳುವ ವರೆಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅವರು ಬೌಲಿಂಗ್‌ ನಡೆಸದಂತೆ ಐಸಿಸಿ ನಿಷೇಧ ಹೇರುತ್ತಿತ್ತು.

ಟೀಮ್‌ ಇಂಡಿಯಾ ಆಯ್ಕೆ ಸಮಿತಿ ಮುಖ್ಯಸ್ಥ ಎಂಎಸ್‌ಕೆ ಪ್ರಸಾದ್‌ ಸ್ಥಾನಕ್ಕೆ ಆಪತ್ತು!

ಇದಕ್ಕೂ ಮುನ್ನ 2017ರಲ್ಲಿಯೂ ಬ್ರಾತ್‌ವೇಟ್‌ ಅವರ ಬೌಲಿಂಗ್‌ ಶೈಲಿ ನಿಯಮ ಬಾಹೀರವಾದದ್ದು ಎಂದು ವರದಿಯಾಗಿ ಪ್ರಾಥಮಿಕ ಪರಿಶೀಲನೆ ಬಳಿಕ ಅವರಿಗೆ ಬೌಲಿಂಗ್‌ ಮುಂದುವರಿಸಲು ಅನುಮತಿಸಲಾಗಿತ್ತು. ಆದರೆ, ಎರಡನೇ ಬಾರಿ ಅವರ ಶೈಲಿ ವಿರುದ್ಧ ಶಂಕೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಪರಿಪೂರ್ಣ ಪರೀಕ್ಷೆಗೆ ಒಳಪಡುವಂತೆ ಐಸಿಸಿ ಸೂಚಿಸಿತ್ತು.

ಟೆಸ್ಟ್‌ ಕ್ರಿಕೆಟ್‌ನಲ್ಲಿ ವೆಸ್ಟ್‌ ಇಂಡೀಸ್‌ ಪರ 58 ಪಂದ್ಯಗಳನ್ನು ಆಡಿರುವ ಬ್ರಾತ್‌ ವೇಟ್‌ 56.94ರ ಸರಾಸರಿಯಲ್ಲಿ ಒಟ್ಟು 18 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಇನಿಂಗ್ಸ್‌ ಒಂದರಲ್ಲಿ 29 ರನ್‌ ನೀಡಿ 6 ವಿಕೆಟ್‌ಗಳನ್ನು ಪಡೆದಿರುವುದು ಅವರ ಶ್ರೇಷ್ಠ ಬೌಲಿಂಗ್‌ ಪ್ರದರ್ಶನವಾಗಿದೆ. ಏಕದಿನ ಕ್ರಿಕೆಟ್‌ನಲ್ಲಿ ಆಡಿದ 10 ಪಂದ್ಯಗಳಿಂದ ಕೇವಲ 1 ವಿಕೆಟ್‌ ಮಾತ್ರವೇ ಪಡೆದಿದ್ದಾರೆ.