ಭಾರತಕ್ಕೆ ಶಾಕ್ ನೀಡಿದ ಬಾಂಗ್ಲಾ ವನಿತೆಯರು

ಕೌಲಾಲಂಪುರ: ಪ್ರತಿಷ್ಠಿತ ಮಹಿಳಾ ಏಷ್ಯಾ ಕಪ್ 2018 ಟ್ವೆಂಟಿ-20 ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ ಮೂರನೇ ಪಂದ್ಯದಲ್ಲಿ ಬಾಂಗ್ಲಾದೇಶ ವಿರುದ್ಧ ಭಾರತೀಯ ವನಿತೆಯರು ಮುಗ್ಗರಿಸಿದ್ದಾರೆ.

ಬೌಲಿಂಗ್ ಹಾಗೂ ಬ್ಯಾಟಿಂಗ್‌ನಲ್ಲಿ ಮಿಂಚಿದ ಬಾಂಗ್ಲಾದೇಶದ ಆಟಗಾರ್ತಿ ರುಮಾನಾ ಅಹ್ಮದ್, ಏಳು ವಿಕೆಟ್ ಅಂತರದ ಗೆಲುವಿನ ರೂವಾರಿ ಎನಿಸಿಕೊಂಡರು.

ಇದರೊಂದಿಗೆ ಭಾರತದ ಸತತ ಮೂರನೇ ಗೆಲುವಿಗೆ ಬ್ರೇಕ್ ಬಿದ್ದಿದೆ. ಮೊದಲು ಬ್ಯಾಟಿಂಗ್ ನಡೆಸಿದ ಭಾರತೀಯ ಮಹಿಳಾ ತಂಡವು ನಾಯಕಿ ಹರ್ಮನ್‌ಪ್ರೀತ್ ಕೌರ್ (42) ಹಾಗೂ ದೀಪ್ತಿ ಶರ್ಮಾ (32) ಉಪಯುಕ್ತ ಇನ್ನಿಂಗ್ಸ್‌ಗಳ ಹೊರತಾಗಿಯೂ ನಿಗದಿತ 20 ಓವರ್‌ಗಳಲ್ಲಿ ಏಳು ವಿಕೆಟ್ ನಷ್ಟಕ್ಕೆ 141 ರನ್‌ಗಳ ಸಾಧಾರಣ ಮೊತ್ತ ಪೇರಿಸಿತು.

ಭಾರತದ ಓಟಕ್ಕೆ ಕಡಿವಾಣ ಹಾಕಿದ ರುಮಾನಾ ಅಹ್ಮದ್ 21 ರನ್‌ಗಳಿಗೆ ಮೂರು ವಿಕೆಟುಗಳನ್ನು ಕಬಳಿಸಿ ಮಿಂಚಿದರು.

ಬಳಿಕ ಗುರಿ ಬೆನ್ನತ್ತಿದ ಬಾಂಗ್ಲಾ, ಫರ್ಗಾನಾ ಹೊಕ್ ಅಜೇಯ ಅರ್ಧಶತಕದ (52*) ನೆರವಿನಿಂದ ಮೂರು ವಿಕೆಟ್ ನಷ್ಟಕ್ಕೆ ಗುರಿ ತಲುಪಿತು.

ಬ್ಯಾಟಿಂಗ್‌ನಲ್ಲೂ ಮಿಂಚಿದ ರಮಾನಾ ಅಹ್ಮದ್ ಅಜೇಯ 42 ರನ್‌ಗಳ ನಿರ್ಣಾಯಕ ಇನ್ನಿಂಗ್ಸ್ ಕಟ್ಟಿದ್ದರು. ಅಲ್ಲದೆ ಮುರಿಯದ ನಾಲ್ಕನೇ ವಿಕೆಟ್‌ಗೆ ಫರ್ಗಾನಾ ಜತೆ 93 ರನ್‌ಗಳ ಮಹತ್ವದ ಜತೆಯಾಟವನ್ನು ನೀಡುವ ಮೂಲಕ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಈ ಸೋಲಿನ ಹೊರತಾಗಿಯೂ ಭಾರತ ಅಗ್ರಸ್ಥಾನ ಕಾಯ್ದುಕೊಂಡಿದೆ. ಅಲ್ಲದೆ ಆಡಿರುವ ಮೂರು ಪಂದ್ಯಗಳಲ್ಲಿ ಎರಡು ಗೆಲುವಿನೊಂದಿಗೆ ಒಟ್ಟು ನಾಲ್ಕು ಅಂಕಗಳನ್ನು ಕಲೆ ಹಾಕಿದೆ.

ಅಂಕಪಟ್ಟಿ ಇಂತಿದೆ: