ಐಪಿಎಲ್ ಮಹಿಳಾ ಟಿ20: ಸೂಪರ್ ನೋವಾಸ್‌ಗೆ ಜಯ

ಮುಂಬಯಿ: ಮಹಿಳಾ ಐಪಿಎಲ್‌ ಆರಂಭಕ್ಕೆ ಮೊದಲ ಹೆಜ್ಜೆ ಎಂಬಂತೆ ನಡೆದ ವನಿತೆಯರ ಟಿ20 ಚಾಲೆಂಜ್‌ ಪ್ರದರ್ಶನ ಪಂದ್ಯದಲ್ಲಿ ಹರ್ಮನ್‌ಪ್ರೀತ್‌ ಕೌರ್‌ ನಾಯಕತ್ವದ ಐಪಿಎಲ್‌ ಸೂಪರ್‌ನೋವಾಸ್‌ ತಂಡ, ಸ್ಮೃತಿ ಮಂಧಾನ ಸಾರಥ್ಯದ ಐಪಿಎಲ್‌ ಟ್ರಯಲ್‌ಬ್ರೇಜರ್ಸ್‌ ತಂಡವನ್ನು 3 ವಿಕೆಟ್‌ಗಳಿಂದ ರೋಚಕವಾಗಿ ಮಣಿಸಿದೆ.

ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಪಂದ್ಯ ಅಲ್ಪ ಮೊತ್ತಕ್ಕೆ ಸಾಕ್ಷಿಯಾದರೂ, ಪಂದ್ಯದಲ್ಲಿ ಜಿದ್ದಾಜಿದ್ದಿನ ಹೋರಾಟ ಕಂಡು ಬಂತು. ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಟ್ರಯಲ್‌ಬ್ಲೇಜರ್ಸ್‌ ತಂಡ ನಿಗದಿತ 20 ಓವರ್‌ಗಳಲ್ಲಿ 6 ವಿಕೆಟ್‌ ನಷ್ಟಕ್ಕೆ 129 ರನ್‌ಗಳನ್ನು ಕಲೆ ಹಾಕಿತು. ನ್ಯೂಜಿಲೆಂಡ್‌ನ ಸುಜೀ ಬೇಟ್ಸ್‌(32), ಭಾರತದದ ದೀಪ್ತಿ ಶರ್ಮಾ(21) ಮತ್ತು ಸ್ಥಳೀಯ ತಾರೆ ಜೆಮಿಮಾ ರಾಡ್ರಿಗಸ್‌(25) ಉಪಯುಕ್ತ ಆಟವಾಡಿ ತಂಡಕ್ಕೆ ಆಸರೆಯಾದರು.

ನಂತರ ಗುರಿ ಬೆನ್ನಟ್ಟಿದ ಸೂಪರ್‌ನೋವಾಸ್‌ ತಂಡ, 7 ವಿಕೆಟ್‌ಗೆ 130 ರನ್‌ ಗಳಿಸಿ ಇನಿಂಗ್ಸ್‌ನ ಕೊನೆಯ ಎಸೆತದಲ್ಲಿ ಗೆಲುವು ತನ್ನದಾಗಿಸಿಕೊಂಡಿತು. ಆರಂಭಿಕ ಆಟಗಾರ್ತಿಯರಾದ ಮಿಥಾಲಿ ರಾಜ್‌(22) ಮತ್ತು ಇಂಗ್ಲೆಂಡ್‌ನ ಡೇನಿಯೆಲ್‌ ವ್ಯಾಟ್‌(24) ಪ್ರಥಮ ವಿಕೆಟ್‌ಗೆ 47 ರನ್‌ ಸೇರಿಸಿ ತಂಡಕ್ಕೆ ಉತ್ತಮ ಅಡಿಪಾಯ ಹಾಕಿಕೊಟ್ಟರೂ, ಮಧ್ಯಮ ಕ್ರಮಾಂಕದಲ್ಲಿ ಕುಸಿತ ಕಂಡಿತು. ಮಂಧಾನ ಪಡೆಯ ತಿರುಗೇಟಿನಿಂದಾಗಿ ಅಂತಿಮ ಓವರ್‌ಗಳಲ್ಲಿ ಸೂಪರ್‌ನೋವಾಸ್‌ ಒತ್ತಡಕ್ಕೊಳಗಾದಾಗ ಆಸ್ಪ್ರೇಲಿಯಾದ ಸ್ಟಾರ್‌ ಆಲ್‌ರೌಂಡರ್‌ ಎಲೀಸ್‌ ಪೆರಿ(13*) ಅನುಭವ ಪ್ರದರ್ಶಿಸಿ ತಂಡಕ್ಕೆ ಜಯ ತಂದುಕೊಟ್ಟರು. ಬ್ಯಾಟಿಂಗ್‌ ಮತ್ತು ಬೌಲಿಂಗ್‌ನಲ್ಲಿ ಮಿಂಚಿದ ಟ್ರಯಲ್‌ಬ್ಲೇಜರ್ಸ್‌ನ ಸುಜೀ ಬೇಟ್ಸ್‌ ಪಂದ್ಯಶ್ರೇಷ್ಠರಾಗಿ ಮೂಡಿ ಬಂದರು. ಇದೇ ಮೊದಲ ಬಾರಿ ನಡೆದ ಈ ಪ್ರದರ್ಶನ ಪಂದ್ಯಕ್ಕೆ ಪ್ರೇಕ್ಷ ಕರಿಂದ ನೀರಸ ಪ್ರತಿಕ್ರಿಯೆ ವ್ಯಕ್ತವಾಯಿತು.