ಧೋನಿ ಅಲ್ಲ, ಪಂತ್ ನೆರವಾಗಿದ್ದು ಈ ಮಾಜಿ ವಿಕೆಟ್ ಕೀಪರ್!

ಹೊಸದಿಲ್ಲಿ: ಹಿರಿಯ ಅನುಭವಿ ವಿಕೆಟ್ ಕೀಪರ್ ಮಹೇಂದ್ರ ಸಿಂಗ್ ಧೋನಿ ಅವರಿಂದ ಉದಯೋನ್ಮುಖ ವಿಕೆಟ್ ಕೀಪರ್ ರಿಷಬ್ ಪಂತ್ ಸಾಕಷ್ಟು ಕ್ರಿಕೆಟ್ ಪಾಠಗಳನ್ನು ಕಲಿತುಕೊಂಡಿದ್ದಾರೆ.

ಆದರೆ ಧೋನಿಗೂ ಮಿಗಿಲಾಗಿ ವಿಕೆಟ್ ಕೀಪಿಂಗ್‌ನಲ್ಲಿ ಸುಧಾರಣೆ ತರುವಲ್ಲಿ ಮಾಜಿ ವಿಕೆಟ್ ಕಿರಣ್ ಮೋರೆ ನೆರವಾಗಿದ್ದಾರೆ. ಇದನ್ನು ಸ್ವತ: ಪಂತ್ ಉಲ್ಲೇಖಿಸಿದ್ದಾರೆ.

ಇಂಗ್ಲೆಂಡ್ ಪ್ರವಾಸದ ವೇಳೆ ಪಂತ್ ವಿಕೆಟ್ ಕೀಪಿಂಗ್ ಬಗ್ಗೆ ಸಾಕಷ್ಟು ಟೀಕೆಗಳು ಎದಿದ್ದವು. ಇದೊಂದು ವಿಭಿನ್ನ ಅನುಭವವಾಗಿತ್ತು. ಅದಾದ ಬಳಿಕ ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿನಾನು ಕಿರಣ್ ಸರ್ ಅವರಲ್ಲಿ ಕೆಲವೊಂದು ವಿಚಾರಗಳ ಬಗ್ಗೆ ಪಾಠಗಳನ್ನು ಕಲಿತುಕೊಂಡೆ. ಇದರಿಂದ ವಿಕೆಟ್ ಕೀಪಿಂಗ್ ಕೌಶಲ್ಯಗಳನ್ನು ಸುಧಾರಿಸಿಕೊಳ್ಳಲು ನೆರವಾಯಿತು. ಬಳಿಕ ಇದು ಆಸ್ಟ್ರೇಲಿಯಾ ಸರಣಿಯಲ್ಲಿ ನೆರವಾಯಿತು ಎಂದಿದ್ದಾರೆ.

ಆಸ್ಟ್ರೇಲಿಯಾ ವಿರುದ್ಧ ಟೆಸ್ಟ್ ಸರಣಿಯಲ್ಲಿ 20 ಕ್ಯಾಚ್‌ಗಳನ್ನು ಹಿಡಿದ ಪಂತ್ ದಾಖಲೆ ನಿರ್ಮಿಸಿದ್ದರು. ಈ ಪೈಕಿ ಆಡಿಲೇಡ್ ಟೆಸ್ಟ್ ಪಂದ್ಯದಲ್ಲೇ 11 ಕ್ಯಾಚ್‌ಗಳನ್ನು ಹಿಡಿದಿದ್ದರು.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಮಾಜಿ ದಿಗ್ಗಜ ಕಿರಣ್ ಮೋರೆ, ಮಹೇಂದ್ರ ಸಿಂಗ್ ಧೋನಿ ರೀತಿಯಲ್ಲಿ ಯಶಸ್ಸು ಗಳಿಸಲು ಪಂತ್‌ಗೆ ಕೆಲವೊಂದು ಸಲಹೆಗಳನ್ನು ನೀಡಿದ್ದೆ ಎಂದಿದ್ದಾರೆ.

21ರ ಹರೆಯದ ಪಂತ್ ತಮ್ಮ ಕೀಪಿಂಗ್ ಕೌಶಲ್ಯದಲ್ಲಿ ಗಮನಾರ್ಹ ಸುಧಾರಣೆಯನ್ನು ತರಲು ಬಯಸುತ್ತಿದ್ದಾರೆ. ಅಲ್ಲದೆ ತಮಗೆ ಲಭಿಸುವ ಎಲ್ಲ ಅವಕಾಶವನ್ನು ಸದುಪಯೋಗ ಪಡಿಸುವ ಇರಾದೆಯಲ್ಲಿದ್ದಾರೆ.

ಇಂಗ್ಲೆಂಡ್‌ನಲ್ಲಿ ಶತಕ ಬಾರಿಸಿದಾಗ ನನ್ನ ಆತ್ಮವಿಶ್ವಾಸ ಹೆಚ್ಚಿತು. ಅಲ್ಲಿಂದ ಬಳಕ ಸುಧಾರಣೆಯತ್ತ ಗಮನ ಹರಿಸಿದೆ .ಇಂಗ್ಲೆಂಡ್‌ನಲ್ಲಿ ಕಲಿತ ಪಾಠವು ಆಸೀಸ್‌ನಲ್ಲಿ ನೆರವಾಯಿತು ಎಂದರು.