ಮತ್ತಷ್ಟು ಏಕದಿನ ಪಂದ್ಯಗಳನ್ನು ಬಯಸಿದ ಕೊಹ್ಲಿ

ವಿಶಾಖಪಟ್ಟಣ: ಆಸ್ಟ್ರೇಲಿಯಾ ವಿರುದ್ಧ ಟ್ವೆಂಟಿ-20 ಸರಣಿಯ ಬದಲು ಮತ್ತಷ್ಟು ಎರಡು ಏಕದಿನ ಪಂದ್ಯಗಳನ್ನು ಹೆಚ್ಚು ಆಡುತ್ತದ್ದರೆ ಒಳ್ಳೆಯದಿರುತ್ತಿತ್ತು ಎಂದು ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಅಭಿಪ್ರಾಯಪಟ್ಟಿದ್ದಾರೆ.

ಮುಂಬರುವ ಏಕದಿನ ವಿಶ್ವಕಪ್ ದೃಷ್ಟಿಯಲ್ಲಿಟ್ಟುಕೊಂಡು ಕೊಹ್ಲಿ ಇಂತಹದೊಂದು ಮಾತುಗಳನ್ನಾಡಿದ್ದಾರೆ. ಅಲ್ಲದೆ ಇದರಿಂತ ಇತ್ತಂಡಗಳಿಗೂ ಹಿತಕರವಾಗುತ್ತಿತ್ತು ಎಂಬುದನ್ನು ಹೇಳಿದ್ದಾರೆ.

ಆಸ್ಟ್ರೇಲಿಯಾ ವಿರುದ್ಧ ತವರಿನಲ್ಲಿ ಟೀಮ್ ಇಂಡಿಯಾ ಎರಡು ಪಂದ್ಯಗಳ ಟ್ವೆಂಟಿ-20 ಹಾಗೂ ಐದು ಪಂದ್ಯಗಳ ಏಕದಿನ ಸರಣಿಯಲ್ಲಿ ಭಾಗವಹಿಸುತ್ತಿದೆ. ತದಾ ಬಳಿಕ ಐಪಿಎಲ್‌ನಲ್ಲಿ ಆಡಲಿದೆ.

ಬಹುನಿರೀಕ್ಷಿತ ಏಕದಿನ ವಿಶ್ವಕಪ್ ಮೇ 30ರಿಂದ ಆರಂಭವಾಗಲಿದೆ. ಹಾಗಾಗಿ ಮತ್ತೆರಡು ಏಕದಿನ ಪಂದ್ಯಗಳನ್ನು ಆಡಿದ್ದರೆ ಹೆಚ್ಚು ವಿವೇಚನೆಯುಕ್ತವೆನಿಸುತ್ತಿತ್ತು ಎಂದು ವಿರಾಟ್ ಅಭಿಪ್ರಾಯಪಟ್ಟಿದ್ದಾರೆ.

ಇಷ್ಟೆಲ್ಲ ಆದರೂ ತಮ್ಮ ಮುಂದಿರುವ ಪ್ರತಿಯೊಂದು ಅವಕಾಶವನ್ನು ಬಳಸಿಕೊಳ್ಳಬೇಕು ಎಂದು ಹೇಳಿದರು. ವಿಶ್ವಕಪ್‌ಗೆ ಹೋಗುವ ಮುನ್ನ ಅತ್ಯುತ್ತಮ ಮನೋಸ್ಥಿತಿಯನ್ನು ಹೊಂದಿರುವುದು ಅತಿ ಮುಖ್ಯ ಎಂದರು.

ಅದೇ ಹೊತ್ತಿಗೆ ಬಹುತೇಕ ಸಮಸ್ಯೆಗಳನ್ನು ಬಗೆ ಹರಿಸಲಾಗಿದೆ ಎಂಬುದನ್ನು ಹೇಳಿದರು. ಸದ್ಯಕ್ಕೆ ಅತ್ಯುತ್ತಮ ಸಮತೋಲನವನ್ನು ಕಾಪಾಡಿಕೊಳ್ಳಲಾಗಿದೆ ಎಂದರು.