ಯುವ ಕ್ರಿಡಕೆಟಿಗನ ಸಾವು

ಕೋಲ್ಕೊತಾ: ಸ್ಥಳೀಯ ಪ್ರತಿಭಾನ್ವಿತ ಆಟಗಾರ 22 ವರ್ಷದ ಸೋನು ಯಾದವ್‌ ಅಭ್ಯಾಸ ಪಂದ್ಯದ ವೇಳೆ ಮೃತಪಟ್ಟಿರುವುದಾಗಿ ಆಸ್ಪತ್ರೆ ಮೂಲಗಳು ಬುಧವಾರ ತಿಳಿಸಿವೆ.

ಇಲ್ಲಿನ ಬಲ್ಲಿಗಂಜೀ ಸ್ಪೋರ್ಟಿಂಗ್‌ ಕ್ಲಬ್‌ ಪರ ಎರಡನೇ ಡಿವಿಷನ್‌ ಕ್ರಿಕೆಟರ್‌ ಸೋನು ಬ್ಯಾಟಿಂಗ್‌ ನಡೆಸುತ್ತಿದ್ದ ವೇಳೆ ಕುಸಿದು ಬಿದ್ದಿದ್ದಾನೆ. ಬಳಿಕ ಆತನನ್ನು ಸ್ಥಳೀಯ ಎಸ್‌ಎಸ್‌ಕೆಎಮ್‌ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ಮಾರ್ಗಮಧ್ಯದಲ್ಲೇ ಕೊನೆಯುಸಿರೆಳೆದಿದ್ದಾನೆ ಎಂದು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ. ಮೃತ ಕ್ರಿಕೆಟಿಗ ಪೋಷಕರು ಮತ್ತು ಇಬ್ಬರು ಸಹೋದರರನ್ನು ಅಗಲಿದ್ದಾನೆ.

ಆರೋಗ್ಯ ಸ್ಥಿತಿ ಸರಿ ಇಲ್ಲದ ಕಾರಣ ಸಹ ಆಟಗಾರರು ವಿಶ್ರಾಂತಿ ತೆಗೆದುಕೊಳ್ಳುವಂತೆ ಸಲಹೆ ನೀಡಿದರೂ ಸೋನು ಆಟ ಮುಂದುವರಿಸಿದ್ದ. ಬಳಿಕ ಮೈದಾನದಲ್ಲೇ ಕುಸಿದುಬಿದ್ದ ಕಾರಣ ಮೊದಲಿಗೆ ಬಂಗಾಳ ಕ್ರಿಕೆಟ್‌ ಸಂಸ್ಥೆಯ (ಸಿಎಬಿ) ವೈದ್ಯಕೀಯ ವಿಭಾಗಕ್ಕೆ ಆತನನ್ನು ಕರೆದೊಯ್ಯಲಾಗಿತ್ತು. ಬಳಿಕ ಆಸ್ಪತ್ರೆಗೆ ಸಾಗಿಸಲಾಗಿದೆ.

''ಸೋನು ಇನ್ನಿಲ್ಲ ಎಂಬುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ. ಆತ ಪ್ರತಿಭಾಶಾಲಿ ಕ್ರಿಕೆಟಿಗ. ಮಧ್ಯಾನವಷ್ಟೇ ಈ ಸುದ್ದಿಯನ್ನು ವಾಹಿನಿಯಲ್ಲಿ ನೋಡಿದೆ. ಕ್ಲಬ್‌ನ ಯಾವುದೇ ಪಂದ್ಯಗಳು ಇಲ್ಲದೇ ಇದ್ದ ಕಾರಣ, ಸೋನು ತನ್ನ ಸ್ನೇಹಿತರೊಡನೆ ಅಭ್ಯಾಸ ಪಂದ್ಯವನ್ನಾಡುತ್ತಿದ್ದ ಎಂಬುದನ್ನು ಕೇಳಲ್ಪಟ್ಟೆ,'' ಎಂದು ಕ್ಲಬ್‌ನ ಅಧಿಕಾರಿ ಶ್ಯಾಮಲ್‌ ಬ್ಯಾನರ್ಜಿ ಹೇಳಿದ್ದಾರೆ.

ಸೋನು ಸಾವಿಗೆ ನಿಖರ ಕಾರಣ ಇನ್ನು ತಿಳಿದುಬಂದಿಲ್ಲ. ಇತ್ತೀಚೆಗಷ್ಟೇ ಅನಿಕೇತ್‌ ಶರ್ಮಾ ಎಂಬ ಯುವ ಕ್ರಿಕೆಟಿಗ ಕೂಡ ಇದೇ ರೀತಿ ಕ್ರಿಕೆಟ್‌ ಆಡುತ್ತಲೇ ದುರಂತ ಸಾವಿಗೊಳಗಾಗಿದ್ದರು.