ಬಹುಕೋಟಿ ಐಪಿಎಲ್‌ಗೂ ಯುವಿ ಗುಡ್‌ಬೈ

ಮುಂಬಯಿ: ಸ್ಫೋಟಕ ಎಡಗೈ ಆಟಗಾರ ಯುವಿ ಶ್ರೀಮಂತ ಕ್ರಿಕೆಟ್‌ ಲೀಗ್‌ ಐಪಿಎಲ್‌ಗೂ ವಿದಾಯ ಘೋಷಿಸಿದ್ದಾರೆ. 2015ರ ಆವೃತ್ತಿಯಲ್ಲಿ ಯುವಿ ದುಬಾರಿ ಆಟಗಾರನೆನಿಸಿಕೊಂಡಿದ್ದರು.

ಫ್ರಾಂಚೈಸಿಗಳ ಪಾಲಿಗೆ ಚಿನ್ನದ ಮೊಟ್ಟೆ ಇಡುವ ಕೋಳಿ ಎನಿಸಿಕೊಂಡಿದ್ದ ಯುವರಾಜ್‌ ಈ ಬಾರಿ ಕೇವಲ ಮೂಲ ಬೆಲೆಗೆ ಮಾರಾಟಗೊಂಡಿದ್ದು, ವಿದಾಯಕ್ಕೆ ಪ್ರಮುಖ ಕಾರಣ ಎನ್ನಲಾಗಿದೆ. 2015ರಲ್ಲಿ 16 ಕೋಟಿ ರೂ.ಗಳಿಗೆ ಡೆಲ್ಲಿ ಫ್ರಾಂಚೈಸಿ ಪಾಲಾಗಿದ್ದ ಯುವಿಯನ್ನು ಈ ಬಾರಿ ಮುಂಬಯಿ ಇಂಡಿಯನ್ಸ್‌ ಕೇವಲ 1 ಕೋಟಿ ರೂ.ಗೆ ಖರೀದಿಸಿತ್ತು.

''ಬಿಸಿಸಿಐ ಮತ್ತು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ನಿವೃತ್ತಿಯಾಗಿದ್ದೇನೆ. ಇನ್ನು ಮುಂದೆ ಐಪಿಎಲ್‌ಗೂ ಲಭ್ಯ ಇರುವುದಿಲ್ಲ. ವಿದೇಶಿ ಟಿ20 ಲೀಗ್‌ಗಳಲ್ಲಿ ಪಾಲ್ಗೊಳ್ಳುವುದನ್ನು ಎದುರು ನೋಡುತ್ತಿದ್ದೇನೆ,''ಎಂದು ಯುವರಾಜ್‌ ಸಿಂಗ್‌ ಸೋಮವಾರ ಪತ್ರಿಕಾ ಗೋಷ್ಠಿ ತಿಳಿಸಿದರು. ಕಳೆದ ವರ್ಷವೇ ಅವರು ಈ ತಿರ್ಮಾನ ತೆಗೆದುಕೊಂಡಿದ್ದರಂತೆ.

ಐಪಿಎಲ್‌ನಲ್ಲಿ ಮುಂಬಯಿ ಇಂಡಿಯನ್ಸ್‌, ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌, ಪುಣೆ ವಾರಿಯರ್ಸ್‌, ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ಹಾಗೂ ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡಗಳನ್ನು ಯುವರಾಜ್‌ ಪ್ರತಿನಿಧಿಸಿದ್ದಾರೆ. 132 ಪಂದ್ಯಗಳಲ್ಲಿ 2750 ರನ್‌ ಗಳಿಸಿದ್ದಾರೆ. 129.71 ಸ್ಟ್ರೈಕ್‌ರೇಟ್‌.