ಕ್ರೊಯೇಷ್ಯಾ ಗೆಲುವಿನಲ್ಲಿ ಹೃದಯ ಗೆದ್ದ ಅಧ್ಯಕ್ಷೆ

ಹೊಸದಿಲ್ಲಿ: ರೋಚಕ ಸೆಮಿಫೈನಲ್ ಮುಖಾಮುಖಿಯಲ್ಲಿ ಇಂಗ್ಲೆಂಡ್ ತಂಡವನ್ನು 2-1ರ ಗೋಲುಗಳ ಅಂತರದಿಂದ ಮಣಿಸಿರುವ ಕ್ರೊಯೇಷ್ಯಾ, ಫಿಫಾ ವಿಶ್ವಕಪ್ 2018 ಟೂರ್ನಮೆಂಟ್‌ನಲ್ಲಿ ಫೈನಲ್‌ಗೆ ಲಗ್ಗೆಯಿಟ್ಟಿದೆ.

ಈ ನಡುವೆ ಪಂದ್ಯದುದಕ್ಕೂ ಗ್ಯಾಲರಿಯಲ್ಲಿ ನಿಂತು ಬೆಂಬಲ ನೀಡಿರುವ ಕ್ರೊಯೇಷ್ಯಾ ಅಧ್ಯಕ್ಷೆ ಕೊಲಿಂಡ ಗ್ರಾಬರ್‌ ಕಿಟರೊವಿಚ್ ಎಲ್ಲರ ಹೃದಯ ಗೆದ್ದಿದ್ದಾರೆ.

ಕಾಲ್ಜೆಂಡಿನ ಆಟವನ್ನು ಯುರೋಪ್ ರಾಷ್ಟ್ರಗಳು ಹೇಗೆ ಮನಸಾರೆ ಸ್ವೀಕರಿಸಿವೆ ಎಂಬುದಕ್ಕೆ ಇದೊಂದು ನಿದರ್ಶನ ಮಾತ್ರ. ಪಂದ್ಯ ಗೆಲುವಿನ ಬಳಿಕ ಆಟಗಾರರ ಡ್ರೆಸ್ಸಿಂಗ್ ಕೊಠಡಿಗೂ ತೆರಳಿ ಕೊಲಿಂಡ ಸಂಭ್ರಮಾಚರಣೆಯಲ್ಲಿ ಪಾಲ್ಗೊಂಡಿದ್ದರು.


ಕ್ರೊಯೇಷ್ಯಾ ಫುಟ್ಬಾಲ್ ತಂಡಕ್ಕೆ ಅಧ್ಯಕ್ಷೆ ನಿರಂತರ ಬೆಂಬಲ ನೀಡುತ್ತಲೇ ಬಂದಿದ್ದಾರೆ. ಇದೀಗ ಚೊಚ್ಚಲ ಕಿರೀಟ ಗೆಲ್ಲುವ ಮೂಲಕ ಇತಿಹಾಸ ರಚಿಸುವ ತವಕದಲ್ಲಿದೆ.

2015ರಲ್ಲಿ ಕ್ರೊಯೇಷ್ಯಾದ ನಾಲ್ಕನೇ ಅಧ್ಯಕ್ಷೆಯಾಗಿ ಆಯ್ಕೆಯಾಗಿರುವ ಕೊಲಿಂಡ, ಈ ಪದವಿ ಆಲಂಕರಿಸಿದ ಪೂರ್ವ ಯುರೋಪ್‌ನ ಮೊದಲ ಮಹಿಳೆ ಎಂಬ ಗೌರವಕ್ಕೆ ಪಾತ್ರವಾಗಿದ್ದರು.

ರಷ್ಯಾಗೆ ಎಕಾನಮಿ ದರ್ಜೆಯ ವಿಮಾನಯಾನ ಮಾಡಿರುವ ಕೊಲಿಂಡ ಅವರಿಗೆ ಆಟದ ಮೈದಾನದಲ್ಲಿ ವಿಐಪಿ ಸೀಟು ಒದಗಿಸಲಾಗಿತ್ತು. ಆದರೆ ವಿಐಪಿ ಪ್ರದೇಶದಲ್ಲಿ ಟೀಮ್ ಜೆರ್ಸಿ ಧರಿಸಲು ಅನುಮತಿ ಇಲ್ಲದಿದ್ದರಿಂದ ನೇರವಾಗಿ ಸಾಮಾನ್ಯ ಪ್ರೇಕ್ಷಕ ಗ್ಯಾಲರಿಗೆ ತೆರಳಿ ತಮ್ಮ ತಂಡವನ್ನು ಬೆಂಬಲಿಸಿದ್ದರು.