ವಿಶ್ವಕಪ್‌ ರಿವೈಂಡ್‌: 2006 ಇಟಲಿಗೆ ನಾಲ್ಕನೇ ಪ್ರಶಸ್ತಿ

2006 ಇಟಲಿಗೆ ನಾಲ್ಕನೇ ಪ್ರಶಸ್ತಿ

ಜರ್ಮನಿ ಎರಡನೇ ಬಾರಿ ವಿಶ್ವಕಪ್‌ ಟೂರ್ನಿಗೆ ಆತಿಥ್ಯ ವಹಿಸಿತ್ತು. 1974ರಲ್ಲಿ ಮೊದಲ ಬಾರಿ ಆತಿಥ್ಯ ವಹಿಸಿದ್ದ ವೇಳೆ ಚಾಂಪಿಯನ್‌ ಪಟ್ಟ ಪಡೆದಿದ್ದ ಜರ್ಮನಿ, 2006ರಲ್ಲಿ 3ನೇ ಸ್ಥಾನಕ್ಕೆ ತೃಪ್ತಿಪಟ್ಟಿತ್ತು. 1-1 ಗೋಲ್‌ಗಳಿಂದ ಸಮಬಲ ಕಂಡ ಫೈನಲ್‌ ಪಂದ್ಯದಲ್ಲಿ ನಡೆದ ಪೆನಾಲ್ಟಿ ಶೂಟ್‌ಔಟ್‌ನಲ್ಲಿ ಮಿಂಚಿದ ಇಟಲಿ ತಂಡ 5-3 ಗೋಲ್‌ಗಳಿಂದ ಫ್ರಾನ್ಸ್‌ ತಂಡವನ್ನು ಮಣಿಸಿ 4ನೇ ಬಾರಿ ಪ್ರಶಸ್ತಿ ಎತ್ತಿ ಹಿಡಿಯಿತು. ಫೈನಲ್‌ ಪಂದ್ಯದಲ್ಲಿ ಫ್ರಾನ್ಸ್‌ ತಂಡದ ನಾಯಕ ಜಿನೇಡಿಯನ್‌ ಜಿಡಾನ್‌, ಎದುರಾಳಿ ಇಟಲಿ ತಂಡದ ಆಟಗಾರ ಮಾರ್ಕೊ ಮಟೆರಾಜಿಗೆ ಗುದ್ದಿ ವಿವಾದಕ್ಕೆ ಗುರಿಯಾದರು. ಟೂರ್ನಿಗೆ 14 ಪ್ಯಾನಲ್‌ಗಳನ್ನು ಒಳಗೊಂಡ ಚೆಂಡನ್ನು ವಿನ್ಯಾಸಗೊಳಿಸಿದ ಅಡಿಡಾಸ್‌, ಪ್ರತಿ ಪಂದ್ಯಕ್ಕೂ ಅದರ ದಿನಾಂಕ, ಕ್ರೀಡಾಂಗಣ ಮತ್ತು ಸ್ಪರ್ಧಿಸುತ್ತಿರುವ ತಂಡಗಳ ಹೆಸರು ಮುದ್ರಿತಗೊಂಡ ಚೆಂಡನ್ನು ಒದಗಿಸಿದ್ದು ವಿಶೇಷ. ಫೈನಲ್‌ ಪಂದ್ಯಕ್ಕೆ ಸ್ವರ್ಣ ಬಣ್ಣದ ಚೆಂಡನ್ನು ಬಳಕೆ ಮಾಡಲಾಯಿತು.

2010 ಆಫ್ರಿಕಾದಲ್ಲಿ ಸ್ಪೇನ್‌ ಚಾಂಪಿಯನ್‌

ವಿಶ್ವಕಪ್‌ ಟೂರ್ನಿ ಮೊದಲ ಬಾರಿ ಆಫ್ರಿಕಾ ನಾಡಿಗೆ ಕಾಲಿಟ್ಟಿತು. ದಕ್ಷಿಣ ಆಫ್ರಿಕಾದಲ್ಲಿ ನಡೆದ ವಿಶ್ವಕಪ್‌ ಟೂರ್ನಿಗೆ ಬ್ರೆಜಿಲ್‌ನ ಪಾಪ್‌ ಗಾಯಕಿ ಶಕೀರಾ ಹಾಡಿದ 'ವಾಕಾ ವಾಕಾ' ಹಾಡು ವಿಶ್ವದಾದ್ಯಂತ ಮಿಂಚಿನ ಸಂಚಲನವನ್ನುಂಟುಮಾಡಿತ್ತು. ಟೂರ್ನಿಯಲ್ಲಿ ವಿಭಿನ್ನ ತಂತ್ರಗಾರಿಕೆ 'ಟಿಕಿ ಟಕಾ ಫುಟ್ಬಾಲ್‌' ಮೂಲಕ ಮಿಂಚಿದ ಸ್ಪೇನ್‌ ತಂಡ ಚೊಚ್ಚಲ ಪ್ರಶಸ್ತಿ ಮುಡಿಗೇರಿಸಿತು. ಫೈನಲ್‌ ಪಂದ್ಯದಲ್ಲಿ ಸ್ಪೇನ್‌ 1-0 ಗೋಲ್‌ಗಳಿಂದ ನೆದರ್ಲೆಂಡ್ಸ್‌ ವಿರುದ್ಧ ಜಯ ದಾಖಲಿಸಿತು. ಆ್ಯಂಡ್ರೆ ಇನೇಸ್ತಾ 116ನೇ ನಿಮಿಷದಲ್ಲಿ ಗೋಲ್‌ ದಾಖಲಿಸಿ ಜಯದ ರೂವಾರಿ ಎನಿಸಿದರು. ಟೂರ್ನಿಯಲ್ಲಿ 4 ಮಂದಿ ಅತಿ ಹೆಚ್ಚು ಗೋಲ್‌ (5) ದಾಖಲಿಸಿ ಗೋಲ್ಡನ್‌ ಬೂಟ್‌ ಪ್ರಶಸ್ತಿ ಹಂಚಿಕೊಂಡರು. ಟೂರ್ನಿಗೆ ಬಳಕೆ ಮಾಡಲಾದ ಚೆಂಡಿಗೆ ಜಬುಲಾನಿ ಎಂದು ಹೆಸರಿಡಲಾಗಿತ್ತು.

2014 ನೈಲ್‌ ತಟದಲ್ಲಿ ಜರ್ಮನಿಗೆ ಕಿರೀಟ

ಬ್ರೆಜಿಲ್‌ನಲ್ಲಿ ನಡೆದ 2014ರ ವಿಶ್ವಕಪ್‌ ಈವರೆಗಿನ ಅತ್ಯಂತ ದುಬಾರಿ ಟೂರ್ನಿ. ಅಂದಾಜು 35 ಸಾವಿರ ಕೋಟಿಗೂ ಅಧಿಕ ವೆಚ್ಚದಲ್ಲಿ ಟೂರ್ನಿ ಆಯೋಜಿಸಲಾಗಿತ್ತು. ಸಾಂಬಾ ನಾಡಲ್ಲಿ ಆತಿಥೇಯ ಬ್ರೆಜಿಲ್‌ ಫೇವರಿಟ್‌ ಆಗಿತ್ತಾದರೂ ಸೆಮಿಫೈನಲ್‌ನಲ್ಲಿ ನಿರಾಸೆ ಅನುಭವಿಸಿತು. ದಕ್ಷಿಣ ಅಮೆರಿಕದ ದೈತ್ಯ ಅರ್ಜೆಂಟೀನಾ ಫೈನಲ್‌ ತಲುಪಿತಾದರೂ ಜರ್ಮನಿ ಎದುರು 1-0 ಅಂತರದ ಗೋಲ್‌ಗಳಿಂದ ನಿರಾಸೆ ಅನುಭವಿಸಿತು. ಹೆಚ್ಚುವರಿ ಸಮಯದಲ್ಲಿ ಬದಲಿ ಆಟಗಾರ ಮಾರಿಯೊ ಗೊಯ್ಜ್‌ ದಾಖಲಿಸಿದ ಏಕೈಕ ಗೋಲ್‌ ಬಲದಿಂದ ಜರ್ಮನಿ 4ನೇ ಬಾರಿ ವಿಶ್ವ ಚಾಂಪಿಯನ್ನಾಗಿ ಹೊರಹೊಮ್ಮಿತ್ತು. ಟೂರ್ನಿಯಲ್ಲಿ ಬಳಕೆ ಮಾಡಲಾದ ಚೆಂಡಿಗೆ ಅಭಿಮಾನಿಗಳಿಂದ ಆಯ್ಕೆ ಮಾಡಲಾದ ಹೆಸರನ್ನು ಇಡಲಾಯಿತು. ಬ್ರಜೂಕಾ ಹೆಸರಿನ ಈ ಚೆಂಡಿನಲ್ಲಿ ಬ್ರೆಜಿಲ್‌ನ ನೈಲ್‌ ನದಿಯ ವಿನ್ಯಾಸವಿತ್ತು.