'ರೆಡ್ ಡೆವಿಲ್ಸ್‌' ಬೆಲ್ಜಿಯಂ ಬಗ್ಗುಬಡಿದು ಫಿಫಾ ವಿಶ್ವಕಪ್ ಫೈನಲ್ಸ್ ತಲುಪಿದ ಫ್ರಾನ್ಸ್

ಸೇಂಟ್ ಪೀಟರ್ಸ್‌ಬರ್ಗ್‌: ರಷ್ಯಾದಲ್ಲಿ ನಡೆಯುತ್ತಿರುವ ಫುಟ್ಬಾಲ್‌ ವಿಶ್ವಕಪ್‌ ಪಂದ್ಯಾವಳಿ ಅಂತಿಮ ಘಟ್ಟಕ್ಕೆ ಕಾಲಿಡುತ್ತಿದ್ದಂತೆ ರೋಚಕತೆಯೂ ಹೆಚ್ಚಾಗುತ್ತಿದೆ. ಫ್ರಾನ್ಸ್ ಹಾಗೂ ಬೆಲ್ಜಿಯಂ ನಡುವೆ ನಡೆದ ಮೊದಲ ಸೆಮಿ ಫೈನಲ್‌ ಪಂದ್ಯದಲ್ಲಿ ಈ ಬಾರಿಯ ವಿಶ್ವಕಪ್ ಗೆಲ್ಲುವ ಫೇವರಿಟ್ ಎನಿಸಿಕೊಂಡಿರುವ ಫ್ರಾನ್ಸ್ ತಂಡ ಮತ್ತೊಂದು ಯುರೋಪಿಯನ್ ರಾಷ್ಟ್ರವಾದ ಬೆಲ್ಜಿಯಂ ವಿರುದ್ಧ 1 - 0 ಅಂತರದಿಂದ ದಿಗ್ವಿಜಯ ಸಾಧಿಸಿ ಫೈನಲ್ ತಲುಪಿದೆ.

ರೋಚಕತೆಯಿಂದ ಕೂಡಿದ ಸೆಮಿಫೈನಲ್ ಪಂದ್ಯದಲ್ಲಿ ಮೊದಲಾರ್ಧದಲ್ಲಿ ಯಾವುದೇ ಗೋಲನ್ನು ಬಾರಿಸಲು ಎರಡೂ ಬಲಿಷ್ಠ ತಂಡಗಳಿಗೂ ಸಾಧ್ಯವಾಗಲಿಲ್ಲ. ಆರಂಭದಿಂದಲೂ ಬಲಿಷ್ಠ ರೆಡ್‌ ಡೆವಿಲ್ಸ್‌( ಬೆಲ್ಜಿಯಂ ) ತಂಡ ಫ್ರಾನ್ಸ್ ವಿರುದ್ಧ ಹೆಚ್ಚು ಅಟ್ಯಾಕ್‌ ಮಾಡಿದರೂ ಸಹ ಗೋಲು ಬಾರಿಸಲು ಸಾಧ್ಯವಾಗಲಿಲ್ಲ. ಫ್ರಾನ್ಸ್ ಸಹ ಬೆಲ್ಜಿಯಂ ವಿರುದ್ಧ ಹೆಚ್ಚು ಹೋರಾಟ ನಡೆಸಿದ ಕಾರಣ, ಮೊದಲಾರ್ಧದ ಪಂದ್ಯ ಪೈಪೋಟಿಯಿಂದ ಕೂಡಿತ್ತು. ಇದು ಕಾಲ್ಚೆಂಡಿನಾಟದ ಕ್ರೀಡಾಭಿಮಾನಿಗಳಲ್ಲಿ ರಸದೌತಣವನ್ನೇ ಬಡಿಸಿತ್ತು.

21 ನೇ ನಿಮಿಷದಲ್ಲಿ ಬೆಲ್ಜಿಯಂಗೆ ಕಾರ್ನರ್ ಅವಕಾಶ ಲಭಿಸಿದರೂ ಸಹ ಗೋಲು ಬಾರಿಸಲು ಸಾಧ್ಯವಾಗಲಿಲ್ಲ. ನಂತರ 25 ನೇ ನಿಮಿಷದ ಅವಧಿಯಲ್ಲಿ ಫ್ರಾನ್ಸ್‌ಗೆ ಸಹ ಕಾರ್ನರ್ ಅವಕಾಶ ದೊರೆತರೂ ಸಹ ಇದನ್ನು ಗೋಲನ್ನಾಗಿ ಪರಿವರ್ತಿಸಲು ಸಾಧ್ಯವಾಗಲಿಲ್ಲ.

ನಂತರ, ದ್ವಿತೀಯಾರ್ಧದ ಅವಧಿ ಆರಂಭವಾದ ಕೇವಲ 5 ನಿಮಿಷಗಳಲ್ಲಿ ಅಂದರೆ 51ನೇ ನಿಮಿಷದಲ್ಲಿ ಫ್ರಾನ್ಸ್‌ನ ಸ್ಯಾಮುಯೆಲ್ ತಲೆಯಿಂದ ಗೋಲು ಹೊಡೆದು ಪಂದ್ಯವನ್ನು ಫ್ರಾನ್ಸ್‌ನತ್ತ ವಾಲುವಂತೆ ಮಾಡಿತು. ಬಳಿಕ, ಗೋಲು ಬಾರಿಸಲು ಉಭಯ ತಂಡಗಳು ಅನೇಕ ಪ್ರಯತ್ನಗಳನ್ನು ಪಟ್ಟರೂ ಗೋಲನ್ನಾಗಿ ಪರಿವರ್ತಿಸಲು ಎರಡೂ ಬಲಿಷ್ಠ ತಂಡಗಳಿಗೆ ಸಾಧ್ಯವಾಗಲಿಲ್ಲ.

ಈ ಹಿನ್ನೆಲೆ ವಿಶ್ವಕಪ್ ಗೆಲ್ಲುವ ಫೇವರಿಟ್‌ ಎನಿಸಿಕೊಂಡಿರುವ ಫ್ರಾನ್ಸ್, ರೆಡ್‌ ಡೆವಿಲ್ಸ್‌ ಬೆಲ್ಜಿಯಂ ವಿರುದ್ಧ ಗೆಲುವು ಸಾಧಿಸಿ ಫೈನಲ್ಸ್ ಪ್ರವೇಶಿಸಿದೆ. ಇನ್ನು, ಇಂದು ನಡೆಯುವ ಎರಡನೇ ಸೆಮಿಫೈನಲ್‌ ಪಂದ್ಯದಲ್ಲಿ ಇಂಗ್ಲೆಂಡ್‌ ಕ್ರೊಯೇಷ್ಯಾ ತಂಡವನ್ನು ಎದುರಿಸಲಿದೆ. ಈ ಎರಡೂ ತಂಡಗಳ ಪೈಕಿ ಗೆಲ್ಲುವ ತಂಡವು ರಷ್ಯಾ ರಾಜಧಾನಿ ಮಾಸ್ಕೋದಲ್ಲಿ ಭಾನುವಾರ ನಡೆಯಲಿರುವ ಫೈನಲ್‌ ಪಂದ್ಯದಲ್ಲಿ ಫ್ರಾನ್ಸ್ ತಂಡವನ್ನು ಎದುರಿಸಲಿದೆ.