ಕೊರಿಯಾ ಜಯ; ಹಾಲಿ ಚಾಂಪಿಯನ್ ಜರ್ಮನಿ ಟೂರ್ನಿಯಿಂದಲೇ ಔಟ್!

ಮಾಸ್ಕೊ: ರಷ್ಯಾದಲ್ಲಿ ಸಾಗುತ್ತಿರುವ ಪ್ರತಿಷ್ಠಿತ ಫಿಫಾ ಫುಟ್ಬಾಲ್ ವಿಶ್ವಕಪ್ 2018 ಕೂಟದಿಂದಲೇ ಹಾಲಿ ಚಾಂಪಿಯನ್ ಜರ್ಮನಿ ಹೊರನಡೆದಿದೆ.

ಕಳೆದ ಬಾರಿ ಚಾಂಪಿಯನ್ ಪಟ್ಟ ಆಲಂಕರಿಸಿರುವ ಜರ್ಮನ್ನರು ಈ ಬಾರಿ ಕನಿಷ್ಠ ನಾಕೌಟ್ ಹಂತಕ್ಕೂ ಪ್ರವೇಶಿಸುವಲ್ಲಿ ವಿಫಲವಾಗದಿರುವುದು ಭಾರಿ ಮುಖಭಂಗಕ್ಕೊಳಗಾಗಿದೆ.

ಬುಧವಾರ ನಡೆದ ನಿರ್ಣಾಯಕ ಪಂದ್ಯದಲ್ಲಿ ದಕ್ಷಿಣ ಕೊರಿಯಾ ವಿರುದ್ಧ 0-2 ಗೋಲುಗಳ ಅಂತರದ ಹೀನಾಯ ಸೋಲಿಗೆ ಜರ್ಮನಿ ಒಳಗಾಗಿದೆ. ಈ ಮೂಲಕ ಏಷ್ಯಾ ತಂಡದ ಕೈಯಲ್ಲಿ ಸೋಲಿನ ಆಘಾತ ಎದುರಿಸಿದೆ.

ವಿಶ್ವಕಪ್‌ಗೆ ನಂ.1 ಪಟ್ಟದೊಂದಿಗೆ ಕಣಕ್ಕಿಳಿದಿದ್ದ ಹಾಲಿ ಚಾಂಪಿಯನ್ನರು ಮೊದಲ ಪಂದ್ಯದಲ್ಲಿ ಮೆಕ್ಸಿಕೊ ವಿರುದ್ಧ ಸೋಲಿನ ಆಘಾತ ಎದುರಿಸಿತ್ತು. ಬಳಿಕ ಸ್ವೀಡನ್ ವಿರುದ್ಧದ ಪಂದ್ಯದಲ್ಲಿ ತಿರುಗಿ ಬಿದ್ದರೂ ಗೆಲ್ಲಲೇ ಬೇಕಾದ ಕೊನೆಯ ಪಂದ್ಯದಲ್ಲಿ ಸೋಲು ಅನುಭವಿಸುವ ಮೂಲಕ ಕೂಟದಿಂದಲೇ ಹೊರಬಿದ್ದಿದೆ.
ಅತಿ ಕೆಟ್ಟ ಪ್ರದರ್ಶನ ನೀಡಿದ ಜರ್ಮನ್ ಆಟಗಾರರು ಅನೇಕ ಅವಕಾಶಗಳನ್ನು ಕೈಚೆಲ್ಲಿದ್ದರು. ಅತ್ತ ಅವಕಾಶಕ್ಕಾಗಿ ಕಾದು ಕುಳಿತಿದ್ದ ಕೊರಿಯಾ ಇಂಜುರಿ ಸಮಯದಲ್ಲಿ ಡಬಲ್ ಗೋಲುಗಳನ್ನು ಬಾರಿಸುವ ಮೂಲಕ ಐತಿಹಾಸಿಕ ಗೆಲುವನ್ನು ದಾಖಲಿಸಿದರು.

ಕೊನೆಯ ಕ್ಷಣದಲ್ಲಿ ಕಿಮ್ ಯೊಂಗ್ ಗೊನ್ (90+2) ಹಾಗೂ ಸೊನ್ ಹ್ಯೂಂಗ್ ಮಿನ್ (90+6) ರೂಪದಲ್ಲಿ ಕೊರಿಯಾ ಗೋಲುಗಳನ್ನು ದಾಖಲಿಸಿತ್ತು. ಈ ಗೋಲುಗಳ ಹೊರತಾಗಿಯೂ ವಿಶ್ವಕಪ್ ಪ್ರಿ-ಕ್ವಾರ್ಟರ್‌ ಹಂತಕ್ಕೆ ಪ್ರವೇಶಿಸುವಲ್ಲಿ ವಿಫಲವಾಗಿದೆ.

ಎಫ್ ಗುಂಪಿನಲ್ಲಿ ಸ್ವೀಡನ್ ಹಾಗೂ ಮೆಕ್ಸಿಕೊ ತಂಡಗಳು ತಲಾ ಎರಡು ಗೆಲುವುಗಳೊಂದಿಗೆ ನಾಕೌಟ್ ಹಂತಕ್ಕೆ ಪ್ರವೇಶ ಪಡೆದಿದೆ. ಅತ್ತ ದಕ್ಷಿಣ ಕೊರಿಯಾ ಜತೆ ಜರ್ಮನಿ ವಿಶ್ವಕಪ್ ಕನಸು ನೂಚ್ಚು ನೂರಾಗಿದೆ. ಆಡಿರುವ ಮೂರು ಪಂದ್ಯಗಳಲ್ಲಿ ಒಂದು ಪಂದ್ಯ ಮಾತ್ರ ಗೆಲುವು ದಾಖಲಿಸಿರುವ ಜರ್ಮನಿ ಕೊನೆಯ ಸ್ಥಾನಕ್ಕೆ ತಳ್ಳಲ್ಪಟ್ಟಿದೆ.