ಸಮರ ಗೆದ್ದ ಸಮುರಾಯ್‌

ಜಪಾನ್‌ ತಂಡಕ್ಕೆ ಐತಿಹಾಸಿಕ ಜಯ| ಬಲಿಷ್ಠ ಕೊಲಂಬಿಯಾಗೆ 1-2 ಅಂತರದ ಗೋಲ್‌ಗಳಿಂದ ಆಘಾತ

ಸಾನ್ಸ್ಕ್‌(ರಷ್ಯಾ): ಅದ್ಭುತ ಪ್ರದರ್ಶನ ಹೊರತಂದ ಏಷ್ಯಾದ ದೈತ್ಯ ತಂಡಗಳಲ್ಲಿ ಒಂದಾದ ಜಪಾನ್‌, ಫಿಫಾ ವಿಶ್ವಕಪ್‌ ಟೂರ್ನಿಯ 'ಎಚ್‌' ವಿಭಾಗದ ಪಂದ್ಯದಲ್ಲಿ ದಕ್ಷಿಣ ಅಮೆರಿಕದ ಬಲಿಷ್ಠ ತಂಡಗಳಲ್ಲಿ ಒಂದಾದ ಕೊಲಂಬಿಯಾಗೆ 2-1 ಗೋಲ್‌ಗಳಿಂದ ಆಘಾತ ನೀಡಿದೆ.

ಇಲ್ಲಿನ ಮಾರ್ಡೊವಿಯಾ ಅರೆನಾದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಆರಂಭದಲ್ಲೇ ರೆಡ್‌ ಕಾರ್ಡ್‌ ಆಘಾತ ಅನುಭವಿಸಿದ ಕೊಲಂಬಿಯಾ ತಂಡ 10 ಆಟಗಾರರೊಂದಿಗೆ ಹೋರಾಡುವಂತಾಯಿತು. ಇದರ ಸಂಪೂರ್ಣ ಲಾಭ ಪಡೆದ ಜಪಾನ್‌ ಪರ ಮೊದಲಿಗೆ ಪೆನಾಲ್ಟಿ ಸ್ಪಾಟ್‌ ಕಿಕ್‌ನಲ್ಲಿ ಶಿಂಜಿ ಕಗಾವಾ ಮೊದಲ ಗೋಲ್‌ ತಂದುಕೊಟ್ಟರೆ, ನಂತರ ದ್ವಿತೀಯಾರ್ಧದಲ್ಲಿ ಯುಯಾ ಒಸಾಕ (73ನೇ ನಿ.) 2ನೇ ಗೋಲ್‌ ತಂದುಕೊಟ್ಟು ಐತಿಹಾಸಿಕ ಜಯದ ರೂವಾರಿಗಳೆನಿಸಿದರು.

ಇದರೊಂದಿಗೆ ದಕ್ಷಿಣ ಅಮೆರಿಕಾ ಭಾಗದ ತಂಡದ ವಿರುದ್ಧ ಜಯ ದಾಖಲಿಸಿದ ಏಷ್ಯಾ ಭಾಗದ ಮೊಟ್ಟ ಮೊದಲ ತಂಡ ಎಂಬ ಹೆಗ್ಗಳಿಕೆ ಜಪಾನ್‌ ಪಾತ್ರವಾಯಿತು. ಇದಕ್ಕೂ ಮುನ್ನ ಏಷ್ಯಾ ಭಾಗದ ತಂಡಗಳು ವಿಶ್ವಕಪ್‌ ಟೂರ್ನಿಯಲ್ಲಿ ದಕ್ಷಿಣ ಅಮೆರಿಕಾದ ತಂಡಗಳ ವಿರುದ್ಧ 17 ಬಾರಿ ಮುಖಾಮುಖಿಯಾಗಿ 14 ಸೋಲು ಮತ್ತು 3 ಡ್ರಾ ಫಲಿತಾಂಶಗಳನ್ನು ಕಂಡಿದ್ದವು. ಇದೀಗ 18ನೇ ಮುಖಾಮುಖಿಯಲ್ಲಿ ಏಷ್ಯಾಗೆ ಮೊದಲ ಯಶಸ್ಸು ಲಭ್ಯವಾಗಿದೆ.

ಇನ್ನು ಕಳೆದ ಬಾರಿ ಕ್ವಾರ್ಟರ್‌ ಫೈನಲ್‌ ತಲುಪಿದ ಸಾಧನೆ ಮಾಡಿದ್ದ ಕೊಲಂಬಿಯಾ ತಂಡದ ಪರ ಅನುಭವಿ ಮಿಡ್‌ಫೀಲ್ಡರ್‌ ಜುವಾನ್‌ ಫರ್ನಾಂಡೊ ಕ್ವಿಂಟೇರೊ, 39ನೇ ನಿಮಿಷದಲ್ಲಿ ಸಿಕ್ಕ ಫ್ರೀ ಕಿಕ್‌ನಲ್ಲಿ ಚೆಂಡನ್ನು ಗುರಿ ಮುಟ್ಟಿಸಿ ಸೋಲಿನ ಅಂತರ ತಗ್ಗಿಸಲು ನೆರವಾದರು.

ಗೋಲ್‌ ಲೈನ್‌ ತಂತ್ರಜ್ಞಾನದ ಬಳಕೆ

ಫ್ರೀ ಕಿಕ್‌ನಲ್ಲಿ ಗೋಲ್‌ ಪೋಸ್ಟ್‌ ಎದುರು ತಡೆಗೋಡೆಗಳಂತೆ ನಿಂತಿದ್ದ ಜಪಾನ್‌ ಆಟಗಾರರು ಚೆಂಡು ಮೇಲೆ ನುಗ್ಗಿಬರಲಿದೆಯೆಂದು ಅಂದಾಜಿಸಿ ಸಾಧ್ಯವಾದಷ್ಟು ಎತ್ತರಕ್ಕೆ ಜಿಗಿದಿದ್ದರು. ಆದರೆ, ಅದ್ಭುತ ಚಾಣಾಕ್ಷತನ ಮೆರೆದ ಜುವಾನ್‌ ಕ್ವಿಂಟೇರೊ ಎದುರಾಳಿ ತಂಡದ ಆಟಗಾರರ ಕಾಲಡಿಯಲ್ಲಿ ಚೆಂಡನ್ನು ಗೋಲ್‌ ಪೆಟ್ಟಿಗೆಯತ್ತ ಕಳುಹಿಸಿದ್ದರು. ಇದರಿಂದ ವಿಚಲಿತರಾದ ಜಪಾನ್‌ ಗೋಲಿ ಎಜಿ ಕವಾಶಿಮಾ ಚೆಂಡನ್ನು ತಡೆದರಾದರೂ, ಗೋಲ್‌ ಲೈನ್‌ ತಂತ್ರಜ್ಞಾನದಲ್ಲಿ ಚೆಂಡು ಗೋಲ್‌ ಪೆಟ್ಟಿಗೆಯೊಳಗಿನ ಗೆರೆ ದಾಟಿರುವುದು ಸ್ಪಷ್ಟವಾಗಿತ್ತು. ಹತ್ತು ಆಟಗಾರೊಂದಿಗೆ ಹೋರಾಟ ನಡೆಸಿದರೂ ಕೊಲಂಬಿಯಾ 1-1ರ ಸಮಬಲದೊಂದಿಗೆ ಮೊದಲಾರ್ಧ ಅಂತ್ಯಗೊಳಿಸಿತು.

ಮೊದಲ ರೆಡ್‌ ಕಾರ್ಡ್‌

ಕೊಲಬಿಯಾ ಮತ್ತು ಜಪಾನ್‌ ನಡುವಣ ಪಂದ್ಯ ಪ್ರಸಕ್ತ ಸಾಲಿನ ವಿಶ್ವಕಪ್‌ ಟೂರ್ನಿಯ ಮೊದಲ ರೆಡ್‌ ಕಾರ್ಡ್‌ಗೆ ಸಾಕ್ಷಿಯಾಯಿತು. ಪಂದ್ಯ ಶುರುವಾದ ನಾಲ್ಕೇ ನಿಮಿಷದಲ್ಲಿ ಕೊಲಂಬಿಯಾಗೆ ಆಘಾತ ಎದುರಾಯಿತು. ಜಪಾನ್‌ನ ಮಿಡ್‌ಫೀಲ್ಡರ್‌ ಶಿಂಜಿ ಕಗಾವಾ ಅವರ ಗೋಲ್‌ ಗಳಿಕೆಯ ಪ್ರಯತ್ನವನ್ನು ಪೆನಾಲ್ಟಿ ಬಾಕ್ಸ್‌ನಲ್ಲಿ ಕೈ ಮೂಲಕ ತಡೆದ ಕೊಲಂಬಿಯಾದ ಸ್ಟಾರ್‌ ಡಿಫೆಂಡರ್‌ ಕಾರ್ಲೊಸ್‌ ಸ್ಯಾಂಚೆಸ್‌ ರೆಫ್ರಿಯಿಂದ ನೇರವಾಗಿ ರೆಡ್‌ ಕಾರ್ಡ್‌ ಶಿಕ್ಷೆಗೆ ಗುರಿಯಾದರು. ಇದು ವಿಶ್ವಕಪ್‌ ಇತಿಹಾಸದಲ್ಲಿನ 2ನೇ ಅತ್ಯಂತ ವೇಗದ ರೆಡ್‌ ಕಾರ್ಡ್‌ ಆಗಿದೆ. 1986ರಲ್ಲಿ ಸ್ಕಾಟ್ಲೆಂಡ್‌ ವಿರುದ್ಧ ಉರುಗ್ವೆಯ ಆಟಗಾರ ಜೋಸ್‌ ಅಲ್ಬರ್ಟೊ ಬಟಿಸ್ಟಾ ಕೇವಲ 54 ಸೆಕೆಂಡ್‌ಗಳಲ್ಲಿ ಪ್ರಮಾದ ಎಸಗಿ ರೆಡ್‌ಕಾರ್ಡ್‌ಗೆ ಗುರಿಯಾಗಿದ್ದರು.

09

ಪ್ರಸಕ್ತ ವಿಶ್ವಕಪ್‌ ಟೂರ್ನಿಯಲ್ಲಿ 15 ಪಂದ್ಯಗಳ ಅಂತ್ಯಕ್ಕೆ ದಾಖಲಾದ ಒಟ್ಟು ಪೆನಾಲ್ಟಿ ಸ್ಟಾಪ್‌ ಕಿಕ್‌ಗಳು. ಇದರಲ್ಲಿ 7ರಲ್ಲಿ ಗೋಲ್‌ ದಾಖಲಾಗಿದ್ದು, 2 ವಿಫಲಗೊಂಡಿವೆ.