ನೈಜೀರಿಯಾಗೆ ಸೋಲುಣಿಸಿದ ಕ್ರೊಯೇಷ್ಯಾ

ಕಲಿನಿಂಗ್ರಾಡ್‌: ನೈಜೀರಿಯಾ ವಿರುದ್ಧ ಸುಲಭ ಜಯ ಗಳಿಸಿದ ಕ್ರೊಯೇಷ್ಯಾ ಫಿಫಾ ವಿಶ್ವಕಪ್‌ ಫುಟ್ಬಾಲ್‌ ಟೂರ್ನಿಯ 'ಡಿ' ಗುಂಪಿನಲ್ಲಿ ಸದ್ಯ ಅಗ್ರಸ್ಥಾನ ಅಲಂಕರಿಸಿದೆ.

ಶನಿವಾರ ಇಲ್ಲಿನ ಕಲಿನಿಂಗ್ರಾಡ್‌ ಕ್ರೀಡಾಂಗಣದಲ್ಲಿ ನಡೆದ 'ಡಿ' ಗುಂಪಿನ ದ್ವಿತೀಯ ಪಂದ್ಯದಲ್ಲಿ ಕ್ರೊಯೇಷ್ಯಾ 2-0 ಗೋಲ್‌ಗಳಿಂದ ನೈಜೀರಿಯಾ ವಿರುದ್ಧ ಜಯ ಗಳಿಸಿ ಪೂರ್ಣ ಮೂರು ಅಂಕ ಕಲೆಹಾಕಿತು. ಇದೇ ಗುಂಪಿನ ಅರ್ಜೆಂಟೀನಾ ಮತ್ತು ಐಸ್‌ಲೆಂಡ್‌ ತಲಾ ಒಂದು ಅಂಕ ಹೊಂದಿವೆ. ಅನುಭವಿ ಸ್ಟ್ರೈಕರ್‌ ಮಾರಿಯೊ ಮಂಡ್‌ಜುಕಿಸ್‌ ತಂಡದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು. ಕ್ರೊಯೇಷ್ಯಾ ಪರ ಒಘೆನೆಕಾರೊ ಎಟೆಬೊ (32ನೇ ನಿಮಿಷ, ಉಡುಗೊರೆ ಗೋಲ್‌) ಮತ್ತು ಲೂಕಾ ಮೊಡ್ರಿಕ್‌(71ನೇ ನಿಮಿಷ-ಪೆನಾಲ್ಟಿ) ತಲಾ ಒಂದು ಗೋಲ್‌ ಗಳಿಸಿದರು. ಈ ಗೆಲುವಿನೊಂದಿಗೆ ಕ್ರೊಯೇಷ್ಯಾ ಕಳೆದ ಮೂರು ವಿಶ್ವಕಪ್‌ನ ತನ್ನ ಆರಂಭಿಕ ಪಂದ್ಯದ ಸೋಲಿಗೆ ಕೊನೆಗೂ ಅಂತ್ಯ ಹಾಡಿತು.

4-2-3-1ರ ಸಂಯೋಜನೆಯಲ್ಲಿ ಕಣಕ್ಕಿಳಿದ ಕ್ರೊಯೇಷ್ಯಾ ಪಂದ್ಯದ ಆರಂಭಿದಿಂದಲೂ ಹಿಡಿತ ಸಾಧಿಸಿತು. ಲೂಕಾ ಮೊಡ್ರಿಕ್‌ ಮತ್ತು ಇವಾನ್‌ ರಾಕಿಟಿಕ್‌ ಮಿಡ್‌ಫೀಲ್ಡಿಂಗ್‌ ವಲಯದಲ್ಲಿ ಗಮನ ಸೆಳೆದರು.