ಮೂಸ ಮ್ಯಾಜಿಕ್‌, ನೈಜೀರಿಯಾಗೆ ಜಯ

ವೊಲ್ಗೊಗ್ರಾಡ್‌: ಅಹ್ಮದ್‌ ಮೂಸಾ(49, 75ನೇ ನಿಮಿಷ) ದಾಖಲಿಸಿದ ಅವಳಿ ಗೋಲ್‌ಗಳ ನೆರವಿನಿಂದ ನೈಜೀರಿಯಾ ತಂಡ ಫಿಫಾ ವಿಶ್ವಕಪ್‌ ಫುಟ್ಬಾಲ್‌ ಟೂರ್ನಿಯ ತನ್ನ ದ್ವಿತೀಯ ಪಂದ್ಯದಲ್ಲಿ ಐಸ್‌ಲೆಂಡ್‌ ವಿರುದ್ಧ ಭರ್ಜರಿ ಗೆಲುವು ದಾಖಲಿಸಿ ಟೂರ್ನಿಯಲ್ಲಿ ಖಾತೆ ತೆರೆಯಿತು.

ಇಲ್ಲಿನ ವೊಲ್ಗಾಗ್ರಾಡ್‌ ಅರೆನಾದಲ್ಲಿ ಶುಕ್ರವಾರ ನಡೆದ 'ಡಿ' ಗುಂಪಿನ ಪಂದ್ಯದಲ್ಲಿ ಮಿಂಚಿದ ನೈಜೀರಿಯಾ 2-0 ಗೋಲ್‌ಗಳ ಅಂತರದಿಂದ ಐಸ್‌ಲೆಂಡ್‌ ತಂಡವನ್ನು ಬಗ್ಗು ಬಡಿಯಿತು. ಇದರೊಂದಿಗೆ 3 ಅಂಕದೊಂದಿಗೆ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನಕ್ಕೆ ಜಿಗಿಯಿತು. ಅತ್ತ ಐಸ್‌ಲೆಂಡ್‌ ಮತ್ತು ಲಿಯೋನೆಲ್‌ ಮೆಸ್ಸಿ ಪಡೆ ಆಡಿದ ಎರಡು ಪಂದ್ಯಗಳಲ್ಲಿ ಕೇವಲ ಒಂದಂಕ ಹೊಂದಿದ್ದು, ಕ್ರಮವಾಗಿ ಮೂರು ಮತ್ತು ನಾಲ್ಕನೇ ಸ್ಥಾನದಲ್ಲಿವೆ.

ನೈಜೀರಿಯಾ ಇದೇ 26ರಂದು ತನ್ನ ಅಂತಿಮ ಲೀಗ್‌ ಪಂದ್ಯದಲ್ಲಿ ಪ್ರಬಲ ಅರ್ಜೆಂಟೀನಾ ತಂಡವನ್ನು ಎದುರಿಸಲಿದೆ. ಅರ್ಜೆಂಟೀನಾ ತನ್ನ ಪ್ರಿ ಕ್ವಾರ್ಟರ್‌ ಫೈನಲ್‌ ಆಸೆಯನ್ನು ಜೀವಂತವಾಗಿರಿಸಿಕೊಳ್ಳಬೇಕಾದರೆ ನೈಜೀರಿಯಾ ವಿರುದ್ಧ ಗೆಲ್ಲಲೇಬೇಕಾದ ಒತ್ತಡದಲ್ಲಿದೆ. ಹೀಗಾಗಿ ಈ ಪಂದ್ಯ ತೀವ್ರ ಕುತೂಹಲ ಕೆರಳಿಸಿದೆ. ಮೂಸಾ ಅವಳಿ ಗೋಲ್‌ ಗಳಿಸುವ ಮೂಲಕ 1990ರಲ್ಲಿ ರೋಜರ್‌ ಮಿಲ್ಲಾ ನಂತರ ವಿಶ್ವಕಪ್‌ನಲ್ಲಿ ಎರಡು ಗೋಲ್‌ ಗಳಿಸಿದ ಆಫ್ರಿಕಾದ ಎರಡನೇ ಆಟಗಾರ ಎಂಬ ಹಿರಿಮೆಗೆ ಪಾತ್ರರಾಗಿದ್ದಾರೆ.