ಅಂತಿಮ 16ರ ಹಂತಕ್ಕೆ ಸ್ಪೇನ್, ಪೋರ್ಚುಗಲ್ ಲಗ್ಗೆ

ಮಾಸ್ಕೊ: ರಷ್ಯಾದಲ್ಲಿ ಸಾಗುತ್ತಿರುವ ಪ್ರತಿಷ್ಠಿತ ಫಿಫಾ ವಿಶ್ವಕಪ್ 2018 ಟೂರ್ನಮೆಂಟ್‌ನಲ್ಲಿ ಬಲಿಷ್ಠ ಸ್ಪೇನ್ ಹಾಗೂ ಪೋರ್ಚುಗಲ್ ತಂಡಗಳು ತಮ್ಮ ತಮ್ಮ ಪಂದ್ಯಗಳಲ್ಲಿ ಡ್ರಾ ಫಲಿತಾಂಶವನ್ನು ಕಾಣುವ ಮೂಲಕ ಪ್ರಿ-ಕ್ವಾರ್ಟರ್ ಫೈನಲ್‌ಗೆ ಮುನ್ನುಗ್ಗಿದೆ.

ಇದರೊಂದಿಗೆ ಬಿ ಗುಂಪಿನಲ್ಲಿ ಇರಾನ್ ಹಾಗೂ ಮೊರಕ್ಕೊ ತಂಡಗಳು ಕೂಟದಿಂದಲೇ ಹೊರನಡೆದಿದೆ.

ಸೋಮವಾರ ನಡೆದ ಜಿದ್ದಾಜಿದ್ದಿನ ಹೋರಾಟದಲ್ಲಿ ಇರಾನ್ ವಿರುದ್ಧ ಪೋರ್ಚುಗಲ್ 1-1 ಗೋಲುಗಳ ಅಂತರದ ಸಮಬಲವನ್ನು ಸಾಧಿಸಿದ್ದವು. ಅತ್ತ ಮೊರಕ್ಕೊ ವಿರುದ್ಧ ಸ್ಪೇನ್ 2-2 ಗೋಲುಗಳ ಅಂತರದ ಸಮಬಲ ದಾಖಲಿಸಿತ್ತು.

ಸ್ಪೇನ್ ಆಡಿರುವ ಮೂರು ಪಂದ್ಯಗಳಲ್ಲಿ ಒಂದು ಗೆಲುವು ಹಾಗೂ ಎರಡು ಡ್ರಾ ಸೇರಿದಂತೆ ಒಟ್ಟು ಐದು ಅಂಕಗಳನ್ನು ಕಲೆ ಹಾಕಿದ್ದಷ್ಟೇ ಅಲ್ಲದೆ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿ ಕ್ವಾರ್ಟರ್‌ಗೆ ಮುನ್ನುಗ್ಗಿದೆ. ಅತ್ತ ಅಷ್ಟೇ ಅಂಕಗಳನ್ನು ಸಂಪಾದಿಸಿರುವ ಪೋರ್ಚುಗಲ್ ಸಹ ಎರಡನೇ ತಂಡವಾಗಿ ನಾಕೌಟ್ ಹಂತಕ್ಕೆ ಮುನ್ನುಗ್ಗಿದೆ.


ಪೋರ್ಚುಗಲ್ ಪರ ರಿಕಾರ್ಡೊ ಕ್ವಾರೆಸ್ಮಾ 45ನೇ ನಿಮಿಷದಲ್ಲಿ ಗೋಲು ದಾಖಲಿಸಿದರೆ ಇಂಜುರಿ ಸಮಯದಲ್ಲಿ ಕರಿಮ್ ಅನ್ಸಾರಿಫಾರ್ಡ್ (90+3) ಸಮಬಲದ ಗೋಲು ದಾಖಲಿಸಿದರು. ಇದರಿಂದ ಪೋರ್ಚುಗಲ್‌ಗೆ ಅರ್ಹ ಗೆಲುವನ್ನು ನಿರಾಕರಿಸಿದರು.

ಇನ್ನೊಂದೆಡೆ ಮೊರಕ್ಕೊ ವಿರುದ್ಧ ಸ್ಪೇನ್ ಪರ 19ನೇ ನಿಮಿಷದಲ್ಲಿ ಇಸ್ಕೊ ಹಾಗೂ ಇಂಜುರಿ ಸಮಯದಲ್ಲಿ (90+1) ಇಯಾಗೊ ಅಸ್ಪಾಸ್ ಸಮಬಲದ ಗೋಲುಗಳನ್ನು ಬಾರಿಸಿದರು. ಮೊರಕ್ಕೊ ಪರ 14ನೇ ನಿಮಿಷದಲ್ಲಿ ಖಾಲಿದ್ ಬೌತೈಬ್ ಹಾಗೂ ಯೂಸೆಫ್ ಎನ್-ನೆಸಿರಿ 81ನೇ ನಿಮಿಷದಲ್ಲಿ ಗೋಲುಗಳನ್ನು ಬಾರಿಸಿದರು.

ಒಂದು ಹಂತದಲ್ಲಿ ಸ್ಪೇನ್ ಸೋಲು ಖಚಿತವೆನಿಸಿತ್ತು. ಆದರೆ ಪಂದ್ಯ ಅಂತ್ಯಕ್ಕೂ ಕೆಲವೇ ಕ್ಷಣಗಳು ಮಾತ್ರ ಬಾಕಿ ಉಳಿದಿರುವಾಗ ದಾಖಲಿಸಿದ ಗೋಲಿನಿಂದಾಗಿ ಅಂತಿಮ 16ರ ಹಂತಕ್ಕೆ ಪ್ರವೇಶಿಸುವಂತಾಗಿದೆ.