ಜಿದಾನ್ ಕರಾಳ ಅಧ್ಯಾಯದಲ್ಲಿ ಫ್ರೆಂಚರ ರಣೋತ್ಸಾಹ!

ಮಾಸ್ಕೊ: ಫಿಫಾ ವಿಶ್ವಕಪ್‌ ಫೈನಲ್‌ ಹಣಾಹಣಿಯಲ್ಲಿ ಮಾಜಿ ಚಾಂಪಿಯನ್‌ ಫ್ರಾನ್ಸ್‌ ಮತ್ತು ಕ್ರೊಯೇಷ್ಯಾ ತಂಡಗಳು ಭಾನುವಾರ ಇಲ್ಲಿನ ಲುಜ್ನಿಕಿ ಕ್ರೀಡಾಂಗಣದಲ್ಲಿ ಮುಖಾಮುಖಿಯಾಗಲಿವೆ.

12 ವರ್ಷಗಳ ನಂತರ ಫೈನಲ್‌ ಅಖಾಡದಲ್ಲಿ ಕಾಣಿಸಿಕೊಂಡಿರುವ ಬಲಿಷ್ಠ ಫ್ರಾನ್ಸ್‌‌ಗೆ 20 ವರ್ಷಗಳ ಬಳಿಕ ಚಾಂಪಿಯನ್‌ ಪಟ್ಟಕ್ಕೇರುವ ಅತ್ಯುತ್ಸಾಹದಲ್ಲಿದ್ದರೂ ಹಳೆಯ ಕರಾಳ ನೆನಪುಗಳು ಕಾಡುತ್ತಿದೆ.

2006ನೇ ಇಸವಿಯಲ್ಲಿ ಜರ್ಮನಿಯಲ್ಲಿ ನಡೆದ ವಿಶ್ವಕಪ್‌ನಲ್ಲಿ ಇಟಲಿ ವಿರುದ್ಧ ಪೆನಾಲ್ಟಿ ಶೂಟೌಟ್‌ನಲ್ಲಿ 5-3ರ ಅಂತರದಲ್ಲಿ ಸೋಲು ಅನುಭವಿಸಿದ್ದ ಫ್ರಾನ್ಸ್ ರನ್ನರ್-ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟುಕೊಂಡಿತ್ತು.

ಅಂದಿನ ಸ್ಟಾರ್ ಆಟಗಾರ ಜಿನೆದಿನ್ ಜಿದಾನ್ ರೆಡ್ ಕಾರ್ಡ್ ಪಡೆದು ಮೈದಾನವನ್ನೇ ತೊರೆಯುವಂತಾಗಿರುವುದು ಫುಟ್ಬಾಲ್ ಇತಿಹಾಸದ ಅತಿ ಕೆಟ್ಟ ಅಧ್ಯಾಯವಾಗಿದೆ.


ಇಟಲಿ ತಂಡದ ಆಟಗಾರ ಮಾರ್ಕೊ ಮ್ಯಾಟೆರಾಝಿ ಅವರ ಎದೆಗೆ ಜಿದಾನ್ ತಲೆಯಿಂದ ಬಡಿದಿದ್ದರು. ತಕ್ಷಣ ಮಧ್ಯೆ ಪ್ರವೇಶಿಸಿದ ರೆಫರಿ ಜಿದಾನ್‌ಗೆ ರೆಡ್ ಕಾರ್ಡ್ ತೋರಿ ಸಿ ಮೈದಾನದಿಂದ ಗೆಟ್ ಪಾಸ್ ನೀಡಿದ್ದರು. ಇದರಿಂದ 10 ಮಂದಿ ಆಟಗಾರರೊಂದಿಗೆ ಫ್ರಾನ್ಸ್ ಪಂದ್ಯ ಮುಂದುವರಿಸಬೇಕಾಯಿತು.

ಪ್ರಸ್ತುತ ಫ್ರೆಂಚರ ರಣೋತ್ಸಾಹವನ್ನು ಮೆಟ್ಟಿ ನಿಲ್ಲುವ ಉಮೇದಿನಲ್ಲಿರುವ ಚೊಚ್ಚಲ ಫೈನಲಿಸ್ಟ್‌ ಕ್ರೊಯೇಷ್ಯಾ ಇತಿಹಾಸ ನಿರ್ಮಿಸುವ ತವಕದಲ್ಲಿದೆ.