ರೊನಾಲ್ಡೊ, ಮೆಸ್ಸಿ ವಿಶ್ವಕಪ್‌ ಗೆಲ್ಲುವ ಫೇವರಿಟ್‌: ಛೆಟ್ರಿ

ಬೆಂಗಳೂರು: ಜರ್ಮನಿ, ಫ್ರಾನ್ಸ್‌,ಸ್ಪೇನ್‌ ಮತ್ತು ಬ್ರೆಜಿಲ್‌ 21ನೇ ಆವೃತ್ತಿಯ ಫಿಫಾ ವಿಶ್ವಕಪ್‌ ಗೆಲ್ಲುವ ಫೇವರಿಟ್‌ ತಂಡಗಳಾಗಿದ್ದರೂ ಕ್ರಿಸ್ಟಿಯಾನೊ ರೊನಾಲ್ಡೊ ಮತ್ತು ಲಿಯೋನೆಲ್‌ ಮೆಸ್ಸಿ ಕ್ರಮವಾಗಿ ಪ್ರತಿನಿಧಿಸುತ್ತಿರುವ ಪೋರ್ಚುಗಲ್‌ ಮತ್ತು ಅರ್ಜೆಂಟೀನಾ ತಂಡಗಳು ಪ್ರಶಸ್ತಿ ಗೆಲ್ಲುವ ಸಾಧ್ಯತೆ ಹೆಚ್ಚಿದೆ ಎಂದು ಭಾರತ ಫುಟ್ಬಾಲ್‌ ತಂಡದ ನಾಯಕ ಸುನಿಲ್‌ ಛೆಟ್ರಿ ಅಭಿಪ್ರಾಯಪಟ್ಟಿದ್ದಾರೆ.

ಸಮಗ್ರ ಆನ್‌ಲೈನ್‌ ಫ್ಯಾಂಟಸಿ ಸ್ಪೋರ್ಟ್ಸ್ ಪ್ಲಾಟ್‌ಫಾರ್ಮ್‌ ಸ್ಟಾರ್‌ಪಿಕ್‌ಗೆ ರಾಯಭಾರಿಯಾಗಿ ಬುಧವಾರ ನೇಮಕಗೊಂಡ 33 ವರ್ಷದ ಛೆಟ್ರಿ, ''ರೊನಾಲ್ಡೊ, ಮೆಸ್ಸಿ ತಂಡಗಳ ಹೊರತಾಗಿಯೂ ಇಂಗ್ಲೆಂಡ್‌ ಅತ್ಯುತ್ತಮ ಪ್ರದರ್ಶನ ನೀಡುವ ನಿರೀಕ್ಷೆಯಿದೆ,'' ಎಂದಿದ್ದಾರೆ. ಇದೇ ವೇಳೆ ಮೆಸ್ಸಿ ಅವರೊಂದಿಗೆ ತಮ್ಮನ್ನು ಹೋಲಿಸುವುದು ಸೂಕ್ತವಲ್ಲ. ಅವರೊಂದಿಗೆ ಹೆಸರು ಬಂದಿದ್ದಕ್ಕೆ ಸಂತಸ ಪಟ್ಟು ನಂತರ ಮರೆತು ಬಿಡಬೇಕು.ಖಂಡಿತವಾಗಿಯೂ ಅವರೊಂದಿಗೆ ಹೋಲಿಕೆ ಸಮಂಜಸವಲ್ಲ ಎಂದಿದ್ದಾರೆ.

ವಿಶ್ವಕಪ್‌ನಲ್ಲಿ ಭಾರತ ಪಾಲ್ಗೊಳ್ಳುವ ಕುರಿತು ಪ್ರತಿಕ್ರಿಯಿಸಿದ ಛೆಟ್ರಿ, ''ಏಷ್ಯಾ ರಾರ‍ಯಂಕಿಂಗ್‌ನಲ್ಲಿ ಅಗ್ರ 10ರಿಂದ 12ರ ಒಳಗೆ ಕಾಣಿಸಿಕೊಳ್ಳುವುದು ನಮ್ಮ ಮೊದಲ ಆದ್ಯತೆಯಾಗಿದೆ. ಇದು ತುಂಬ ಕಠಿಣತೆಯಿಂದ ಕೂಡಿದೆ. ಜಪಾನ್‌, ಸೌದಿ ಅರೇಬಿಯಾ, ಇರಾನ್‌ ನಂತಹ ತಂಡಗಳೊಂದಿಗೆ ನಾವು ಆಡುವುದು ಆರಂಭವಾಗಬೇಕು. ನಂತರ ಅಗ್ರ ತಂಡಗಳೊಂದಿಗೆ ಆಡುವ ಅವಕಾಶ ದೊರೆಯುವ ವಿಶ್ವಾಸವಿದೆ,'' ಎಂದು ತಿಳಿಸಿದ್ದಾರೆ.