ಉರುಗ್ವೆಗೆ ಸತತ ಜಯ

ಮಾಸ್ಕೊ: ಎಫ್‌ಸಿ ಬಾರ್ಸಿಲೋನಾದ ಸ್ಟಾರ್‌ ಸ್ಟ್ರೈಕರ್‌ ಲೂಯಿಸ್‌ ಸ್ವಾರೆಸ್‌ ದಾಖಲಿಸಿದ ಏಕೈಕ ಗೋಲ್‌ನಿಂದ ಮಿಂಚಿದ ಮಾಜಿ ಚಾಂಪಿಯನ್ಸ್‌ ಉರುಗ್ವೆ ತಂಡ, ವಿಶ್ವಕಪ್‌ ಟೂರ್ನಿಯ 'ಎ' ಗುಂಪಿನ ಪಂದ್ಯದಲ್ಲಿ ಸೌದಿ ಸರೇಬಿಯಾ ವಿರುದ್ಧ 1-0 ಅಂತರದ ಜಯ ದಾಖಲಿಸಿತು.

ಇಲ್ಲಿನ ರೊಸ್ತೊವ್‌ ಅರೆನಾದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಗೆಲ್ಲುವ ಫೇವರಿಟ್‌ ತಂಡವಾಗಿ ಕಣಕ್ಕಿಳಿದ ಉರುಗ್ವೆ ಪರ 23ನೇ ನಿಮಿಷದಲ್ಲಿ ಗೋಲ್‌ ದಾಖಲಿಸಿ ಸ್ವಾರೆಸ್‌ ಜಯದ ರೂವಾರಿ ಎನಿಸಿ ಪಂದ್ಯಶ್ರೇಷ್ಠ ಗೌರವ ಪಡೆದರು.

ಈ ಜಯದೊಂದಿಗೆ 'ಎ' ಗುಂಪಿನಲ್ಲಿ ಒಟ್ಟಾರೆ 6 ಅಂಕಗಳನ್ನು ಸಂಪಾದಿಸಿರುವ 2 ಬಾರಿಯ ಚಾಂಪಿಯನ್ಸ್‌ ಉರುಗ್ವೆ 2ನೇ ಸ್ಥಾನ ಅಲಂಕರಿಸಿದ್ದು, ನಾಕ್‌ಔಟ್‌ ಅರ್ಹತೆ ಪಡೆದುಕೊಂಡಿದೆ. ಉರುಗ್ವೆ ಲೀಗ್‌ ಹಂತದಲ್ಲಿನ ತನ್ನ ಕೊನೆಯ ಪಂದ್ಯದಲ್ಲಿ ಆತಿಥೇಯ ರಷ್ಯಾ ವಿರುದ್ಧ ಪೈಪೋಟಿ ನಡೆಸಲಿದ್ದು, ಅಂಕ ಪಟ್ಟಿಯ ಅಗ್ರಸ್ಥಾನ ಗಳಿಸುವತ್ತ ಎದುರು ನೋಡುತ್ತಿದೆ.