ಪ್ರೊ ಕಬಡ್ಡಿ ಲೀಗ್ 2019ನೇ ಸಾಲಿನ ಫೈನಲ್ ಪಂದ್ಯದಲ್ಲಿ ಬೆಂಗಾಲ್ ವಾರಿಯರ್ಸ್ 39-34ರ ಅಂತರದಲ್ಲಿ ದಬಾಂಗ್ ಡೆಲ್ಲಿ ತಂಡವನ್ನು ಮಣಿಸಿ ಚೊಚ್ಚಲ ಬಾರಿಗೆ ಕಿರೀಟಕ್ಕೆ ಮುತ್ತಿಕ್ಕಿದೆ. ಇದರೊಂದಿಗೆ ಡೆಲ್ಲಿ ಚೊಚ್ಚಲ ಕನಸು ಭಗ್ನಗೊಂಡಿದೆ.
Vijaya Karnataka Web19 Oct 2019, 9:50 pm
ಅಹಮದಾಬಾದ್: ಪ್ರೊ ಕಬಡ್ಡಿ ಲೀಗ್ ಏಳನೇ ಆವೃತ್ತಿಯ ಫೈನಲ್ ಪಂದ್ಯದಲ್ಲಿ ದಬಾಂಗ್ ಡೆಲ್ಲಿ ಮಣಿಸಿರುವ ಬೆಂಗಾಲ್ ವಾರಿಯರ್ಸ್ ತಂಡವು ಚೊಚ್ಚಲ ಬಾರಿಗೆ ಕಿರೀಟಕ್ಕೆ ಮುತ್ತಿಕ್ಕಿದೆ.
Vijaya Karnataka Web
ಶನಿವಾರದಂದು ಅಹಮದಾಬಾದ್‌ನ ಇಕೆಎ ಅರೆನಾ ಟ್ರಾನ್ಸ್‌ಸ್ಟೇಡಿಯಾ ಮೈದಾನದಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಬೆಂಗಾಲ್ ವಾರಿಯರ್ಸ್ ತಂಡವು 39-34ರ ಅಂತರದಿಂದ ದಬಾಂಗ್ ಡೆಲ್ಲಿ ತಂಡವನ್ನು ಮಣಿಸಿ ಮೊದಲ ಬಾರಿಗೆ ಚಾಂಪಿಯನ್ ಪಟ್ಟ ಆಲಂಕರಿಸಿತು. ಇದರೊಂದಿಗೆ ಡೆಲ್ಲಿ ರನ್ನರ್ ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟುಕೊಂಡಿತು.
ಪ್ರೊ ಕಬಡ್ಡಿ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಇತ್ತಂಡಗಳು ಫೈನಲ್ ಪ್ರವೇಶ ಪಡೆದಿತ್ತು. ಹಾಗಾಗಿ ಯಾರು ಕಪ್ ಎತ್ತಲಿದ್ದಾರೆ ಎಂಬುದು ಬಹಳಷ್ಟು ಕುತೂಹಲ ಮನೆ ಮಾಡಿತು. ಕೊನೆಗೂ ರೋಚಕ ಮುಖಾಮುಖಿಯಲ್ಲಿ ಬೆಂಗಾಲ್ ವಿಜಯಿಯಾಗಿ ಹೊರಹೊಮ್ಮಿದೆ. ಪಂದ್ಯದ ಆರಂಭಕ್ಕೂ ಮುನ್ನವೇ ಗಾಯಾಳು ಸ್ಟಾರ್ ರೇಡರ್ ಮಣಿಂದರ್ ಸಿಂಗ್ ಸೇವೆಯಿಂದ ವಂಚಿತವಾದ ಬೆಂಗಾಲ್ ವಾರಿಯರ್ಸ್ ಭಾರಿ ಹಿನ್ನಡೆಗೊಳಗಾಗಿತ್ತು. ಆದರೆ ನಾಯಕ ಮೊಹಮ್ಮದ್ ನಭೀಭಕ್ಷ್ ಹಾಗೂ ಕನ್ನಡಿಗ ಸುಕೇಶ್ ಹೆಗ್ಡೆ ಮಿಂಚಿನ ಆಟದ ನೆರವಿನಿಂದ ಬೆಂಗಾಲ್ ತಾವೇಕೆ ಬೆಸ್ಟ್ ತಂಡ ಎಂಬುದನ್ನು ಸಾಬೀತುಪಡಿಸಿತು. ಅತ್ತ ನವೀನ್ ಕುಮಾರ್ ತಮ್ಮ ಶ್ರೇಷ್ಠ ಪ್ರದರ್ಶನ ನೀಡಿದರೂ ತಂಡದಿಂದ ಸೂಕ್ತ ಬೆಂಬಲ ಸಿಗದೇ ಡೆಲ್ಲಿ ನಿರಾಸೆ ಅನುಭವಿಸಬೇಕಾಯಿತು.
ಆರಂಭದಲ್ಲಿ ಡೆಲ್ಲಿ ಮುನ್ನಡೆ ಪಂದ್ಯದ ಆರಂಭದಿಂದಲೇ ದಬಾಂಗ್ ಡೆಲ್ಲಿ ತಂಡವು ಬೆಂಗಾಲ್ ವಾರಿಯರ್ಸ್ ಮೇಲೆ ಸವಾರಿ ಆರಂಭಿಸಿತು. ರೇಡಿಂಗ್ ಹಾಗೂ ಟ್ಯಾಕಿಂಗ್ ಮೂಲಕ ಮೇಲುಗೈ ಸಾಧಿಸಿದ ಡೆಲ್ಲಿ ಆರಂಭದಲ್ಲೇ 6-0 ಅಂತರದ ಮುನ್ನಡೆ ಕಾಯ್ದುಕೊಂಡಿತು.
ಬೆಂಗಾಲ್ ರೇಡರ್‌ಗಳು ಒಂದರ ನಂತರ ಒಂದರಂತೆ ಪೆವಿಲಿಯನ್ ಪರೇಡ್ ನಡೆಸಿತು. ಪರಿಣಾಮ ಆಲೌಟ್ ಮುಖಭಂಗಕ್ಕೊಳಗಾಗಿತು. ಎಂಟು ನಿಮಿಷದೊಳಗೆ ಬೆಂಗಾಲ್ ತಂಡವನ್ನು ಆಲೌಟ್ ಮಾಡಿದ ಡೆಲ್ಲಿ 11-3ರ ಅಂತರದ ಮಹತ್ವದ ಮುನ್ನಡೆ ದಾಖಲಿಸಿತು.
ಬೆಂಗಾಲ್ ತಿರುಗೇಟು... ತಕ್ಷಣವೇ ಎಚ್ಚೆತ್ತುಕೊಂಡ ಬೆಂಗಾಲ್ ಕಮ್‌ಬ್ಯಾಕ್ ಮಾಡಿಕೊಂಡಿತು. ಪರಿಣಾಮ ಅಂತರವನ್ನು 13-8ಕ್ಕೆ ಇಳಿಕೆಗೊಳಿಸಿತು.
ನಾಯಕರಾದವರು ಮುಂದೆ ನಿಂತು ಮುನ್ನಡೆಸಬೇಕು ಎಂಬುದಕ್ಕೆ ನಿದರ್ಶನ ಬರೆದ ಮೊಹಮ್ಮದ್ ನಬೀಭಕ್ಷ್, ಮಿಂಚಿನ ರೇಡಿಂಗ್ ಪ್ರದರ್ಶಿಸಿದರು. ಸೂಪರ್ ರೇಡ್ ಮಾಡುವುದರೊಂದಿಗೆ ದಬಾಂಗ್ ಡೆಲ್ಲಿಯನ್ನು ಆಲೌಟ್ ಮಾಡಿದರು. ಅಲ್ಲದೆ ಅಂತರವನ್ನು 14-15 ಅಂಕಗಳಿಗೆ ಇಳಿಕೆಗೊಳಿಸಿದರು. ಮೊದಲಾರ್ಧದಲ್ಲಿ ಇತ್ತಂಡಗಳು 17-17ರ ಅಂಕಗಳ ಸಮಬಲ ಸಾಧಿಸಿದ್ದವು.
ದ್ವಿತಿಯಾರ್ಧದಲ್ಲಿ ಆರಂಭದಲ್ಲೇ ಡು ಆರ್ ಡೈ ರೇಡ್‌ನಲ್ಲಿ ಮೊಹಮ್ಮದ್ ನಬೀಭಕ್ಷ್ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಆದರೆ ಬಹುಬೇಗನೇ ಎಚ್ಚೆತ್ತುಕೊಂಡ ಬೆಂಗಾಲ್ ಮಗದೊಮ್ಮೆ ಸಾಂಘಿಕ ಪ್ರದರ್ಶನವನ್ನು ನೀಡಿತು. ಇದರಿಂದಾಗಿ ಮುನ್ನಡೆಯನ್ನು 25-21ಕ್ಕೆ ಏರಿಸಿತು.
ಡೆಲ್ಲಿ ಏಕೈಕ ಆಸರೆ ನವೀನ್ ಕುಮಾರ್ ಆಗಿದ್ದರು. ಕೊನೆಗೂ ನಿರೀಕ್ಷೆ ತಲುಪಿದ ನವೀನ್ ಎರಡು ಅಂಕ ಬಾಚುವ ಮೂಲಕ ಅಂಕವನ್ನು 23-25ಕ್ಕೆ ತಗ್ಗಿಸಿದರು. ಅಷ್ಟೇ ಯಾಕೆ ಸತತವಾಗಿ 21ನೇ ಪಂದ್ಯದಲ್ಲೂ ಸೂಪರ್ 10 ಸಾಧನೆಯನ್ನು ಮಾಡಿದರು.
ಆದರೂ ನವೀನ್ ಏಕಾಂಗಿ ಹೋರಾಟ ಸಾಕಾಗಲಿಲ್ಲ. ಯುವ ಸವಾರನನ್ನೇ ಟ್ಯಾಕಲ್ ಮಾಡಿದ ಬೆನ್ನಲ್ಲೇ ಡೆಲ್ಲಿ ತಂಡವನ್ನು ಮಗದೊಮ್ಮೆ ಆಲೌಟ್ ಮಾಡಿದ ಬೆಂಗಾಲ್ 34-24 ಅಂಕಗಳ ಭರ್ಜರಿ ಮುನ್ನಡೆ ದಾಖಲಿಸಿತು.
ಅಂತಿಮ ಹಂತದಲ್ಲಿ ಬೆಂಗಾಲ್ ವಾರಿಯರ್ಸ್ ಕಾಲ ಹರಣ ಮಾಡುವ ತಂತ್ರಗಾರಿಕೆಯನ್ನು ಅನುಸರಿಸಿತು. ಆದರೆ ಪಂದ್ಯ ಅಂತ್ಯಗೊಳ್ಳಲು ಎರಡು ನಿಮಿಷಗಳು ಮಾತ್ರ ಬಾಕಿ ಉಳಿದಿರುವಂತೆಯೇ ಎರಡು ರೇಡ್ ಅಂಕಗಳನ್ನು ಪಡೆದ ನವೀನ್ ಕುಮಾರ್ ಪಂದ್ಯಕ್ಕೆ ಮತ್ತಷ್ಟು ರೋಚಕತೆಯನ್ನು ತಂದರು. ಅಲ್ಲದೆ ಅಂತರವನ್ನು 32-37ಕ್ಕೆ ತಗ್ಗಿಸಿದರು.
ಆದರೂ ಆಗಲೇ ಪರಿಸ್ಥಿತಿ ಕೈಮೀರಿ ಹೋಗಿತ್ತು. ಅಂತಿಮವಾಗಿ 34-39ರ ಅಂತರದಲ್ಲಿ ಸೋಲಿಗೆ ಶರಣಾಗಬೇಕಾಯಿತು. ಅತ್ತ ಬೆಂಗಾಲ್ ಪಾಳೇಯದಲ್ಲಿ ವಿಜಯದ ಸಂಭ್ರಮ ಮುಗಿಲು ಮುಟ್ಟಿತು.
ಬೆಂಗಾಲ್ ಗೆಲುವಿನಲ್ಲಿ ಕನ್ನಡಿಗರ ಪಾತ್ರ... ಕೋಚ್ ರಮೇಶ್ ಅವರಿಂದ ಹಿಡಿದು ಸ್ಟಾರ್ ರೇಡರ್ ಸುಕೇಶ್ ಹೆಗ್ಡೆ ಹಾಗೂ ಡಿಫೆಂಡರ್ ಜೀವಾ ಕುಮಾರ್ ಬೆಂಗಾಲ್ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು. ಸುಕೇಶ್ ಎಂಟು ಹಾಗೂ ಜೀವ ನಾಲ್ಕು ಅಮೂಲ್ಯ ಅಂಕಗಳನ್ನು ಬಾಚಿದರು.
ಅತ್ತ ನಾಯಕ ಮೊಹಮ್ಮದ್ ನಬೀಭಕ್ಷ್ ಸೂಪರ್ 10 ಸಾಧನೆ ಮಾಡುವುದರೊಂದಿಗೆ ಬೆಂಗಾಲ್ ಗೆಲುವನ್ನು ಖಚಿತಪಡಿಸಿತು. ಡೆಲ್ಲಿ ಪರ ನವೀನ್ 18 ಅಂಕಗಳನ್ನು ಕಲೆ ಹಾಕಿದರು. ಅಲ್ಲದೆ ಪ್ರೊ ಕಬಡ್ಡಿ ಲೀಗ್ ಏಳನೇ ಆವೃತ್ತಿಯಲ್ಲಿ 300 ಅಂಕಗಳನ್ನು ಮೈಲುಗಲ್ಲು ತಲುಪಿದರು.
Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.
