ಜೈಪುರ ಅಗ್ರಸ್ಥಾನಕ್ಕೆ ನೆಗೆತ; ತವರಿನಲ್ಲಿ ಗುಜರಾತ್‌ಗೆ ಸತತ 4ನೇ ಸೋಲಿನ ಮುಖಭಂಗ

ಅಹಮದಾಬಾದ್: ಪ್ರೊ ಕಬಡ್ಡಿ ಲೀಗ್ ಏಳನೇ ಆವೃತ್ತಿಯ ಪಂದ್ಯಾವಳಿಯಲ್ಲಿ ಜೈಪುರ ಪಿಂಕ್ ಪ್ಯಾಂಥರ್ಸ್ ವಿರುದ್ಧ ಗುಜರಾತ್ ಫಾರ್ಚೂನ್ ಜಯಂಟ್ಸ್ ಸೋಲಿಗೆ ಶರಣವಾಗಿದೆ.

ತವರು ನೆಲವಾದ ಅಹಮದಾಬಾದ್‌ನ ಟ್ರಾನ್ಸ್‌ಸ್ಟೇಡಿಯಾ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಜೈಪುರ ವಿರುದ್ಧ 22-19ರ ಅಂತರದ ಸೋಲಿಗೆ ಶರಣಾಯಿತು.

ಈ ಮೂಲಕ ತವರು ನೆಲದಲ್ಲಿ ಸತತ ನಾಲ್ಕನೇ ಸೋಲಿಗೆ ಶರಣಾಗಿರುವ ಗುಜರಾತ್ ಒಂದೇ ಒಂದು ಗೆಲುವು ದಾಖಲಿಸಲಾಗದೇ ನಿರಾಸೆ ಮೂಡಿಸಿತು. ಇನ್ನೊಂದೆಡೆ ಜೈಪುರ ಟೂರ್ನಿಯಲ್ಲಿ ಆರನೇ ಗೆಲುವು ದಾಖಲಿಸಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೆ ನೆಗೆದಿದೆ.

ಪಂದ್ಯದ ಆರಂಭದಿಂದಲೇ ಇತ್ತಂಡಗಳಿಂದ ಸಮಬಲದ ಪ್ರದರ್ಶನ ಮೂಡಿಬಂದಿತು. ಆದರೂ ಮೊದಲಾರ್ಧದಲ್ಲಿ 10-9ರ ಅಂತರದ ಮುನ್ನಡೆ ಕಾಯ್ದುಕೊಳ್ಳುವಲ್ಲಿ ಜೈಪುರ ಯಶಸ್ವಿಯಾಯಿತು.

ದ್ವಿತಿಯಾರ್ಧದಲ್ಲೂ ನಿಕಟ ಪೈಪೋಟಿ ನೀಡಿದರೂ ಅದೃಷ್ಟ ಗುಜರಾತ್ ಪರವಾಗಿರಲಿಲ್ಲ. ಒಂದು ಹಂತದಲ್ಲಿ 18-19ರ ಅಂಕ ಸಂಪಾದಿಸಿದರೂ ಕೊನೆಯ ಕ್ಷಣದಲ್ಲಿ ಮಾಡಿದ ತಪ್ಪಿನಿಂದಾಗಿ ಪಂದ್ಯ ಕಳೆದುಕೊಂಡಿತು. ಕೊನೆಗೆ 22-19ರ ಅಂತರದಲ್ಲಿ ಜೈಪುರ ಪಂದ್ಯ ವಶಪಡಿಸಿಕೊಂಡಿತು.

ಈ ಗೆಲುವಿನೊಂದಿಗೆ ಆಡಿರುವ ಏಳು ಪಂದ್ಯಗಳಲ್ಲಿ ಆರು ಗೆಲುವು ಹಾಗೂ ಸೋಲಿನೊಂದಿಗೆ ಒಟ್ಟು 30 ಅಂಕಗಳನ್ನು ಸಂಪಾದಿಸಿರುವ ಜೈಪುರ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಇನ್ನೊಂದೆಡೆ ಒಂಬತ್ತು ಪಂದ್ಯಗಳಲ್ಲಿ ಮೂರು ಗೆಲುವು ಮಾತ್ರ ದಾಖಲಿಸಿರುವ ಗುಜರಾತ್ 20 ಅಂಕಗಳೊಂದಿಗೆ ಎಂಟನೇ ಸ್ಥಾನದಲ್ಲಿದೆ.

ಜೈಪುರ ಪರ ಏಳು ಅಂಕಗಳನ್ನು ಸಂಪಾದಿಸಿದ ದೀಪಕ್ ಹೂಡಾ ಗೆಲುವಿನ ರೂವಾರಿಯೆನಿಸಿಕೊಂಡರು. ಗುಜರಾತ್ ಪರ ಪಂಕಜ್ ಆರು ಪಡೆದರೂ ಗೆಲುವಿನ ದಡ ಸೇರಿಸಲಾಗಲಿಲ್ಲ. ಪರಿಣಾಮ ತವರಿನ ಪ್ರೇಕ್ಷಕರ ಮುಂದೆ ಭಾರಿ ಮುಖಭಂಗ ಎದುರಿಸಬೇಕಾಯಿತು.