ಟೋಕಿಯೋದಲ್ಲಿ ಪುಟಿದೇಳುವ ತವಕದಲ್ಲಿ ಚೀನಾ
ಕ್ರೀಡೆಗೆ ವಿಶೇಷ ಒತ್ತು ನೀಡುವ ರಾಷ್ಟ್ರಗಳಲ್ಲಿ ಒಂದಾದ ಚೀನಾ ಕಳೆದ 20 ವರ್ಷಗಳಲ್ಲಿ ಇದೇ ಮೊದಲ ಬಾರಿ ಒಲಿಂಪಿಕ್ಸ್ನಲ್ಲಿ ತನ್ನ ಅಬ್ಬರ ಕಾಯ್ದುಕೊಳ್ಳುವಲ್ಲಿ ವಿಫಲವಾಗಿದೆ.
2020ರ ಒಲಿಂಪಿಕ್ಸ್ ಲೆಕ್ಕಾಚಾರದಲ್ಲಿ ಚೈನೀಸ್ ಒಲಿಂಪಿಕ್ ಸಂಸ್ಥೆ
ರಿಯೊ ಡಿ ಜನೈರೊ: ಕ್ರೀಡೆಗೆ ವಿಶೇಷ ಒತ್ತು ನೀಡುವ ರಾಷ್ಟ್ರಗಳಲ್ಲಿ ಒಂದಾದ ಚೀನಾ ಕಳೆದ 20 ವರ್ಷಗಳಲ್ಲಿ ಇದೇ ಮೊದಲ ಬಾರಿ ಒಲಿಂಪಿಕ್ಸ್ನಲ್ಲಿ ತನ್ನ ಅಬ್ಬರ ಕಾಯ್ದುಕೊಳ್ಳುವಲ್ಲಿ ವಿಫಲವಾಗಿದೆ. ಇನ್ನು 2020ರ ಒಲಿಂಪಿಕ್ಸ್ ಕೂಟ ಚೀನಾದ ಸಾಂಪ್ರದಾಯಿಕ ಎದುರಾಳಿ ರಾಷ್ಟ್ರ ಜಪಾನ್ನಲ್ಲಿ ನಡೆಯುತ್ತಿದ್ದು, ಟೋಕಿಯೋ ಅಂಗಣದಲ್ಲಿ ತನ್ನ ವೈಭವ ಮರಳಿ ಪಡೆದುಕೊಳ್ಳುವ ಲೆಕ್ಕಾಚಾರ ಆರಂಭಿಸಿದೆ.
2008ರ ಬೀಜಿಂಗ್ ಒಲಿಂಪಿಕ್ಸ್ನಲ್ಲಿ ಪದಕ ಪಟ್ಟಿಯ ಅಗ್ರ ಸ್ಥಾನ ಅಲಂಕರಿಸಿದ ಚೀನಾ, 2012ರ ಲಂಡನ್ ಒಲಿಂಪಿಕ್ಸ್ನಲ್ಲಿ 2ನೇ ಸ್ಥಾನ ಪಡೆದಿತ್ತು. ಆದರೆ, ಈ ಬಾರಿ ಮತ್ತಷ್ಟು ಹಿನ್ನಡೆ ಕಂಡು ಮೂರನೇ ಸ್ಥಾನಕ್ಕೆ ಕುಸಿದು ಬ್ರಿಟನ್ಗೆ 2ನೇ ಸ್ಥಾನವನ್ನು ಬಿಟ್ಟುಕೊಟ್ಟಿದೆ. ಚೀನಾ ಒಟ್ಟಾರೆ 26 ಚಿನ್ನದ ಪದಕಗಳನ್ನು ಗೆಲ್ಲುವಷ್ಟಕ್ಕೆ ಮಾತ್ರವೇ ಶಕ್ತವಾಗಿದೆ.
2012ರಲ್ಲಿ ಚೀನಾ ಈಜಿನಲ್ಲಿ ಒಟ್ಟು 5 ಚಿನ್ನದ ಪದಕಗಳನ್ನು ತನ್ನದಾಗಿಸಿಕೊಂಡಿತ್ತು. ಈ ಬಾರಿ ಕೇವಲ ಒಂದು ಚಿನ್ನಕ್ಕೆ ತೃಪ್ತಿಪಟ್ಟಿದೆ. ಮತ್ತೊಂದೆಡೆ ಬ್ಯಾಡ್ಮಿಂಟನ್ನಲ್ಲಿ ಕ್ಲೀನ್ ಸ್ವೀಪ್ ಮಾಡಿದ್ದ ಚೀನಾ ಈ ಬಾರಿ ಕೇವಲ ಎರಡು ಸ್ವರ್ಣ ಸಂಪಾದಿಸಿ ನಿರಾಸೆ ಅನುಭವಿಸಿದೆ.
ಪಾಠ ಕಲಿತಿದ್ದೇವೆ: ಚೀನಾ
''ರಿಯೊ ಒಲಿಂಪಿಕ್ಸ್ನಿಂದ ಸಾಕಷ್ಟು ಪಾಠ ಕಲಿತಿದ್ದೇವೆ. ಕಳೆದ ಎರಡು ಒಲಿಂಪಿಕ್ಸ್ಗಳಿಗಿಂತಲೂ ಈ ಬಾರಿ ಕಡಿಮೆ ಅಥ್ಲೀಟ್ಗಳನ್ನು ಕಣಕ್ಕಿಳಿಸಿದೆವು. ಅದರಲ್ಲಿಯೂ ಬಹುತೇಕ ಅಥ್ಲೀಟ್ಗಳು 24 ವರ್ಷ ವಯಸ್ಸು ಮೀರಿರಲಿಲ್ಲ. ಒಟ್ಟಾರೆ 410 ಅಥ್ಲೀಟ್ಗಳಲ್ಲಿ 73 ಮಂದಿ ತಮ್ಮ ಚೊಚ್ಚಲ ಒಲಿಂಪಿಕ್ಸ್ನಲ್ಲಿ ಸ್ಪರ್ಧಿಸಿದರು. ಈ ಯುವ ಅಥ್ಲೀಟ್ಗಳಿಗೆ ಕಠಿಣ ತರಬೇತಿ ನೀಡುತ್ತಿದ್ದೇವೆ. ಆದರೂ ಇದು ಸಾಲುವುದಿಲ್ಲ ಎಂಬುದು ತಿಳಿದಿದೆ. ಏಕೆಂದರೆ ಒಲಿಂಪಿಕ್ಸ್ನಲ್ಲಿ ಸ್ಪರ್ಧಿಸುವಾಗ ದೈಹಿಕ ಸಾಮರ್ಥ್ಯದ ಜತೆಗೆ ಮಾನಸಿಕ ಸಾಮರ್ಥ್ಯ ಕೂಡ ಅಷ್ಟೇ ಉತ್ತಮ ಸ್ಥಿತಿಯಲ್ಲಿರಬೇಕು,'' ಎಂದು ಚೀನಾದ ಒಲಿಂಪಿಕ್ ಸಮಿತಿಯ ಮುಖ್ಯಸ್ಥ ಲೂಯ್ ಪೆಂಗ್ ಹೇಳಿದ್ದಾರೆ.