Tokyo Olympics: ತಾಯ್ ತ್ಸು-ಯಿಂಗ್ ವಿರುದ್ಧ ಪಿವಿ ಸಿಂಧೂಗೆ ಸೋಲು!

ಟೋಕಿಯೋ (ಜಪಾನ್‌): ಟೋಕಿಯೋ ಒಲಿಂಪಿಕ್ಸ್‌ ಬ್ಯಾಡ್ಮಿಂಟನ್‌ ಮಹಿಳೆಯರ ಸಿಂಗಲ್ಸ್‌ ಸೆಮಿಫೈನಲ್‌ ಹಣಾಹಣಿಯಲ್ಲಿ ಭಾರತದ ಪಿವಿ ಸಿಂಧೂ, ಚೈನೀಸ್‌ ತೈಪೆಯ ತಾಯ್‌ ತ್ಸು-ಯಿಂಗ್‌ ವಿರುದ್ಧ 2-0 ಅಂತರದಲ್ಲಿ ಸೋಲುವ ಮೂಲಕ ಫೈನಲ್‌ ತಲುಪುವಲ್ಲಿ ವಿಫಲರಾಗಿದ್ದಾರೆ. ಆ ಮೂಲಕ ಭಾರತದ ಆಟಗಾರ್ತಿಯ ಚಿನ್ನದ ಪದಕದ ಕನಸು ಭಗ್ನವಾಯಿತು.

ಶನಿವಾರ ನಡೆದ ಪಂದ್ಯದ ಮೊದಲ ಗೇಮ್‌ನಲ್ಲಿ ಅತ್ಯುತ್ತಮ ಹೋರಾಟ ನಡೆಸಿದ್ದ ಪಿವಿ ಸಿಂಧೂ, ಎರಡನೇ ಗೇಮ್‌ನಲ್ಲಿ ನೀರಸ ಪ್ರದರ್ಶನ ತೋರಿದರು. ಇದರ ಪರಿಣಾಮ ತಾಯ್‌ ತ್ಸು-ಯಿಂಗ್‌ ವಿರುದ್ಧ 18-21 ಹಾಗೂ 11-21 ಅಂತರದ ನೇರ ಗೇಮ್‌ಗಳಲ್ಲಿ ಪರಾಭವಗೊಂಡರು.

ಕಳೆದ ಪಂದ್ಯಗಳ ಗೆಲುವಿನ ವಿಶ್ವಾಸದಲ್ಲಿ ಇಂದು ಕೋರ್ಟ್‌ಗೆ ಆಗಮಿಸಿದ್ದ ಪಿವಿ ಸಿಂಧೂ, ಮೊದಲ ಗೇಮ್‌ ಆರಂಭದಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದ್ದರು. ಅದರಂತೆ 5-2 ಮುನ್ನಡೆ ಗಳಿಸಿದ್ದರು. ನಂತರ ಮೊದಲ ಗೇಮ್‌ ವಿರಾಮದ ಹೊತ್ತಿಗೆ ಕೂಡ ಭಾರತೀಯ ಆಟಗಾರ್ತಿ 11-8 ಮುನ್ನಡೆ ಪಡೆಯುವ ಮೂಲಕ ಗೆಲುವಿನ ವಿಶ್ವಾಸ ಮೂಡಿಸಿದ್ದರು. ಆದರೆ, ಅಂತಿಮ ಹಂತದಲ್ಲಿ ಆಕ್ರಮಣಕಾರಿ ಆಟವಾಡಿದ ತಾಯ್‌ ತ್ಸು-ಯಿಂಗ್‌, 21-18 ಅಂತರದಲ್ಲಿ ಪಿವಿ ಸಿಂಧೂಗೆ ಆಘಾತ ನೀಡಿದರು.

Tokyo olympics: ಡಿಸ್ಕಸ್‌ ಥ್ರೋ ವಿಭಾಗದಲ್ಲಿ ಫೈನಲ್‌ ಪ್ರವೇಶಿಸಿದ ಕಮಲ್‌!

ನಂತರ ಎರಡನೇ ಗೇಮ್‌ನಲ್ಲಿ ಕಣಕ್ಕೆ ಇಳಿದ ಪಿವಿ ಸಿಂಧೂ ಹಾಗೂ ತಾಯ್‌ ತ್ಸು-ಯಿಂಗ್‌ ಆರಂಭದಲ್ಲಿ ಸಮಬಲದ ಹೋರಾಟ ನಡೆಸಿದ್ದರು. ಆ ಮೂಲಕ 4-4 ಸಮಬಲ ಕಾಯ್ದುಕೊಂಡಿದ್ದರು. ಆದರೆ, ತಾನು ಮಾಡಿದ ತಪ್ಪುಗಳಿಂದ ಪಿವಿ ಸಿಂಧೂ, ಎರಡನೇ ಗೇಮ್‌ ವಿರಾಮದ ಹೊತ್ತಿಗೆ ಚೈನೀಸ್‌ ತೈಪೆ ಆಟಗಾರ್ತಿಯ ವಿರುದ್ಧ 7-11 ಅಂತರದಲ್ಲಿ ಹಿನ್ನಡೆ ಅನುಭವಿಸಿದರು.

ವಿರಾಮದ ಬಳಿಕ ಕೋರ್ಟ್‌ಗೆ ಮರಳಿದ ತಾಯ್‌ ತ್ಸು ಯಿಂಗ್‌, ಆಡಿದ ಆರರಲ್ಲಿ ಐದು ಅಂಕಗಳನ್ನು ಕಲೆ ಹಾಕಿ 16-8 ಅಂತರದಲ್ಲಿ ಎಂಟು ಅಂಕಗಳ ಮುನ್ನಡೆ ಗಳಿಸಿದರು. ಆದರೆ, ಚೈನೀಸ್‌ ತೈಪೆ ಆಟಗಾರ್ತಿಯ ವಿರುದ್ಧ ಕಮ್‌ಬ್ಯಾಕ್‌ ಮಾಡುವಲ್ಲಿ ವಿಫಲರಾದ ಸಿಂಧೂ, ಅಂತಿಮವಾಗಿ 11 ಅಂಕಗಳಿಗೆ ಸೀಮಿತರಾದರು. ಕೊನೆಗೂ 11-21 ಅಂತರದಲ್ಲಿ ಸಿಂಧೂ ಸೋಲು ಅನುಭವಿಸಿದರು.

ಆಫ್ರಿಕಾ ವಿರುದ್ಧ ರಾಣಿ ಪಡೆಗೆ ಜಯ : ಭಾರತದ ಕ್ವಾರ್ಟರ್‌ ಫೈನಲ್ಸ್ ಆಸೆ ಜೀವಂತ!

ಪಂದ್ಯದ ಸೋಲಿನೊಂದಿಗೆ ಪಿವಿ ಸಿಂಧೂ ಅವರ ಚೊಚ್ಚಲ ಚಿನ್ನದ ಪದಕದ ಕನಸು ಭಗ್ನವಾಯಿತು. ಇನ್ನು ಕಂಚಿನ ಪದಕದ ಪಂದ್ಯದಲ್ಲಿ ಭಾರತೀಯ ಆಟಗಾರ್ತಿ, ಚೀನಾದ ಹಿ ಬಿಂಗ್ ಜಿಯಾವ್ ವಿರುದ್ಧ ಸೆಣಸಲಿದ್ದಾರೆ.