ರಿಯೊ: ಪತ್ರಕರ್ತರಿದ್ದ ಬಸ್‌ ಮೇಲೆ ಗುಂಡಿನ ದಾಳಿ

ರಿಯೊ ಡಿ ಜನೈರೊ: ರಿಯೊ ಕ್ರೀಡಾಕೂಟಕ್ಕೆ ಪತ್ರಕರ್ತರನ್ನು ಕರೆದೊಯ್ಯುತ್ತಿದ್ದ ಬಸ್‌ ಮೇಲೆ ಗುಂಡಿನ ದಾಳಿ ನಡೆದಿದೆ. ಅದೃಷ್ಟವಶಾತ್‌ ಯಾವುದೇ ಸಾವು, ಗಂಭೀರ ಸ್ವರೂಪದ ನೋವು ಸಂಭವಿಸಿಲ್ಲ.

ಬಾಸ್ಕೆಟ್‌ಬಾಲ್‌ ಕ್ರೀಡಾಂಗಣದಿಂದ ಒಲಿಪಿಂಕ್ಸ್‌ನ ಮುಖ್ಯ ಕ್ರೀಡಾ ಕೇಂದ್ರದ ಕಡೆಗೆ ತೆರಳುತ್ತಿದ್ದ ಬಸ್‌ ಮೇಲೆ ಎರಡು ಗುಂಡು ಹಾರಿಸಲಾಗಿದೆ. ಕಿಟಕಿ ಗಾಜು ಒಡೆದು ಇಬ್ಬರಿಗೆ ಸಣ್ಣ ಪುಟ್ಟ ಗಾಯಗಳಾಗಿವೆ.

'ಗುಂಡಿನ ಶಬ್ದ ಕೇಳಿಸಿತು. ಗುಂಡು ತಗುಲುವ ಅಪಾಯವಿತ್ತು,'ಎಂದು ರಿಯೊ ಬಾಸ್ಕೆಟ್‌ ಬಾಲ್‌ ಪಬ್ಲಿಕೇಷನ್‌ನಲ್ಲಿ ಕೆಲಸ ಮಾಡುತ್ತಿರುವ ಅಮೆರಿಕ ವಾಯು ಪಡೆ ಕ್ಯಾಪ್ಟನ್‌ ಶೆರ್ಲ್‌ ಲೀ ಮೈಕಲ್‌ಸನ್‌ ಹೇಳಿದ್ದಾರೆ. ಗುಂಡಿನ ದಾಳಿ ನಂತರ ಬ್ರೆಜಿಲ್‌ ಪೊಲೀಸರು ಬಿಗಿ ಭದ್ರತೆ ನಿಯೋಜಿಸಿದ್ದಾರೆ.