ರಿಯೊ ಡಿ ಜನೈರೊ: ಕ್ರೀಡಾಪಟುಗಳಿಗೆ ಡೋಪಿಂಗ್ ಒದಗಿಸಿ ಕುಖ್ಯಾತಿ ಪಡೆದು ಜೈಲು ಸೇರಿದ್ದ ಕ್ಯಾಲಿಫೋರ್ನಿಯಾದ ವಿಕ್ಟರ್ ಕಾಂಟೆ ಈಗ ಅಪ್ಪಟ ಕ್ರೀಡಾ ಪ್ರೋತ್ಸಾಹಕ. ಈ ಬಾರಿ ಮಾದಕ ಔಷಧಗಳ ಬದಲು ಕಾಂಟೆ ಖ್ಯಾತ ಕ್ರೀಡಾಪಟುಗಳಿಗೆ ಅಗತ್ಯವಿರುವ ಆಹಾರ ಪೂರೈಕೆಯ ಕೆಲಸದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ. ಹಿಂದಿನ ಉದ್ಯಮ ಕಾನೂನ ಬಾಹೀರವಾಗಿದ್ದರೆ, ಈಗಿನ ಉದ್ಯಮ ಕಾನೂನು ಬದ್ಧವಾಗಿದೆ.
ಬಾಕ್ಸಿಂಗ್ ಹಾಗೂ ವೇಟ್ಲಿಫ್ಟರ್ಗಳಿಗೆ ಸ್ಟೆರಾಯ್ಡ್ ಒದಗಿಸುತ್ತಿದ್ದ ಕಾಂಟೆ ಈಗ ಜಗತ್ತಿನ ಶ್ರೇಷ್ಠ ಅಥ್ಲೀಟ್ಗಳು, ಬಾಕ್ಸರ್ ಹಾಗೂ ಮಾರ್ಷಲ್ ಆಟ್ಸ್ ಪಟುಗಳಿಗೆ ಪೌಷ್ಟಿಕಾಂಶ ಒದಗಿಸುವ ಉದ್ಯಮದಲ್ಲಿ ತಲ್ಲೀನರಾಗಿದ್ದಾರೆ. ಕಾಂಟೆ ಅವರ ಎಸ್ಎನ್ಎಸಿ (ಸೈಂಟಿಫಿಕ್ ನ್ಯೂಟ್ರೀಷನ್ ಫಾರ್ ಅಡ್ವಾನ್ಸ್ಡ್ ಕಂಡೀಷನಿಂಗ್) ಕಂಪೆನಿ ಈ ವರ್ಷ 34 ಕೋಟಿ ರೂ.ಗಳ ವ್ಯವಹಾರ ಮಾಡಿದೆ. ಈ ಹಿಂದೆ ಸ್ಯಾನ್ ಕಾರ್ಲೋಸ್ನಲ್ಲಿ ಬಾಲ್ಕೊ ಲ್ಯಾಬ್ ಸ್ಥಾಪಿಸಿಕೊಂಡು ನಿಷೇಧಿತ ಔಷಧಗಳನ್ನು ಮಾರಾಟ ಮಾಡುತ್ತಿದ್ದ ಕಾಂಟೆ ಈಗ ಅಲ್ಲೇ ಹತ್ತಿರದಲ್ಲೇ ಜಗತ್ತಿನಲ್ಲಿ ಉತ್ತಮ ಕ್ರೀಡಾಪಟುಗಳನ್ನು ಸಿದ್ಧಗೊಳಿಸಲು ಪೌಷ್ಟಿಕ ಆಹಾರಗಳನ್ನು ತಯಾರಿಸುತ್ತಿದ್ದಾರೆ.
ನಿಷೇಧಿತ ಔಷಧಗಳನ್ನು ಕ್ರೀಡಾಪಟುಗಳಿಗೆ ಒದಗಿಸಿದ ಕಾರಣ ಕಾಂಟೆ 2006ರಲ್ಲಿ ನಾಲ್ಕು ತಿಂಗಳ ಕಾಲ ಜೈಲು ಶಿಕ್ಷೆ ಅನುಭವಿಸಿದ್ದರು. ಈಗ ತಮ್ಮ ಕಚೇರಿಯ ಗೋಡೆಯಲ್ಲಿ ಆ ಹಿಂದಿನ ನಿಷೇಧಿತ ಔಷಧಗಳ ಖಾಲಿ ಡಬ್ಬವನ್ನು ಕಾಂಟೆ ಜೋಡಿಸಿಟ್ಟಿದ್ದಾರೆ. ಅದು ಈಗ ಒಂದು ರೀತಿಯಲ್ಲಿ ಸ್ಮರಣಿಕೆಯಾಗಿ ಉಳಿದಿದೆ.
ಕಿಂಗ್ ಬ್ಯಾರಿ ಬಾಂಡ್ಸ್, ಮರಿಯನ್ ಜೋನ್ಸ್ ಹಾಗೂ ಬಿಲ್ ರೊಮನೊವಸ್ಕಿ ಅವರು ನಿಷೇಧಿತ ಉತ್ಪನ್ನಗಳ ಮೇಲೆ ಸಹಿ ಮಾಡಿರುವುದು ಇನ್ನು ಹಾಗೆಯೇ ಉಳಿದುಕೊಂಡಿದೆ. ''ನಾನು ಸಾಕಷ್ಟು ಕ್ರೀಡಾಪಟುಗಳನ್ನು ಹಾಳುಗೆಡಹಿದ್ದೇನೆ, ಹಲವಾರು ಜನರನ್ನು ನೋಯಿಸಿದ್ದೇನೆ, ಆದರೆ ಮುಂದೆ ಹೀಗಾಗಬಾರದೆಂದು ಎಲ್ಲವನ್ನೂ ಒಪ್ಪಿಕೊಂಡು ಜೈಲು ಶಿಕ್ಷೆ ಅನುಭವಿಸಿದೆ,'' ಎಂದು ಕಾಂಟೆ ಹೇಳಿದ್ದಾರೆ.
ಮರಿಯನ್ ಜೋನ್ಸ್ ಒಲಿಂಪಿಕ್ಸ್ನಲ್ಲಿ ಗೆದ್ದ ಪದಕಗಳನ್ನು ಹಿಂದಿರುಗಿಸಿದರು, ಬಾಂಡ್ಸ್ ಅವರಿಗೆ ಬೇಸ್ಬಾಲ್ ಹಾಲ್ ಆಫ್ ಫೇಮ್ ಗೌರವ ತಪ್ಪಿಹೋಯಿತು, ಅಲ್ಲದೆ ಬೇಸ್ಬಾಲ್ನಲ್ಲಿ ಅವರು ನಿರ್ಮಿಸಿದ ಎಲ್ಲ ದಾಖಲೆಗಳೂ ಇಲ್ಲವಾಯಿತು. ಅನೇಕ ಕ್ರೀಡಾಪಟುಗಳ ಘನತೆ ಹಾಗೂ ಕ್ರೀಡಾ ಬದುಕು ಕೊನೆಗೊಂಡಿತು.