ಭಾರತೀಯ ಮಹಿಳಾ ಅಥ್ಲಿಟ್‌ಗಳ ಐಕಾನ್‌ ಆದ ಸಾಕ್ಷಿ

​ಹೊಸದಿಲ್ಲಿ: ಭಾರತಕ್ಕೆ ರಿಯೊ ಒಲಿಂಪಿಕ್ಸ್‌ನಲ್ಲಿ ಮೊದಲ ಪದಕ ತಂದುಕೊಡುವ ಮೂಲಕ ಕುಸ್ತಿಪಟು ಸಾಕ್ಷಿ ಮಲಿಕ್‌ ದೇಶದ ಎರಡು ವಾರಗಳ ಕಾತರದ ಕಾಯುವಿಕೆಗೆ ಕೊನೆ ಹಾಡಿದ್ದಾರೆ. ಈಗ ಭಾರತೀಯ ಮಹಿಳಾ ಅಥ್ಲಿಟ್‌ಗಳ ಐಕಾನ್‌ ಆಗಿ ಹೊರ ಹೊಮ್ಮಿದ್ದಾರೆ.

ಒಲಿಂಪಿಕ್ಸ್‌ನಲ್ಲಿ ಭಾರತಕ್ಕೆ ಪದಕ ತಂದುಕೊಟ್ಟ ಮೊದಲ ಮಹಿಳಾ ಕುಸ್ತಿಪಟು 23 ವರ್ಷದ ಸಾಕ್ಷಿ ಭಾರತದಲ್ಲಿರುವ ಸಂಪ್ರದಾಯವಾದಿ ರಾಜ್ಯ ಹರಿಯಾಣಾದವರು. 21014ರಲ್ಲಿ ಗ್ಲಾಸ್ಗೊದಲ್ಲಿ ನಡೆದಿರುವ ಕಾಮನ್‌ವೆಲ್ತ್‌ ಗೇಮ್ಸ್‌ನಲ್ಲಿ ಬೆಳ್ಳಿ ಗೆದ್ದಿದ್ದರು,ಏಷ್ಯನ್‌ ಗೇಮ್ಸ್‌ನಲ್ಲಿ ಕಂಚು ಗಳಿಸಿದ್ದರು. ಈಗ ಸ್ವಾತಮತ್ರ್ಯದ ಬಳಿಕ ಭಾರತಕ್ಕೆ ಒಲಿಂಪಿಕ್ಸ್‌ನಲ್ಲಿ 25ನೇ ಪದಕ ತಂದುಕೊಟ್ಟಿದ್ದಾರೆ.

12ನೇ ವರ್ಷದಲ್ಲಿ ಸಾಕ್ಷಿ ಕುಸ್ತಿ ತರಬೇತಿ ಪಡೆಯಲು ಆರಂಭಿಸಿದ್ದರು. ಒಲಿಂಪಿಕ್ಸ್‌ ಪದಕ ಗೆಲ್ಲುವ ಮೂಲಕ ಹರಿಯಾಣದಲ್ಲಿ ಅಸ್ತಿತ್ವದಲ್ಲಿರುವ ಲಿಂಗ ತಾರತಮ್ಯದ ವಿರುದ್ಧ ಜಯ ಸಾಧಿಸಿದ್ದಾರೆ.

ಹರಿಯಾಣ ಲಿಂಗ, ವರ್ಗ, ಜಾತಿಗಳ ತಾರಮ್ಯಕ್ಕೆ ಕುಖ್ಯಾತಿ ಪಡೆದಿದೆ. ಇಲ್ಲಿ ಹೆಣ್ಣು ಭ್ರೂಣ ಹತ್ಯೆ, ಮರ್ಯಾದೆ ಹತ್ಯೆ ಸಾಮಾನ್ಯವೆಂಬಂತೆ ನಡೆಯುತ್ತಿರುತ್ತದೆ. ತಾನು ಹುಡುಗರ ಜತೆ ಕುಸ್ತಿ ಆಡಬೇಕಾದರೆ, ಶರ್ಟ್‌ ಧರಿಸಬೇಕಾದರೆ ಗ್ರಾಮಸ್ಥರು ತನ್ನತ್ತ ಬೆರಳು ತೋರಿ ಮಾತನಾಡುತ್ತಿದ್ದರು. ಇದೇ ರೀತಿ ಮುಂದುವರಿದರೆ ಮುಂದೆ ವಿವಾಹ ಜೀವನಕ್ಕೂ ತೊಂದರೆ ಎಂದು ಪೋಷಕರಲ್ಲಿ ಹೇಳುತ್ತಿದ್ದರು ಎಂದು ಸಾಕ್ಷಿ ಈ ಹಿಂದೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು.